Nobyembre 23, 2021
Martes sa Ika-34 nga Semana sa Ordinaryong Panahon
Mga Pagbasa alang sa Karong Adlawa
San Clemente I, Papa ug Martir—Dili Obligadong Handumanan
Beato Miguel Agustín Pro, Pari ug Martir—Dili Obligadong Handumanan sa USA
San Columbano, Abad—Dili Obligadong Handumanan
Paminaw sa Iningles
Samtang ang pipila ka tawo nagsulti bahin sa templo nga gidayandayanan sa mahalong mga bato ug mga halad sa panaad, miingon si Jesus, “Kining tanan nga inyong nakita dinhi—moabot ang mga adlaw nga walay bato nga magpabiling nagtungtong sa laing bato nga dili matumpag.” Luke 21:5–6
Sa literal nga paagi, natuman kining panagna sa atong Ginoo. Sa tuig 70 A.D., naguba ang Templo nga ilang gihisgotan. Human Niya kini matagna, si Jesus nagpadayon sa pagpasidaan sa mga tinun-an nga daghang makapalibog nga mga panghitabo ang moabot. Adunay mga mini nga propeta, mga gubat ug mga pag-alsa, kusog nga mga linog, mga gutom, mga salot, “ug adunay makalilisang nga mga talan-awon ug dagkong mga ilhanan nga moabot gikan sa langit.” Ngano man nga gitagna ni Jesus kining tanan?
Yano ra ang tubag. Wala Siya magtinguha sa pagpahadlok kanila. Dili usab kay buot lamang Niyang matagbaw ang ilang pagkamausisaon. Hinuon, gipasidan-an Niya sila ug giandam kitang tanan aron dili kita mahisalaag o mahadlok kon moabot na kini. Miingon Siya, “Pagbantay nga dili kamo malimbongan” ug “ayaw kamo kahadlok.”
Sumala pa sa karaang panultihon, “Ang kinabuhi dili puro kaharuhay.” Samtang nagkinabuhi kita niining kalibotang nahulog sa sala, palibotan kita sa kagubot, kalibog, pagpanglimbong, pagpang-abuso, eskandalo, panagbangi ug uban pang susamang mga butang. Ug kon moatubang gayod kita sa bisan unsang ingon niana nga kalisdanan, adunay tentasyon nga mahadlok, masuko ug mawad-an og paglaom. Mga panagbangi man sa pamilya, kagubot sa katilingban o bisan mga pagkabahinbahin sulod mismo sa Simbahan, gusto sa Diyos nga magpabilin kitang malinawon ug mosalig Kaniya kanunay.
Himoang panig-ingnan ang kinabuhi mismo ni Jesus. Gidakop Siya, gisumbong sa bakak, gihukman sa kamatayon ug gilansang sa krus. Ug latas niining tanan, nagpabilin Siyang malinawon, kay nasayod Siya nga ang Iyang pag-antos mahimong mao gayod ang tinubdan sa bag-ong kinabuhi. Magamit sa Diyos ang tanang butang alang sa kaayohan sa mga nahigugma ug nag-alagad Kaniya.
Pamalandongi karon ang dili ikalimod nga kamatuoran nga ang imong kinabuhi adunay mga kalisdanan. Usahay ikaw mismo ang nagpahinabo niana nga kalisdanan tungod sa imong sala, ug usahay dili makiangayon nga gipahamtang kini kanimo tungod sa sala sa uban. Sa pagkatinuod, ang atong kaugalingong sala lamang ang angay natong kabalak-an. Kon adunay ubang mga hagit nga moabot kanimo nga dili nimo makontrol, gamita kana nga mga hagit isip mga kahigayonan sa pagsalig. Itugyan sa Diyos ang tanang butang, ang matag pag-antos, matag paglutos, matag trahedya, matag pakigbisog, ang tanan gayod. Kon napagula sa Diyos Amahan ang labing dakong kaayohan nga nahibaloan sukad pinaagi sa bangis nga pagpatay sa Iyang kaugalingong balaang Anak, sigurado gayod nga mahimo usab Niya kini sa tanan nimong itugyan Kaniya uban sa pagsalig. Salig sa tanang panahon ug sa tanang kahimtang, ug ang atong makagagahom-sa-tanan nga Ginoo magpagula og kaayohan gikan sa tanang butang.
Akong labing gamhanang Ginoo, gipasidan-an Mo kami bahin sa daghang mga kalisdanan nga among masugatan sa dili pa ang Imong mahimayaong pagbalik. Gibuhat Mo kini aron sa pagtabang sa pag-andam kanamo ug sa paglig-on kanamo niadtong mga higayon sa pagsulay. Palihog hatagi ako sa grasya nga akong gikinahanglan aron kanunay akong mosalig Kanimo ug itugyan Kanimo ang matag krus nga akong gipas-an. Nagtuo gayod ako, minahal nga Ginoo, nga makapagula Ka og kaayohan gikan sa tanang butang, bisan sa labing lisod nga mga butang sa kinabuhi. Jesus, misalig ako Kanimo.
Tan-awa ang among mga kapanguhaan alang sa Adbiyento!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos sa Adlaw –
San Clemente I, Papa ug Martir
Beato Miguel Agustín Pro, Pari ug Martir
Mga Kapilian sa mga Basahon sa Misa
