Pagkat-on sa Pinulongan sa Dios

April 27, 2021
Tuesday of the Fourth Week of Easter
Readings for Today

Bidyo

Si Jesus naglakaw-lakaw sa dapit sa templo, sa Portiko ni Solomon. Busa gilibotan Siya sa mga Judio ug giingnan, “Hangtod kanus-a Mo kami pasagdan nga maglibog? Kon Ikaw ang Kristo, sultihi kami sa dayag.” Gitubag sila ni Jesus, “Gisultihan Ko na kamo, apan wala kamo motuo.”  John 10:24–25

Ngano man nga wala kining mga tawhana makaila nga si Jesus mao ang Kristo? Buot nila nga mosulti si Jesus kanila “sa dayag,” apan gipakurat sila ni Jesus sa pag-ingon nga gitubag na Niya ang ilang pangutana apan sila “wala motuo.” Kining teksto sa Ebanghelyo nagpadayon sa matahom nga pagtulon-an bahin kang Jesus isip Maayong Magbalantay. Makapainteres nga buot niining mga tawhana nga mosulti si Jesus sa dayag kon Siya ba ang Kristo o dili, apan hinuon, si Jesus misulti sa dayag nga wala sila motuo Kaniya tungod kay wala sila mamati. Wala nila masabti ang Iyang gisulti ug nagpabilin silang naglibog.

Usa sa gitudlo niini kanato mao nga ang Dios nakigsulti kanato sa Iyang kaugalingong paagi, dili gayod kanunay sa paagi nga gusto natong Iyang gamiton. Siya nagsulti sa usa ka mistiko, lawom, malumo ug tinagong pinulongan. Iyang gipadayag ang Iyang labing lawom nga mga misteryo ngadto lamang sa mga nakakat-on sa Iyang pinulongan. Apan kadtong wala makasabot sa pinulongan sa Dios malibog.

Kon moabot ang higayon nga maglibog ka sa kinabuhi, o maglibog bahin sa plano sa Dios alang kanimo, tingali panahon na nga susihon nimo kon unsa ka matinagdanon ang imong pagpamati sa paagi sa pagsulti sa Dios. Mahimo kitang mangamuyo sa Dios, adlaw ug gabii, nga “mosulti sa dayag” kanato, apan mosulti lamang Siya sa paagi nga sukad pa Iya nang gigamit. Ug unsa man kana nga pinulongan? Sa labing lawom nga ang-ang, mao kini ang pinulongan sa pag-ampo nga gibubo sa Dios sa kalag.

Siyempre, ang pag-ampo lahi kay sa yano lamang nga paglitok sa mga pag-ampo. Ang pag-ampo, sa kinauyokan niini, usa ka relasyon sa gugma uban sa Dios. Usa kini ka pagpakigsulti sa labing lawom nga ang-ang. Ang pag-ampo usa ka buhat sa Dios sulod sa atong kalag diin gidapit kita sa Dios sa pagtuo Kaniya, sa pagsunod Kaniya, ug sa paghigugma Kaniya. Kining pagdapit kanunay nga gitanyag kanato, apan sa kasagaran dili nato kini madungog tungod kay wala kita tinuod nga mag-ampo.

Dakong bahin sa Ebanghelyo ni Juan, lakip ang Kapitulo Napulo diin gikuha ang atong gibasa karong adlawa, nagsulti sa mistikong paagi. Dili mahimo nga basahon lamang kini sama sa usa ka nobela ug masabtan ang tanan nga gisulti ni Jesus sa usa lamang ka pagbasa. Ang pagtulon-an ni Jesus kinahanglang paminawon diha sa imong kalag uban sa pag-ampo, palandongon, ug paminawon pag-usab. Kining paagiha moabli sa mga dalunggan sa imong kasingkasing aron makaila ka sa tingog sa Dios uban sa kasigurohan.

Pamalandongi karong adlawa ang misteryosong mga paagi sa pagpakigsulti sa Dios kanimo. Kon wala ka makasabot kon giunsa Niya pagsulti, nan maayong sinugdanan kana. Hatagi og panahon kining Ebanghelyo, nga palandongon kini uban sa pag-ampo. Pamalandongi ang mga pulong ni Jesus, nga namati sa Iyang tingog. Kat-oni ang Iyang pinulongan pinaagi sa hilom nga pag-ampo ug tugoti nga ang Iyang balaang mga pulong modani kanimo ngadto Kaniya.

Akong misteryoso ug tinagong Ginoo, nakigsulti Ka kanako adlaw ug gabii ug kanunay Mong gipadayag ang Imong gugma kanako. Tabangi ako nga makakat-on sa pagpamati Kanimo aron molalom ang akong pagtuo ug tinuod nga mahimong Imong sumusunod sa tanang paagi. Jesus, misalig ako Kanimo.

Mga Pag-ampo sa Pasko sa Pagkabanhaw

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Featured images above: Jesus Walks in the Portico of Solomon By James Tissot