Septiyembre 18, 2021
Sabado sa Ikakawhaag-upat nga Semana sa Ordinaryong Panahon
Mga Pagbasa Karong Adlawa
Paminaw sa Iningles
“Ang adunay mga dalunggan nga ikadungog, angay mamati.” Lucas 8:8
Kining mubo nga mga pulong, sa usa ka pagsabot, usa ka katingbanan sa Sambingay sa Magpupugas. Kini nga sambingay nagpakita kanato og upat ka nagkalainlaing paagi sa pagdawat sa Pulong sa Dios. Ang binhi nga gipugas mao ang Pulong sa Dios. Ang upat ka nagkalainlaing matang sa mga tawo gitandi sa binhi nga gipugas sa agianan, sa batoong yuta, taliwala sa mga tunok ug sa maayong yuta.
Gipasabot ni Jesus nga ang binhi nga gipugas sa agianan mao kadtong “nakadungog, apan moabot ang Yawa ug kuhaon ang pulong gikan sa ilang mga kasingkasing.” Ang binhi nga gipugas sa batoong yuta mao kadtong “modawat sa pulong uban sa kalipay, apan wala silay gamot; motuo lamang sila sa makadiyot ug mobiya sa pagtuo sa panahon sa pagtintal.” Ang binhi nga gipugas taliwala sa mga tunok mao kadtong nakadungog sa Pulong ug midawat niini, apan sa paglabay sa panahon sila “natuok sa mga kabalaka ug bahandi ug mga kalipayan sa kinabuhi, ug wala makapamunga og hingkod nga bunga.” Sa kataposan, kadtong sama sa tabunok nga yuta mao kadtong nakadungog sa Pulong ug “naghupot niini uban sa manggihatagon ug maayong kasingkasing, ug namunga pinaagi sa pagkamalahutayon.”
Sa imong pagtan-aw niining mga matanga sa mga tawo, asa ka nahisakop? Lagmit, kadtong mag-ampo matag adlaw ug maningkamot sa pagsunod sa atong Ginoo nahisakop sa usa sa kataposang duha ka matang. Timan-i nga alang niadtong sama sa binhi nga gipugas taliwala sa mga tunok ug niadtong gipugas sa tabunok nga yuta, adunay bunga nga motungha gikan sa Pulong sa Dios. Sa laing pagkasulti, tinuod nga nausab ang ilang kinabuhi ug aduna silay maayong ikatampo sa kalibotan tungod sa balaang Pulong sa Dios ug sa Iyang presensiya sa ilang kinabuhi. Apan ang kalainan mao nga kadtong nakigbisog sa “mga kabalaka ug bahandi ug mga kalipayan sa kinabuhi” dili makapamunga og “hingkod nga bunga.” Maayo kining pagtulon-an nga pamalandongan sa matinumanong mga Kristohanon.
Sa imong pagtan-aw sa imong kinabuhi, unsang matanga sa bunga ang imong makita? Ang “bunga” nga gihisgotan sa atong Ginoo mahimong ilhon diha sa mga bunga sa Espiritu: gugma, kalipay, kalinaw, pailob, pagkamabination, pagkamaayo, pagkamainantuson, pagkamalumo, pagtuo, kaligdong, pagpugong sa kaugalingon, ug kaputli. Busa, kon gusto nimong mailhan kon mas sama ka ba sa usa nga namunga og hingkod nga bunga o sa usa nga namunga og dili pa hingkod nga bunga, susiha pag-ayo kining balaang mga hiyas. Unsa ka “hingkod” ang matag usa niining mga bunga sa Espiritu nga buhi diha sa imong kinabuhi? Maayo kaayo kini nga mga sukdanan sa pagsusi sa tanlag alang niadtong gustong molalom pa labaw sa Napulo ka Sugo o sa Pito ka Pangunang Sala. Kon kining maayong mga bunga motungha sa imong kinabuhi sa tinuod nga hingkod nga paagi, makita unta nimo kon giunsa niini pagtandog ang uban pinaagi kanimo. Pananglitan, sa unsang paagi nakatabang sa uban ang imong pagkamabination, pailob, pagtuo ug pagpugong sa kaugalingon diha sa ilang paglakaw isip mga Kristohanon?
Pamalandongi karon ang mga bunga sa Espiritu. Susihon kini pag-ayo ug uban sa pag-ampo samtang imong gisusi ang imong kaugalingong kinabuhi. Kon makita nimo nga madagayaon kini, pagmaya ug pagpasalamat, ug paningkamoti nga mapalambo pa kini. Kon makita nimo nga kulang kini, pagmaya usab sa maong pagsabot ug hunahunaa kon nganong kulang kini. Aduna bay kalibotanong mga kabalaka, mga tinguha sa bahandi o mga kalipayan nga nakababag sa pagtubo niini? Paningkamoti nga mahimong tinuod nga tabunok nga yuta, ug ang atong Ginoo sa pagkatinuod magpatungha og daghang maayong bunga diha kanimo ug pinaagi kanimo.
Akong diosnong Magpupugas, madagayaon Mong gipugas ang hingpit nga mga binhi sa Imong Pulong. Palihog tabangi ako sa pag-abli sa akong kasingkasing aron modawat nianang Pulonga ug sa ingon mamunga kini og daghang maayong bunga. Palihog gawasa ako gikan sa mga kabalaka ug mga limbong sa kinabuhi aron madungog ko sa tin-aw ang Imong balaang Pulong ug maatiman kana nga Pulong diha sa akong kasingkasing. Nagmaya ako, minahal nga Ginoo, sa tanan nga Imong nabuhat ug padayong ginabuhat diha kanako ug pinaagi kanako. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
Gipiling hulagway sa ibabaw: Sambingay sa Magpupugas, gikan sa flickr
