Oktubre 15, 2021
Biyernes sa Ika-28 nga Semana sa Ordinaryong Panahon
Mga Pagbasa Karong Adlawa
Santa Teresa ni Jesus, Birhen ug Doktor sa Simbahan—Handumanan
Paminaw sa Iningles
“Walay gitago nga dili ibutyag, ug walay sekreto nga dili mahibaloan. Busa, bisan unsa ang inyong gisulti diha sa kangitngit madungog diha sa kahayag, ug ang inyong gihunghong luyo sa siradong mga pultahan imantala gikan sa ibabaw sa mga atop.” Lucas 12:2–3
Sa wala pa gayod ang kinutlo sa ibabaw, giingnan ni Jesus ang Iyang mga tinun-an: “Pagbantay kamo sa igpapatubo—nga mao ang pagpakaaron-ingnon—sa mga Pariseo.” Kini nahitabo human ipahayag ni Jesus ang usa ka taas ug prangka kaayong sunod-sunod nga mga pagsaway batok niining mga pangulo sa miaging kapitulo. Seryoso kaayo si Jesus bahin sa ilang makadaot nga mga buhat. Busa, human Niya silang direktang giatubang, milingi Siya ngadto sa Iyang mga tinun-an aron pasidan-an sila bahin sa mga sangpotanan sa binuhatan niining mapakaaron-ingnong mga pangulo.
Ang mapakaaron-ingnon mao ang tawo nga nagpakaaron-ingnon nga adunay moral nga mga hiyas apan, sa pagkatinuod, naglimbong lamang sa iyang kaugalingon ug naningkamot sa paglimbong sa uban. Tungod niini, gitabangan ni Jesus ang Iyang mga tinun-an pinaagi sa pagpahibalo kanila nga ang tanang kamatuoran sa kataposan mabutyag. Busa, ang matag maayong buhat sa kataposan makita sa tanan nga maayo, ug ang matag daotang tuyo, bisan unsa pa kini katinago, sa kataposan mabutyag.
Bisan tuod ang unang tentasyon sa daghan nga makadungog niining teksto mao ang paghunahuna sa uban nga ilang gituohang nahulog sa sala sa pagpakaaron-ingnon, tingali mas mapuslanon nga pamalandongan kining mga kamatuoran alang sa kaugalingon. Ang yano nga mensahe nga giwali ni Jesus mao nga kinahanglan kitang magmatinud-anon sa tanang paagi. Kinahanglan kitang magmatinud-anon sa atong kaugalingon ug maniguro nga bug-os natong naamgohan ang atong sulodnong kinabuhi, nga magtan-aw sa atong kaugalingon sumala lamang sa pagtan-aw sa Dios kanato. Kining pagmatinud-anon ug pagkinabuhi nga adunay integridad usa sa labing maayong mga paagi sa pag-andam sa atong kaugalingon alang sa kinabuhing dayon. Makapasubo gayod kon molabay ang atong kinabuhi nga sa gawas nagpakaaron-ingnon kitang lahi sa kon unsa gayod kita, ug unya mabutyag lamang ang tibuok kamatuoran sa atong kataposang paghukom, sa dihang ulahi na kaayo ang pagbag-o.
Mahimong lisod ang pagmatinud-anon sa atong kaugalingon. Normal lamang nga gusto natong mahimong maayo, mahimong balaan, ug gusto usab natong ingon niana ang pagtan-aw sa uban kanato. Tungod niini, kasagaran kaayo nga ang labing maayong hulagway lamang sa atong kaugalingon ang atong ipakita, samtang gitago nato ang daghang ubang butang nga mahimong makapaulaw ug gani makapaubos kanato. Ug bisan tuod wala kitay moral nga obligasyon sa pagsulti ngadto sa tanan bahin sa matag sala nga atong gipanlimbasogan sa sulod sa atong kaugalingon, gikinahanglan gayod sa moral nga atubangon nato kini sa atong kaugalingon, ug buhaton kini uban sa grasya sa Dios.
Usa ka praktikal nga paagi sa pagbuhat niini mao ang pagpamalandong sa teksto sa Balaang Kasulatan sa ibabaw. Giklaro ni Jesus nga sa usa ka panahon, sa usa ka paagi, ang tanan nga anaa sa sulod sa atong mga kasingkasing ug hunahuna mabutyag. Alang sa uban, pinaagi sa grasya sa Dios, mahitabo kini sulod niining kinabuhia isip paagi aron sila mausab. Alang sa uban, kining mga sekreto mabutyag lamang sa ilang kataposang paghukom. Apan ang kamatuoran mao nga ang tanan natong pagkatawo, ang tanan natong gihunahuna, ug ang tanan natong gibuhat sa tago mabutyag. Ug kon makapahadlok kini kanimo sa bisan unsang paagi, maayo kana. Usahay gikinahanglan nato ang usa ka balaang kahadlok aron madasig kitang mosusi sa atong kaugalingon ug atubangon ang tanan natong gitago gikan sa uban.
Pamalandongi karon ang kahinungdanon sa pagpaningkamot nga magkinabuhi uban sa tinuod nga pagkabukas ug integridad. Ang labing maayong paagi sa pagbuhat niini mao ang pagkinabuhi matag adlaw nga daw ang tanan nga anaa sa imong kasingkasing dayag nga makita sa tanan. Kon nagpasabot kini nga kinahanglan kang magbag-o sa usa ka bahin sa imong kinabuhi aron malinawon ka sa unsay sa kataposan mapadayag, nan paningkamoti pag-ayo ang paghimo niana nga kausaban dinhi ug karon. Ang kaatbang sa pagpakaaron-ingnon, nga maoy hinungdan sa hugot nga pagkondenar sa mga Pariseo, mao ang pagkamatinud-anon ug pagkasinsero. Paggahin og panahon sa pagpamalandong niining matahom nga mga hiyas ug pag-ampo nga ihatag kini kanimo sa Ginoo aron makakinabuhi ka uban sa tinuod nga integridad dinhi ug karon isip pagpangandam alang nianang mahimayaong adlaw sa paghukom, sa dihang ang tanan “masayran” ug “imantala ibabaw sa mga atop.”
Akong Ginoo nga nagpadayag, Imong makita ang tanang butang. Hingpit Mong nailhan ang akong kasingkasing. Palihog hatagi ako sa grasya nga makita ang akong kaugalingon sumala sa Imong pagtan-aw kanako ug mailhan ang kinasuloran sa akong kasingkasing sama sa Imong pagkaila kanako. Samtang mapadayag kanako ang labing lawom nga mga kamatuoran mahitungod sa akong pagkatawo, nangamuyo ako nga maangkon ko usab ang grasya sa kinasingkasing nga pagbag-o aron tinuod nga mahimaya Ka pinaagi sa akong mga buhat ug mahimo akong tinubdan sa tinuod nga inspirasyon alang sa tanan. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Santa Teresa ni Jesus, Birhen ug Doktor sa Simbahan—Handumanan
Mga Kapilian sa mga Basahon sa Misa
.jpg){kind=link}