Cebuano

Misubang ang Bag-ong Adlaw – Domingo sa Pagkabanhaw

Abril 4, 2021

Domingo sa Pagkabanhaw—Dakong Kapistahan (Tuig B)

Mga Pagbasa Karong Adlawa

Bidyo

Mao kini ang adlaw nga gibuhat sa Ginoo; magsadya ug magkalipay kita. (tan-awa ang Salmo 118)

Nagsugod na ang atong pagsaulog sa Pagkabanhaw!  Malipayong Pasko sa Pagkabanhaw!

Sa daghang bahin sa kalibotan, ang Pasko sa Pagkabanhaw matunong sa tingpamulak.  Niining panahona sa tuig, ang kinaiyahan mismo nagpakita sa unang mga timailhan sa bag-ong kinabuhi.  Ang mga tulip magsugod sa pagturok gikan sa bugnaw ug daw natulog nga yuta, ang bag-ong mga dahon manurok sa mga kahoy ug maghimo sa kalasangan nga daw dagat sa lunhaw, ug ang adlaw mosidlak sa bag-ong kahayag, nga magdalag kainit inigsubang niini matag buntag.  Sa daghang paagi, ang kabuhatan mismo nagpakita sa himaya ug katahom sa Pagkabanhaw ni Kristo.

Ang pagkam patay sa kinaiyahan panahon sa tingtugnaw nagpahinumdom sa kamatayon ni Kristo ug sa kahilom sa lubnganan nga atong nasinati sa Sabado Santo.  Ang tanan daw nangatulog.  Ang mga tanom daw nangamatay, ug bisan ang mga mananap ug mga insekto mangatagô; ang uban mangatulog sa tibuok tingtugnaw, ug ang uban dili molihok.  Apan sa gitakdang panahon, sa pagbalik sa kainit sa adlaw, ang kinaiyahan mismo gitawag sa paggula gikan sa kamatayon sa tingtugnaw ngadto sa bag-ong kinabuhi sa tingpamulak.

Makapasubo kaayo kon ang grabeng katugnaw sa tingtugnaw dili na gayod matapos.  Handurawa nga sultihan kita sa mga siyentipiko nga lahi ang umaabot nga tingtugnaw kay magpadayon na kini hangtod sa hangtod.  Dili na gayod nato mabati pag-usab ang kainit sa tingpamulak o sa ting-init.  Dili na gayod kita makakita pag-usab og mga insekto, mga tanom ug mga dahon sa mga kahoy.  Daw wala na gayoy paglaom kon mahitabo kana!

Apan ang Diyos nakigsulti kanato sa daghan ug nagkalainlaing paagi, ug usa niini mao ang pagsunodsunod sa mga panahon sa kinaiyahan.  Segurado nga motungha ang bag-ong kinabuhi!  Mobalik ang kainit human sa kagrabe sa katugnaw, mabuhi pag-usab ang kinaiyahan ug moawit pag-usab ang yuta.

Kon ingon niana kaamomahon ang Amahan sa Langit sa kinaiyahan nga iyang gilalang, dili ba mas labaw pa ang iyang pag-atiman sa paglalang pag-usab sa katawhan?  Dili ba mas labaw pa ang iyang pagtagad sa Pagkabanhaw sa iyang kaugalingong Anak nga Diyos?  Ug dili ba mas labaw pa ang iyang pag-atiman aron makasulod kita sa bag-ong kinabuhi nga naangkon alang sa matag usa kanato pinaagi sa Pagkabanhaw ni Hesukristo gikan sa mga patay?!

Tugoti nga ang katahom sa kabuhatan mahimong ilhanan alang kanimo sa usa ka kamatuoran nga labaw pa sa dili matukib nga sukod.  Tugoti nga madala ka ngadto sa bag-ong kinabuhi nga gihatag kanimo pinaagi sa imong pag-ambit sa Pagkabanhaw ni Kristo.  Ang pagkabanhaw uban kaniya nagpasabot nga mahimo kang bag-ong binuhat.

Pamalandonga karon ang linya sa Salmo sa Tubag sa Misa karong adlawa nga gihisgotan sa ibabaw.  “Mao kini ang adlaw nga gibuhat sa Ginoo; magsadya ug magkalipay kita.”  Ang “adlaw” nga atong gikalipay mao ang bag-ong kinabuhi nga gustong ihatag sa Diyos sa imong kalag dinhi ug karon.  Bag-o kini nga adlaw, mahimayaon, nabag-o, ug nabanhaw.  Kinahanglang magsugod karon ang bag-ong kinabuhi ug magpadayon sa pagkabag-o ug pagkahimaya samtang nagkaduol pa kita sa kahingpitan sa himaya sa Pagkabanhaw.  Pamalandonga kining “bag-ong adlaw” ug tugoti ang atong Ginoo sa paghatag niini kanimo pinaagi sa gahom sa iyang mahimayaong Pagkabanhaw gikan sa mga patay.

Ginoo kong nabanhaw, anaa Kanimo ang akong paglaom!  Aleluya, buhi Ka ug gibuntog Mo ang tanang sala, ang kamatayon ug ang tanang daotan.  Naghatag Ka og bag-ong kinabuhi sa tanang modangop Kanimo sa ilang panginahanglan.  Hesus ko, modangop ako Kanimo ug itugyan ko ang akong kaugalingon Kanimo diha sa Imong kamatayon aron mabanhaw ako uban Kanimo ngadto sa bag-ong kinabuhi diha sa Imong Pagkabanhaw.  Ginhawahi ako niining gasa sa bag-ong kinabuhi ug tugoti ako nga makasugod pag-usab.  Hesus, misalig ako Kanimo.

Dugang pa alang sa Pasko sa Pagkabanhaw

Ikatulong Adlaw: Nobena sa pagpangandam alang sa Domingo sa Balaang Kalooy

Mapamalandongong pag-ampo alang sa Pasko sa Pagkabanhaw

Rosaryo – Mga Misteryo sa Himaya (uban sa Balaang Kasulatan)

Dugang nga mga Pamalandong sa Ebanghelyo

Adlaw-adlaw nga mga Pamalandong sa Diosnong Kalooy

Litaniya sa Diosnong Kalooy ni Santa Faustina

Pagsalig sa Diosnong Kalooy

Pag-ampo alang sa Tuig sa Kalooy

Koronilya sa Diosnong Kalooy

Mga Kapilian sa mga Basahon sa Misa

Tanang Santos/Mga Kapistahan

Santo sa Adlaw – San Isidoro, Obispo ug Doktor sa Simbahan
(Dili kini saulogon isip liturhikanhong handumanan karong tuiga kay natunong kini sa Domingo sa Pagkabanhaw)

Hulagway sa ibabaw: Ang Pagkabanhaw ni Carl Heinrich Bloch


Mga Libro para sa Pasko sa Pagkabanhaw!

Adlaw-adlaw nga Katolikong mga Pamalandong:
Panahon sa Pasko sa Pagkabanhaw 2021

Adlaw-adlaw nga mga Pamalandong sa Diyosnong Kalooy:
365 ka Adlaw Uban ni Santa Faustina