Marso 28, 2021
Domingo sa Palaspas sa Pag-antos sa Ginoo (Tuig B)

Paminaw sa Iningles
Ang mga nag-una kaniya ug ang mga nagsunod kaniya padayong misinggit:
“Hosana!
Bulahan ang nagaanhi sa ngalan sa Ginoo!
Bulahan ang umaabot nga gingharian sa atong amahan nga si David!
Hosana sa kahitas-an!” Marcos 11:9–10
Sa pagsulod ni Jesus sa Jerusalem sa sinugdan sa unang Semana Santa, mainiton kaayo Siyang giabiabi, ug gidawat Niya ang gugma ug debosyon sa mga nag-abiabi Kaniya. Siya ang ilang Hari. Siya ang Mesiyas, ug ang ilang pag-abiabi gamay ra kaayo kon itandi sa tinuod nga pagsimba nga angay Kaniyang madawat. Ug bisan tuod misulod si Jesus sa Jerusalem uban niining mahimayaong pag-abiabi, wala pay usa ka semana, migula Siya sa Jerusalem nga may bug-at nga krus sa Iyang mga abaga. Gipas-an Niya kini pagawas sa mga paril sa siyudad aron didto mamatay.
Kon itandi nato ang pagsulod ni Jesus sa Domingo sa Lukay sa Iyang pagdakop, pagdagmal, pakaaron-ingnon nga pagbista, pagpas-an sa krus ug kamatayon, daw sukwahi kaayo kining duha ka hitabo. Adunay kalipay ug pagdayeg sa Iyang pagsulod, ug kasubo ug kakurat sa Iyang paggula. Apan lahi ba gayod kining duha ka hitabo sa panan-aw sa Diyos? Sa panan-aw sa Amahan sa Langit, ang kataposan sa semana mao gayod ang kinatas-ang pagpadayag sa bug-os nga himaya sa Iyang Anak.
Karong adlawa atong basahon ang taas ug matahom nga asoy sa Pasyon ni Jesus sumala sa Ebanghelyo ni Marcos. Apan sa Biyernes atong basahon ang asoy sa Ebanghelyo ni Juan. Giasoy ni Marcos ang mga hitabo sa tin-aw ug detalyadong paagi. Ang labing talagsaong idugang sa Ebanghelyo ni Juan mao kining espirituhanong pagsabot: ang paglansang ni Jesus sa krus ug ang Iyang kamatayon mao gayod ang takna sa Iyang himaya. Makita nato ang Iyang Krus isip bag-ong trono sa grasya. Sa panan-aw sa Diyos, ang yutan-ong himaya nga nadawat ni Jesus karong adlawa sa Iyang pagsulod sa Jerusalem makaabot sa kahingpitan sa pagsaka Niya sa Iyang trono, ang Krus, aron sa paghari hangtod sa kahangtoran.
Sa atong pagsulod sa labing balaang semana sa tuig, mahinungdanon nga ang matag usa kanato motan-aw sa panaw ni Kristo niining semanaha isip iyang kaugalingong tawag sa kinabuhi. Kinahanglan nga mouban kita sa atong Ginoo sa pagpanaw padulong sa himaya sa Krus. Sa panan-aw sa kalibotan, walay kahulogan ang Krus. Apan sa panan-aw sa Amahan sa Langit, ang Krus dili lamang tinubdan sa labing dakong himaya sa Iyang Anak, kondili mao usab ang dalan aron makaambit kita nianang himaya. Kinahanglan nga mamatay kita uban Kaniya, isakripisyo ang tanan alang Kaniya, pilion ang pagsunod Kaniya, ug walay ipugong sa atong pagtinguha nga ihalad ang atong kinabuhi tungod sa gugma.
Pamalandonga karong adlawa ang mga hitabo nga imong pagahandomon niining semanaha. Ipasalig ang imong kaugalingon sa pag-ambit niini, dili lang pinaagi sa paghinumdom niini diha sa hunahuna, kondili pinaagi sa buhing pag-apil. Sa unsang paagi ka gitawag sa Diyos sa paghimo og usa ka lakang sa pagsakripisyo tungod sa gugma? Sa unsang paagi ka gitawag sa Diyos sa maisogong pagdawat sa imong tawag sa paghalad sa imong kinabuhi? Paningkamoti nga makita kining semanaha sa panan-aw sa Amahan sa Langit, ug pag-ampo nga masabtan usab nimo kon sa unsang mga paagi gitawag ka sa Amahan sa pagsundog sa Iyang Anak. Mangadto kita ug mamatay uban Kaniya, kay diha sa Krus ni Kristo atong madiskobrehan ang Iyang walay kataposang himaya.
Mahimayaon kong Hari, takos Ka sa tanang pagdayeg ug pagsimba. Hosana Kanimo, hosana sa kahitas-an! Paaambita ako sa Imong mahimayaong Pasyon, minahal kong Ginoo, ug tabangi ako nga makita ang himaya sa Imong Krus. Sa akong pagtan-aw sa himaya niini, hatagi ako sa grasya nga akong gikinahanglan aron mas bug-os akong makaambit sa Imong kinabuhi sa gugma nga naghalad sa kaugalingon ug nagbag-o sa kinabuhi. Jesus, misalig ako Kanimo.
40 ka Adlaw sa Tiilan sa Krus – Ika-39 nga Pamalandong – Ang Pietà
Mga Kapanguhaan alang sa Kwaresma
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kwaresma
Dugang nga Basahon – Domingo sa Lukay
Mga Kapilian sa mga Basahon sa Misa





