Disyembre 5, 2021
Ikaduhang Domingo sa Adbiyento (Tuig C)
Mga Pagbasa Karong Adlawa
Paminaw sa Iningles
“Usa ka tingog sa nagsinggit sa kamingawan. ‘Andama ang dalan sa Ginoo, tul-ira ang Iyang mga agianan.’” Luke 3:4
Niining Ikaduhang Domingo sa Adbiyento, gihatag kanato si San Juan Bautista aron atong pamalandongan ang iyang kinabuhi. Pagkadakong gasa niya kanato! Si Jesus mismo miingon nga “sa mga natawo sa mga babaye, walay bisan kinsa nga mas labaw pa kang Juan Bautista” (Matthew 11:11). Pagkadakong pagdayeg!
Unsay nakapahimo kang Juan nga hilabihan kalabaw? Adunay duha ka butang nga atong ikatudlo. Ang una may kalabotan sa iyang tawag ug ang ikaduha may kalabotan sa iyang hiyas.
Una sa tanan, labaw si Juan tungod kay siya ang nagtimaan sa pagbalhin gikan sa mga Propeta sa Daang Tugon ngadto sa Bag-ong Tugon. Siya ang tulay nga nag-andam alang sa bag-ong kinabuhi nga moabot. Ang iyang talagsaong misyon maoy nakapahimo kaniya nga tinuod gayong labaw.
Apan labaw si Juan dili lamang tungod sa iyang talagsaong tawag, kondili tungod usab sa hiyas nga iyang gikinabuhi. Ug kini nga gasa, labaw sa tanan, ang angay natong pamalandongan aron makadasig kanato.
Ang talagsaong hiyas ni Juan mao ang pagkamapainubsanon. Giila niya ang iyang kaugalingon nga walay lain kondili usa ka “tingog sa nagsinggit sa kamingawan.” Ug ang Pulong nga iyang gisangyaw mao si Jesus.
Giila ni Juan nga dili gani siya takos sa pagduko ug paghubad sa mga higot sa sandalyas ni Jesus (Mark 1:7). Daghan ang midayeg ug misunod kaniya, apan padayon siyang miingon mahitungod kang Jesus nga “Kinahanglan nga Siya motubo ug ako mokunhod” (John 3:30). Wala kini buhata ni Juan aron dayegon ug pasidunggan; hinuon, ang iyang misyon mao ang pagtudlo sa tanan ngadto sa Manluluwas sa Kalibotan. Mahimo unta niyang pangitaon ang pagpasidungog ug pagdayeg sa daghan, ug sa walay duhaduha madawat gayod unta niya kini. Tingali himoon pa gani unta nila siyang hari. Apan si Juan andam kaayong motuman sa iyang misyon ug unya motugyan sa iyang kaugalingon ngadto sa mapintas nga espada sa iyang tigpatay. Ingon niana kadako ang iyang pagkamapainubsanon nga kang Jesus lamang siya nagtutok ug ang iyang bugtong tinguha mao ang pagtudlo sa uban ngadto Kaniya.
Pamalandongi karon kining pagkamapainubsanon diha sa imong kaugalingong kinabuhi. Hilig ka bang motudlo sa uban ngadto sa imong kaugalingon o ngadto kang Kristo? Nangita ka ba sa pagdayeg sa uban, o mapainubsanon nimong ipahinungod ang tanang pagdayeg ug himaya ngadto sa Dios? Ang pagkamapainubsanon mao ang dalan nga gisubay ni San Juan Bautista, ug mao kini ang dalan nga kinahanglan natong paningkamotang subayon matag adlaw.
Ginoo, salamat Kanimo sa gasa ni San Juan Bautista. Hinaot nga ang iyang pagpamatuod sa pagkamapainubsanon makadasig kanako sa akong Kristohanong pagpanaw. Tabangi ako, Ginoo, nga kanunay nakong tudloan ang uban ngadto Kanimo imbes ngadto sa akong kaugalingon. Jesus, misalig ako Kanimo.
Tan-awa ang tanan namong mga Kapanguhaan alang sa Adbiyento
Nobena sa Imakulada Concepcion
Nobyembre 29-Disyembre 7
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Mga Santos/Kasaulogan Karong Adlawa
Mga Kapilian sa mga Basahon sa Misa
