Mituo Na Kami

Agosto 22, 2021
Ika-21 nga Domingo sa Ordinaryong Panahon (Tuig B)
Mga Pagbasa Karong Adlawa

Paminaw sa Iningles

Tungod niini, daghan sa iyang mga tinun-an ang mibalik sa ilang kanhing paagi sa pagkinabuhi ug wala na mouban kaniya. Unya miingon si Jesus sa Napulog Duha, “Gusto ba usab ninyong mobiya?” Si Simon Pedro mitubag kaniya, “Ginoo, kang kinsa man kami moadto? Anaa kanimo ang mga pulong sa kinabuhing walay kataposan. Mituo na kami ug nasiguro namo nga ikaw ang Balaan sa Dios.” Juan 6:66–69

Tungod sa unsa? Tungod sa pagtulon-an ni Jesus bahin sa Eukaristiya, “daghan sa iyang mga tinun-an ang mibalik sa ilang kanhing paagi sa pagkinabuhi ug wala na mouban kaniya.” Ang Eukaristiya mao ang labing lawom ug labing matahom nga pagtulon-an nga gihatag ni Jesus, apan alang sa uban, lisod kaayo kini dawaton. Busa daghan ang mibiya Kaniya. Apan kini nga teksto nagpadayag usab sa matahom nga pagtuo sa mga Apostoles, ilabina ni Pedro.

Una sa tanan, si Jesus wala gayod moatras sa Iyang matahom ug lawom kaayong pagtulon-an bahin sa Balaang Eukaristiya. Iyang gibarogan ang Iyang giingon, nga “gawas kon mokaon kamo sa unod sa Anak sa Tawo ug moinom sa iyang dugo, wala kamoy kinabuhi diha kaninyo” (Juan 6:53). Nagpadayon Siya sa pag-ingon, “Kay ang akong unod tinuod nga pagkaon ug ang akong dugo tinuod nga ilimnon” (Juan 6:55).

Human niana, miatubang si Jesus sa Iyang mga tinun-an ug gihatagan sila sa kagawasan sa pagdawat o pagsalikway sa bag-o pa Niyang gitudlo. Kining kagawasan nga Iyang gihatag kanila gikinahanglan aron sila makasulod sa matuod nga pagtuo. Kon gipugos o gimanipula pa ni Jesus ang mga tinun-an, malisdan sila sa gawasnong pagpili sa pagdawat Kaniya ug sa tanan Niyang gitudlo.

Mao usab kini alang kanato. Wala kita obligaha ni Jesus sa pagsunod Kaniya. Dili kita Niya puwersahon o manipulahon aron motuo. Dili kita Niya pugson. Hinunoa, gitanyag ni Jesus ang Iyang kaugalingon ug ang Iyang mga pagtulon-an ug gidapit kita sa pagtuo.

Niining kahimtanga, si Pedro mihimo og usa ka lawom nga pahayag sa pagtuo. “Ginoo, kang kinsa man kami moadto?” Sa laing pagkasulti, mao kini ang buot ipasabot ni Pedro, “Ginoo, bisan kon lisod dawaton ang pagtulon-an, ug bisan kon dili inila sa kadaghanan ang pagsunod kanimo, ug bisan kon kinahanglan kaming mag-antos, isalikway, ug dili sabton…ikaw ang labing maayong kapilian.” Hunahunaa kini. Unsa pa mang laing kapilian ang makatupong sa pagdawat sa bug-os ug lawom nga mga pagtulon-an ni Jesus? Mas maayo ba nga bahin lamang sa Iyang gisulti ang dawaton? Ang pagbuhat niana usa ka matang sa pagsalikway Kaniya.

Gihatagan kita ni Pedro sa pagpamatuod sa usa ka tawo nga mituo na nga usa ra ang maayong kapilian sa kinabuhi. Kana nga kapilian mao ang pagsunod kang Jesus bisan unsa pay mahitabo. Walay bisan unsa sa kinabuhi nga angay pilion labaw kang Kristo. Kinahanglan maningkamot kita sa pagdiskobre niining kamatuoran nga Siya lamang ang takos pilion.

Pamalandongi karon kining mga pulong ni Pedro. “Ginoo, kang kinsa man kami moadto?” Si Jesus mao ang Dios, ang Mesiyas ug Manluluwas. Anaa Kaniya ang mga pulong sa kinabuhing walay kataposan. Siya ang labing maayong “kapilian.” Isulti kadtong mga pulong ni Pedro ug, samtang gisulti mo kini, hukmi nga pilion Siya bisan kon gidawat ba o wala sa kadaghanan kana nga pagpili ug bisan kon gipili ba usab Siya sa uban o wala. Ang pagsunod lamang sa sulog magdala kanato ngadto sa sayop nga suba. Ang paghimo sa hustong pagpili magpahimutang kanato sa lig-ong yuta.

Ginoo, wala na akoy laing kadangpan gawas Kanimo ug sa Imong dalan. Ikaw ang Ginoo sa tanan, ug Ikaw ang Mesiyas. Gipili ko Ikaw ug gidawat ko ang tanan Nimong gitudlo. Jesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Pamalandong sa Balaang Kasulatan alang sa Panahon sulod sa Tuig

Tanang Santos/Mga Kapistahan

Santos sa Adlaw – Pagkah rayna sa Bulahang Birhen Maria
Dili saulogon isip liturhikanhong handumanan karong tuiga kay natunong kini sa Domingo

Mga Kapilian sa mga Basahon sa Misa

Gipiling hulagway sa ibabaw: Ang Pagtawag kang San Pedro ug San Andres ni Juan de las Roelas, pinaagi sa Web Gallery of Art

BAG-O!
Ang mga pamalandong alang sa Septiyembre–Nobiyembre anaa na sa eBook & paperback nga pormat.