Abril 3, 2021

Ang Manluluwas sa Kalibotan miantos sa mapintas nga kamatayon sa Krus. Ang Iyang lawas nga puno sa samad gipahimutang sa lubnganan. Ang Iyang mga tinun-an nagkatibulaag ug nahadlok nga basin sila na usab ang sunod. Apan ang atong Mahal nga Inahan nagpabiling nagbilar uban sa hingpit nga paglaom nga ang iyang Anak sa dili madugay mabanhaw.
Sumala sa tradisyon, ang mga Sabado sulod sa tuig liturhiko gipahinungod sa Mahal nga Birheng Maria. Kining karaang tradisyon mitungha sa usa ka bahin tungod sa pagtuo nga, samtang ang uban napuno sa kahadlok ug kalibog, ang Inahang Maria nagpabiling nagbilar sa Sabado Santo, nga mainampuong nagpaabot sa pagkabanhaw ni Jesus. Nasayod siya nga mabanhaw ang iyang Anak. Naglaom siya bisan daw wala nay ikalaom. Lig-on ang iyang pagtuo. Ang iyang gugma nagpadayon kaniya sa pagbilar samtang nagpaabot siya sa pagbalik sa iyang Anak.
Sulod sa daghang siglo, adunay nagpahayag nga ang unang tawo nga gipakitaan ni Jesus human sa Iyang Pagkabanhaw mao ang Iyang kaugalingong inahan. Mituo niini si Santo Papa Juan Pablo II. Mituo usab niini si San Ignacio de Loyola. Ug daghan pang uban sa milabayng mga siglo ang adunay samang pagtuo.
Tungod niini, ang Sabado Santo usa ka haom kaayong adlaw aron mamalandong sa mapamalandongong kasingkasing sa atong Mahal nga Inahan. Sa pipila ka higayon sa Balaang Kasulatan, gisultihan kita nga ang Inahang Maria namalandong sa iyang kasingkasing sa mga misteryo sa kinabuhi sa iyang Anak. Usa siya sa pipila nga nagpabilin sa Iyang kiliran sa Iyang pag-antos ug kamatayon. Nagbarog siya atubangan sa Krus ug mainampuong namalandong sa Iyang hingpit nga halad. Gikugos sa Mahal nga Inahan ang Iyang patay nga lawas ug gipamalandongan kon asa miadto ang Iyang espiritu. Ug karon nagpabilin siyang nagbilar, nga namalandong sa Iyang nagkaduol nga pagbalik ngadto kaniya.
Pamalandongi ang iyang mapamalandongong kasingkasing. Paningkamoti nga mahiusa ang imong kaugalingong kasingkasing sa iyang kasingkasing. Paningkamoti nga masabtan ang iyang gihunahuna ug gilaoman. Paningkamoti nga mabati ang iyang gibati niining masulob-ong adlaw. Paningkamoti nga masinati ang iyang pagtuo, ang iyang pagsalig ug ang iyang malipayong pagpaabot.
Daghan kaayong tawo niining kalibotana ang nagkinabuhi diha sa kawalay paglaom ug kalibog. Daghan na ang nawad-an sa paglaom sa bag-ong kinabuhi nga nagpaabot kanila. Daghan ang nakasinati sa ilang kaugalingong matang sa kamatayon sa sulod sa ilang kalag nga wala motugot sa Dios sa pagdala kanila ngadto sa Iyang Pagkabanhaw. Daghan kaayong tawo karon ang nanginahanglan sa paglaom nga buhi kaayo diha sa kasingkasing sa atong Mahal nga Inahan niadtong unang Sabado Santo.
Niining adlawa, pamalandongi sa kahilom ang kamatuoran sa Sabado Santo ug tugoti ang mahimayaong kasingkasing sa atong Mahal nga Inahan sa pagdasig kanimo ug sa pagdani kanimo ngadto sa mas lawom nga pagpakig-ambit sa iyang kinabuhi sa pagtuo, paglaom ug gugma.
Minahal kaayong Inahang Maria, niadtong unang Sabado Santo, nagbilar ka alang sa imong Anak. Gitugotan nimo nga motubo diha kanimo ang balaang gasa sa paglaom, ug gitugotan nimo nga kana nga paglaom mahimong imong kusog taliwala sa kalisang sa Krus. Iampo ako aron akong mapamalandongan ang imong matahom nga kasingkasing niining adlawa aron ako usab mapuno sa paglaom samtang nag-agwanta ako sa mga hagit niining yutan-ong kinabuhi. Hatagi ako og kasingkasing nga malipayong nagpaabot samtang naghulat ako sa grasya sa bag-ong kinabuhi nga hilabihang gitinguha sa atong Ginoo nga ihatag kanako. Inahang Maria, iampo ako. Jesus, misalig gayod ako Kanimo.
Ikaduhang Adlaw: Nobena isip pagpangandam alang sa Domingo sa Balaang Kalooy
Pag-ampo ug pamalandong alang sa Sabado Santo
Rosaryo – Mga Misteryo sa Kasakit (uban sa Balaang Kasulatan)
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapilian sa mga Basahon sa Misa
Mga Santos/Kasaulogan Karong Adlawa
Pangandam alang sa Pasko sa Pagkabanhaw!

Adlaw-adlaw nga Katolikong mga Pamalandong:
Panahon sa Pasko sa Pagkabanhaw 2021
Adlaw-adlaw nga mga Pamalandong sa Diyosnong Kalooy:
365 ka Adlaw Uban ni Santa Faustina




