Friday, May 14, 2021
Feast of Saint Matthias, Apostle, May 14
Paminaw sa Iningles
It was not you who chose me, but I who chose you and appointed you to go and bear fruit that will remain, so that whatever you ask the Father in my name he may give you. John 15:16
Human luibi ni Judas ang atong Ginoo, nagtigom ang mga Apostoles aron mopili ug mopuli kaniya. Nagkauyon sila nga kinahanglan usa siya sa mga kauban nila sukad sa sinugdanan. Nag-ampo sila alang sa giya ug nagripa, “ug ang ripa nahulog kang Matias, ug siya giisip nga kauban sa Napulog Usa ka Apostoles” (Acts 1:26).
Gamay ra ang nahibaloan mahitungod sa ministeryo ni San Matias. Ang iyang pagkapili isip usa sa Napulog Duha naghimo kaniya nga usa ka obispo sa unang Simbahan. Sumala sa nagkalainlaing tradisyon, nagsangyaw siya sa teritoryo nga karon mao ang Etiopia, Turkey o Georgia—tingali sa tanan niining mga dapita. Gituohan nga gipatay siya tungod sa iyang pagtuo, pinaagi sa pagbato o pagpunggot sa ulo o sa duha, maong gipasidunggan siya karon isip usa ka martir.
Sa atong pagpasidungog kang San Matias, dili lamang usa ka tawo nga nahimong Apostol ug nagsangyaw sa Ebanghelyo pinaagi sa iyang kinabuhi ang atong gipasidunggan, kondili usab ang balaang plano diin gipili sa Dios nga gamiton ang mahuyang ug mapaubsanong mga galamiton aron mapalapad ang Iyang Gingharian. Ang teksto sa Ebanghelyo sa ibabaw tukma gayod kang San Matias, maingon man kanatong tanan sa lainlaing sukod. Ang Dios mao ang “nagpili” kang San Matias, maingon man sa matag usa kanato, aron kita manglakaw ug “mamunga ug bunga nga magpabilin.” Apan kining matang sa maayong bunga, ang bunga nga adunay mga sangpotanan alang sa kahangtoran, mamunga lamang kon pangayoon nato kini sa Amahan sa ngalan sa Iyang Anak nga si Jesus.
Ang pagpangayo sa Amahan nga magpatungha ug maayong bunga pinaagi kanato sa ngalan ni Jesus nga Iyang Anak wala magpasabot nga kita maoy magbuot kon unsa ang atong pangayoon sa Amahan. Hinuon, ang pagpangayo “sa ngalan ni Jesus” kinahanglang sabton nga ang atong pangayoon sa Amahan mao lamang ang gipangayo sa Anak. Gipili nato ang pagpakig-ambit sa usa ug walay kataposang pag-ampo sa Anak nga matuman ang kabubut-on sa Amahan. Ug sa pag-ampo niining paagiha, gitugyan nato ang atong kaugalingon sa pagpakighiusa sa Iyang balaang kabubut-on.
Usahay, makaplagan nato ang atong kaugalingon nga nangayo sa Dios niining maong pabor o nianang lain. Mahimo natong idangat Kaniya ang atong mga gusto ug ang atong kabubut-on. Apan kon buot natong magpagamit sa Dios, nga mahimong galamiton sa Iyang grasya aron mamunga ug daghang maayong bunga, kinahanglan mapaubsanon natong isalikway ang atong kaugalingong kabubut-on ug tugotan ang Dios nga maoy mopili sa atong misyon ug motudlo kanato sa Iyang balaang buluhaton. Ang dili pagkagapos sa atong kaugalingong kabubut-on ug ang mapaubsanong pagpasakop sa kabubut-on sa Dios mao lamang ang paagi aron mapatungha ang Gingharian sa Dios.
Pamalandongi karon ang pagpili sa Dios sa pagtawag kanimo sa pagpakig-ambit sa Iyang balaang misyon. Ang paagi sa Iyang pagtawag anaa ra sa Dios, apan makasiguro ka nga gitawag ka Niya ug gidapit sa pagpakig-ambit sa Iyang misyon. Buksi ang imong kaugalingon sa bisan unsang paagi nga itudlo sa Dios kanimo aron mamunga ug maayong bunga, ug mapaubsanong paningkamoti nga ipahiuyon ang imong kabubut-on sa plano sa Amahan samtang nag-ampo ka sa balaang ngalan ni Jesus.
Ginoong Jesus, hingpit Mong gituman ang kabubut-on sa Amahan sa tanang butang, ug gipili ug gitudlo Mo ako sa pagpakig-ambit sa Imong balaang misyon. Tabangi ako sa pag-abli sa akong hunahuna ug kabubut-on ngadto sa tanan nga Imong gitawag kanako nga buhaton, aron ako usab mahimong galamiton sa Gingharian sa Imong Amahan sa Langit. Gihalad ko kining pag-ampo sa Imong labing balaang ngalan. Jesus, nagsalig ako Kanimo.
Novena to the Holy Spirit
Prayed in preparation for Pentecost
Day One – Friday, May 14
Mga Pag-ampo sa Pasko sa Pagkabanhaw
Dugang nga mga Pamalandong sa Ebanghelyo
Mga Pamalandong sa Diosnong Kalooy
Saint of the Day – Saint Matthias the Apostle
Mga Kapilian sa mga Basahon sa Misa
Featured image above: St. Matthias By Robert van der Hoecke, via Wikimedia Commons
_Robert_van_den_Hoecke,_(1622-68)_Musee_Municipal,_Bergues.jpg){kind=link}