Ang Pinakaimportanteng Butang sa Kinabuhi

Septiyembre 9, 2021
Huwebes sa Ika-Kawhaan ug Tulo nga Semana sa Ordinaryong Panahon
Mga Pagbasa Karong Adlawa

San Peter Claver, Pari—Handumanan sa USA

Bidyo

Paminaw sa Iningles

Sa tawo nga mosagpa sa usa nimo ka aping, itanyag usab ang pikas, ug sa tawo nga mokuha sa imong kupo, ayaw ihikaw bisan ang imong tunika. Hatagi ang matag tawo nga mangayo kanimo, ug ayaw bawia gikan sa tawo ang iyang gikuha nga imo. Lucas 6:29–30

Lagmit nakapakurat gayod kini sa unang mga tinun-an ni Jesus. Una sa tanan, hinumdomi nga gitudlo ni Jesus kining mga pulonga uban sa espirituhanong awtoridad nga nakapakombinsir sa mga tawo nga bukas og kasingkasing nga kamatuoran ang Iyang gitudlo. Hinumdomi usab nga gitudlo ni Jesus kining lawom nga espirituhanong mga leksiyon samtang naghimo Siya og daghang milagro. Busa, tungod niini, nahibaloan unta sa Iyang bag-ong mga sumusunod nga tinuod ang gitudlo ni Jesus. Apan sa unsang paagi nila hingpit nga madawat ang maong mga pagtulon-an?

Bisan tuod daghang mga tighubad ang mosulay sa pagpatin-aw sa mas lawom nga espirituhanong mga prinsipyo nga gitudlo ni Jesus, sulayi una ang pagdawat sa Iyang mga pulong sumala sa ilang dayag nga kahulogan. Miingon gayod Siya nga kinahanglan nimong itanyag ang pikas aping sa tawo nga mosagpa kanimo, ihatag ang imong tunika sa tawo nga mangawat sa imong kupo, ug hatagan ang matag tawo nga mangayo kanimo, nga dili gayod bawion ang bisan unsang gikuha sa uban gikan kanimo. Dili sayon dawaton kining mga leksiyona!

Usa sa gitudlo kanato niining gamhanang mga leksiyon mao nga adunay butang nga mas importante kaayo sa kinabuhi kaysa kaulaw sa pagsagpa sa imong aping ug sa pagkawat sa imong mga kabtangan. Unsa man kanang mas importanteng butang? Mao kini ang kaluwasan sa mga kalag.

Kon magkinabuhi kita nga kanunayng mangayo og kalibotanong hustisya ug balos sa mga sayop nga gibuhat batok kanato, dili kita makapunting sa pinakaimportante. Dili kita makapunting sa kaluwasan niadtong nakasala kanato. Sayon ang paghigugma niadtong maayo kanato. Apan ang atong gugma kinahanglan moabot ngadto sa tanan, ug usahay ang matang sa gugma nga kinahanglan natong itanyag sa uban mao ang kinabubut-ong pagdawat sa mga inhustisya nga ilang gibuhat batok kanato. Adunay dakong gahom niining buhat sa gugma. Apan makahigugma lamang kita sa uban niining paagiha kon ang atong lawom nga tinguha mao ang ilang walay kataposang kaluwasan. Kon ang atong bugtong gusto mao ang kalibotanong hustisya ug katagbawan tungod sa mga sayop nga nabuhat, mahimong makab-ot nato kana. Apan mahimong ang ilang kaluwasan ang mabaylo niini.

Usahay malit-agan kita sa paghunahuna nga ang matag sayop kinahanglan matul-id dinhi ug karon dayon. Apan klaro nga dili kana ang gitudlo ni Jesus. Mas lawom pa kaayo ang Iyang kaalam. Nasayod Siya nga ang usa ka kinasingkasing nga buhat sa kalooy ug pagpasaylo sa uban, ilabi na kon gipasakitan kita nila pag-ayo, maoy usa sa labing dakong mga gasa nga atong ikahatag. Ug usa usab kini sa mga buhat nga labing makapausab sa atong kaugalingong mga kalag. Kon ang paghigugma makapasakit, tungod kay nagkinahanglan kini nga biyaan nato ang atong kalibotanong garbo, ilabi na pinaagi sa hingpit nga pagbuhi sa inhustisya nga atong nasinati, nan ang atong buhat sa gugma alang nianang tawhana adunay dakong gahom sa pag-usab kaniya. Ug kon kana nga buhat makapausab kaniya, nan kini mahimong hinungdan sa imong kalipay hangtod sa kahangtoran.

Pamalandongi karong adlawa kon sa unsang paagi kining lisod nga pagtulon-an ni Jesus malisod alang kanimo. Kinsa ang mosantop sa imong hunahuna samtang namalandong ka niini? Mosukol ba ang imong mga pagbati batok niining sugo ni Jesus sa paghigugma? Kon mao, nan imong nakaplagan ang piho nga bahin sa imong kinabuhi diin gusto sa Diyos nga motubo ka. Hunahunaa ang bisan kinsa nga imong gidumtan ug pamalandongi kon gitinguha ba nimo ang iyang dayong kaluwasan. Hibaloi nga magamit ka sa Diyos alang niining misyon sa gugma kon mohigugma ka sa paagi nga gisugo sa atong Ginoo.

Akong maluluy-ong Ginoo, ang Imong gugma labaw pa sa akong kaugalingong katakos sa pagsabot. Ang Imong gugma hingpit ug kanunayng nagtinguha sa kaayohan sa uban. Hatagi ako sa grasya, minahal nga Ginoo, nga mohigugma uban sa Imong kasingkasing ug mopasaylo sama sa gidak-on sa Imong pagpasaylo. Gamita ako, ilabina, aron mahimong instrumento sa kaluwasan ug kalooy alang niadtong labing nanginahanglan niini sa akong kinabuhi. Jesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Pamalandong sa Balaang Kasulatan alang sa Panahon sulod sa Tuig

Tanang Santos/Mga Kapistahan

Santos sa Adlaw – San Peter Claver, Pari

Mga Kapilian sa mga Basahon sa Misa

Pangunang hulagway sa ibabaw: Wali sa Bukid ni I.Makarov, pinaagi sa Wikimedia Commons

BAG-O!
Ang mga pamalandong alang sa Septiyembre–Nobiyembre anaa na sa eBook & paperback nga pormat.