Agosto 2, 2021
Lunes sa Ikanapulog Walo nga Semana sa Ordinaryong Panahon (Mga Tuig B&C)
Mga Pagbasa Karong Adlawa
San Eusebio sa Vercelli, Obispo—Opsiyonal nga Paghandum
San Pedro Julian Eymard, Pari—Opsiyonal nga Paghandum
Paminaw sa Iningles
Sa pagkadungog ni Jesus sa kamatayon ni Juan Bautista, misakay Siya sa usa ka sakayan ug miadto sa usa ka mingaw nga dapit aron mag-inusara. Sa pagkadungog niini sa mga panon sa katawhan, mibiya sila sa ilang mga lungsod ug misunod Kaniya nga naglakaw. Sa pagkanaog Niya sa sakayan ug pagkakita sa dakong panon sa katawhan, naluoy Siya kanila ug giayo Niya ang ilang mga masakiton. Mateo 14:13–14
Isip tawo, nasubo ang kasingkasing ni Hesus sa kamatayon ni Juan Bautista. Gihigugma Niya si Juan ug nasubo Siya pag-ayo sa pagputol sa ulo niini. Busa misakay Siya sa usa ka sakayan ug milain ngadto sa usa ka mingaw nga dapit aron mag-inusara. Apan ang katawhan nangandoy pa gayod ug dugang! Gusto nilang makita si Hesus ug maminaw Kaniya. Daghan silag nailhang mga masakiton ug gusto nilang ayohon sila ni Hesus. Busa gipangita nila Siya bisan pa nga milain Siya gikan sa panon aron mag-inusara.
Unsa man ang tubag ni Hesus? Gitan-aw ba Niya sila ug nanghupaw, nga nag-ingon sa Iyang kaugalingon, “Nganong dili man Ko nila pasagdan nga mag-inusara? Wala ba sila mahibalo nga nagbangotan Ako?” Wala. Hinuon, napuno si Hesus sa kalooy ug pagmalasakit alang kanila, ug miduol Siya kanila aron ayohon ang daghan sa ilang mga masakiton.
Naghatag kini kanato ug pagsabot sa kasingkasing ug pagkamaluluy-on sa atong Ginoo. Sa makadaghang higayon, mahadlok kitang moduol sa Dios. Mahadlok kitang modangop Kaniya tungod sa atong sala. Mahadlok kita sa Iyang hunahunaon ug isulti kanato. Mabug-atan kita sa pagbati sa pagkasad-an ug kaulaw ug, tungod niini, dili nato Siya pangitaon.
Apan maingon nga naluoy si Hesus niadtong nangita Kaniya niini nga asoy, KANUNAY usab Siyang adunay labing lawom nga kalooy alang kanato sa matag higayon nga mangita kita Kaniya. Kon makita nato nga nalubog sa sala ang atong kinabuhi, apan modagan gihapon kita ngadto Kaniya, tan-awon kita Niya uban sa pagmalasakit ug kalooy. Dili gayod Siya kapoyan sa atong pagbalik Kaniya aron mangayo sa Iyang pag-ayo ug kalooy. Kinahanglan kanunay kitang maglaom Kaniya ug modangop Kaniya uban sa labing dakong pagsalig.
Pamalandongi karong adlawa kon unsa ka kagawasnon nga modangop kang Hesus sa imong kahimtang karon. Nahadlok ka ba o nabalaka sa Iyang hunahuna mahitungod kanimo? Naulaw ka ba sa imong sala o kahuyang? Nabalaka ka ba nga hukman ka Niya ug dili ka Niya tagdon? Salig sa Iyang madagayaong kalooy ug dagan ngadto Kaniya nga walay kahadlok.
Ginoo, tabangi ako sa pagsalig sa Imong gugma ug kalooy. Tabangi ako nga masayod nga kanunay Kang nangandoy nga moduol ako Kanimo. Ingon nga dili Ka gayod kapoyan sa akong pagduol Kanimo, hinaot nga dili usab ako kapoyan sa pagduol Kanimo. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos sa Adlaw –
San Eusebio sa Vercelli, Obispo—Opsiyonal nga Paghandum
San Pedro Julian Eymard, Pari—Opsiyonal nga Paghandum
Mga Kapilian sa mga Basahon sa Misa
