Martes, Nobyembre 30, 2021
Kapistahan ni San Andres, Apostol
Paminaw sa Iningles
Samtang naglakaw si Jesus daplin sa Dagat sa Galilea, nakita Niya ang duha ka managsoon, si Simon nga gitawag og Pedro, ug ang iyang igsoon nga si Andres, nga naghulog og pukot sa dagat; kay mga mangingisda sila. Miingon Siya kanila, “Sunod kamo Kanako, ug himoon Ko kamong mga mangingisda og mga tawo.” Diha-diha gibiyaan nila ang ilang mga pukot ug misunod Kaniya. Mateo 4:18–20
Pagkaanindot sa pista nga atong gisaulog karon sa pagsugod sa panahon sa Adbiyento. Karon atong gipasidunggan si San Andres nga Apostol, nga naghatag kanato og hingpit nga panig-ingnan kon unsaon pagsugod sa atong pagsaulog sa Adbiyento.
Kining teksto sa ibabaw nagpadayag og daghang butang nga angay natong pamalandongan. Si Andres, uban sa iyang igsoon nga si Pedro, usa ka mangingisda. Kining duha ka mangingisda nagkugi sa ilang trabaho sa kalit lang miagi duol kanila kining usa ka tawo nga wala nila mailhi, si Jesus, ug mitawag kanila. Diha-diha nilang gibiyaan ang ilang panginabuhian ug misunod kang Jesus.
Ayaw palabya ang nahitabo dinhi. Sa piho, adunay duha ka butang nga nahitabo: 1) Miagi si Jesus duol niining duha ka mangingisda ug miingon, “Sunod kamo Kanako.” 2) Isip tubag, kining duha ka lalaki diha-diha “mibiya sa ilang mga pukot ug misunod Kaniya.”
Kining sugilanon sa pagtawag kang San Andres haum kaayo sa pagsugod sa Adbiyento, kay ang Adbiyento kinahanglan mahimong panahon diin atong madungog si Jesus nga nagtawag kanato pag-usab. Kinahanglan kini mahimong bag-ong sinugdanan ug bag-ong pagkakabig alang kanato. Sa pagsugod sa Adbiyento, angay natong madungog si Jesus nga nagtawag kanato, “Sunod kamo Kanako!” Angay natong madungog ang Iyang pagdapit kanato sa pagtugyan sa atong kaugalingon sa hingpit ngadto sa Iyang balaang laraw ug katuyoan. Paminawa Siya. Nadungog ba nimo Siya nga nagtawag?
Ang atong tubag, sa pagsugod sa Adbiyento, kinahanglan mahisama sa kang San Andres. Kinahanglan natong biyaan ang tanan, sa walay pagduhaduha, aron mosunod Kaniya. Unsa gayod ang gipasabot niini? Nagpasabot kini nga kinahanglan natong buhian ang bisan unsa ug ang tanang butang nga nakababag kanato sa pagtubag kang Cristo. Nagpasabot kini nga kinahanglan kitang andam ug kinabubut-on nga mobuhat sa bisan unsang ipabuhat ni Jesus kanato. Ug kinahanglan andam kitang mobuhat niini sa takna nga Iya kining ipangayo.
Pamalandongi karon nga ang Adbiyento usa ka panahon sa pagsugod pag-usab. Panahon kini sa pagtugot nga tawgon ka ngadto kang Cristo. Paminawa Siya nga nagtawag kanimo ug tubaga Siya sa tibuok mong kasingkasing.
Ginoo, gihigugma ko Ikaw labaw sa tanan. Tabangi ako nga madungog ang Imong malumo apan lig-on nga tingog nga nagtawag kanako sa pagsunod Kanimo. Hatagi ako sa kaisog nga akong gikinahanglan aron motubag sa Imong malumong pagdapit uban sa bug-os nga pagtugyan sa akong kaugalingon. Hinaot nga kining Adbiyento mahimong panahon sa bag-ong mga sinugdanan ug mas lawom nga determinasyon sa pagsunod Kanimo. Jesus, misalig ako Kanimo.
Nobena sa Imakulada Concepcion
Nobyembre 29-Disyembre 7
Tan-awa ang among mga kapanguhaan alang sa Adbiyento!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Santos sa Adlaw – San Andres nga Apostol
Mga Kapilian sa mga Basahon sa Misa
Gipiling hulagway sa ibabaw: San Andres ni Artus Wolffort, pinaagi sa Wikimedia Commons
