Nobyembre 29, 2021
Lunes sa Unang Semana sa Adbiyento
Mga Pagbasa Karong Adlawa
“Ginoo, dili ako takos nga mosulod Ka sa akong balay; isulti lamang ang pulong ug mamaayo ang akong sulugoon.” Mt. 8:8
Kining pamilyar nga mga pulong naggikan sa pagtuo sa usa ka Romanong senturyon. Mihangyo siya kang Jesus nga ayohon ang iyang sulugoon. Miuyon si Jesus nga moadto aron pag-ayo kaniya, ug ang senturyon mipahayag niining lawom nga pagtuo kang Jesus pinaagi sa pagsulti sa duha ka butang: 1) Dili siya takos nga maanaa si Jesus sa iyang balay ug, 2) Masaligon siya nga makaayo si Jesus sa iyang sulugoon pinaagi lamang sa pagsulti sa pulong.
Siyempre, dako gayod ang pagdayeg ni Jesus sa pagtuo niining tawhana, ug Iyang gitubag ang hangyo niini pinaagi sa pag-ayo sa lawas sa sulugoon bisan gikan sa layo. Apan labaw pa sa pag-ayo ang gihimo ni Jesus. Iya usab kining gipakita nga panig-ingnan sa pagtuo alang sa tanan.
Kining matahom nga pagpahayag sa pagtuo sa senturyon gigamit sulod sa Misa aron ipahayag ang duha ka butang sa pagtuo mahitungod sa Eukaristiya: 1) Dili kita takos nga modawat sa Balaang Komunyon ug, 2) Bisan pa niana, gidapit nato si Jesus nga moanhi ug moayo sa atong mga kalag.
Ang Adbiyento maoy panahon nga ilabina natong gipamalandong ang dakong misteryo sa Pagpakatawo. Kini ang panahon nga ilabina natong gipamalandong ang misteryo sa pag-anhi sa Dios ug pagpuyo uban kanato diha sa tawhanong lawas. Bisan tuod nahitabo kini kapin sa duha ka libo ka tuig na ang milabay, padayon kini nga nahitabo sa matag Misa. Ug sa matag Misa, gitawag kita sa pagpahayag sa samang pagtuo niining Romanong senturyon.
Pamalandongi karon ang imong pagtuo sa pag-anhi ni Cristo diha sa Labing Balaang Eukaristiya. Ang matag Misa maoy pagpadayag sa Dios nga nahimong Tawo, nga mianhi aron mopuyo uban kanato ug sulod kanato. Kon maangkon lamang nato ang pagtuo niining senturyon, kita usab panalanginan sa atong Dios sa paagi nga dili masukod.
Ginoo, nagatuo gayod ako. Tabangi ako sa akong kakulang sa pagtuo. Tabangi ako nga makita ang akong pagkadili takos sa matag higayon nga mangandam ako alang sa Balaang Komunyon. Ug diha nianang mapaubsanong pag-angkon, hinaot dapiton ko usab ang Imong makaayong presensya sa akong kinabuhi. Jesus, nagasalig ako Kanimo.
Tan-awa ang tanan namong mga Kapanguhaan alang sa Adbiyento
Nobena sa Imakulada Concepcion
Nobyembre 29-Disyembre 7
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Mga Santos/Kasaulogan Karong Adlawa
Mga Kapilian sa mga Basahon sa Misa
.jpg){kind=link}