Marso 30, 2022
Miyerkules sa Ikaupat nga Semana sa Kwaresma
Mga Pagbasa Karong Adlawa
Si Jesus mitubag sa mga Judio: “Ang Akong Amahan nagpadayon sa pagbuhat hangtod karon, busa Ako usab nagabuhat.” Tungod niini, labi pa gayod silang naningkamot sa pagpatay Kaniya, kay dili lamang kay gilapas Niya ang Adlawng Igpapahulay kondili gitawag usab Niya ang Dios nga Iyang kaugalingong Amahan, nga naghimo sa Iyang kaugalingon nga tupong sa Dios. Juan 5:17–18
Sa panglantaw niadtong nagtinguha sa pagpatay Kaniya, si Jesus klarong nakasala og mga bug-at nga sala. Wala Niya sunda ang ilang mga balaod sa Adlawng Igpapahulay sumala sa ilang pagtuo nga angay Niyang buhaton, ug gipadayag Niya nga Siya tupong sa Amahan. Kini unta usa ka bug-at nga sala sa bahin ni Jesus kon sayop pa Siya, apan klaro nga dili Siya sayop.
Ang kinauyokan niining maong teksto mao ang panaghiusa sa Amahan ug sa Anak. Ang mga bersikulo nga nagsunod niini mas tin-aw pang nagpadayag nga ang Amahan ug ang Anak usa, ug nga ang tibuok kinabuhi ni Jesus hingpit nga gipahinungod sa pagtuman sa kabubut-on sa Amahan. Kining pagkausa gayod sa kabubut-on mao ang nagpatungha sa Ilang panaghiusa.
Daghan kini og gipadayag kanato mahitungod sa relasyon sa Amahan ug sa Anak, ug daghan usab kini og gipadayag mahitungod sa atong kaugalingong relasyon sa Amahan ug sa Anak. Una sa tanan, ang Amahan ug ang Anak managlahi nga mga Persona, nga ang matag Usa adunay hingpit nga salabotan ug kabubut-on. Apan, ang Ilang pagkausa mitumaw tungod kay ang Ilang mga hunahuna hingpit nga nagkauyon, managsama ang Ilang kahibalo sa tanang butang, ug hingpit Silang nagtuo sa Ilang nahibaloan. Tungod sa hingpit nga kahibalo nga Ilang gipaambit, Silang Duha migakos sa matag detalye sa plano sa Amahan sumala sa pagkahan-ay niini sukad pa sa pagkatukod sa kalibotan.
Alang kanato, gikan niining pagsabot sa panaghiusa sa Amahan ug sa Anak, atong makuha ang mahimayaong leksiyon kon unsaon nato pagsulod sa panaghiusa uban sa Dios. Mahitabo kini una pinaagi sa pagtinguha nga masabtan ang hunahuna sa Dios. Kinahanglan natong susihon pag-ayo ang mahimayaong mga misteryo nga anaa niini ug himoon kining atong kaugalingong kahibalo. Ikaduha, kinahanglan natong tuohan ang atong mahibaloan pinaagi sa usa ka buhat sa atong kabubut-on. Samtang atong madiskobrehan ang kamatuoran, kinahanglan natong pilion kini alang sa atong kinabuhi. Ang hagit mao nga daghang nagkaatbang nga mga tingog ang nag-ilog sa atong pagtagad. Samtang atong timbang-timbangon kini, nga mopili lamang sa gipadayag sa Dios, natural kitang madani sa hunahuna ug kabubut-on sa Dios ug himoon kini nga ato usab. Niining buhata, mahimo usab kitang usa uban sa Dios.
Pamalandongi karong adlawa ang panaghiusa uban sa Amahan ug sa Anak nga gitawag ka sa pagsinati sa imong kinabuhi. Kini nga panaghiusa mao ang naghatag og katumanan sa imong kinabuhi. Mao kini ang katuyoan sa imong pagkalalang. Ang pagpangita, pagtuo ug paggakos sa bisan unsang laing butang usa lamang ka pagkinabuhi subay sa usa ka bakak. Pangitaa ang hunahuna ug kabubut-on sa Dios sa tanang butang, ug ang imong tibuok pagkatawo madani ngadto sa mas lawom nga panaghiusa uban sa Dios.
Amahan sa Langit, nagpasalamat ako Kanimo sa gasa nga mao si Jesus nga Imong Anak, ug nagpasalamat ako Kanimo sa panaghiusa nga Inyong gipaambit sa usag usa. Ibira ako ngadto nianang mahimayaong panaghiusa nga gipundar sa Inyong mga hunahuna ug mga kabubut-on. Himoa akong usa uban Kanimo aron Ikaw usab mahimong akong Amahan. Amahan sa Langit, Jesus nga Anak, nagsalig ako Kaninyo.
Ikakawhaan ug Unom nga Pamalandong – Ang Balaang mga Babaye ug si Veronica
(Miy. sa Ikaupat nga Semana sa Kwaresma)
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapanguhaan alang sa Kwaresma
Mga Pamalandong sa Balaang Kasulatan alang sa Kwaresma
Mga Santos/Kasaulogan Karong Adlawa
Mga Kapilian sa mga Basahon sa Misa
