Hulyo 4, 2022
Lunes sa Ika-katorse nga Semana sa Kasagarang Panahon
Mga Pagbasa Karong Adlawa
Adlaw sa Kagawasan—Opsiyonal nga Handumanan sa USA
Santa Isabel sa Portugal—Opsiyonal nga Handumanan
(Gisaulog sa Hulyo 5 sa USA)
Sa pag-abot ni Jesus sa balay sa opisyal, nakita Niya ang mga manunugtog og plawta ug ang panon sa mga tawo nga nagkaguliyang. Miingon Siya, “Pahawa kamo! Ang batang babaye wala mamatay kondili natulog lamang.” Ug ilang gibiaybiay Siya. Sa dihang napagawas na ang panon sa mga tawo, misulod Siya ug gigunitan ang kamot sa bata, ug mibangon kini. Ug ang balita mahitungod niini mikaylap sa tibuok niadtong dapita. Mateo 9:23-26
Daghang milagro ang gihimo ni Jesus. Balikbalik Niyang gilabwan ang mga balaod sa kinaiyahan. Niining teksto sa Ebanghelyo, gibuntog Niya ang kamatayon pinaagi sa pagpabuhi pag-usab niining batang babaye. Ug gihimo Niya kini sa paagi nga daw ordinaryo ug sayon ra kaayo alang Kaniya.
Makapalawom sa atong pagsabot ang pagpamalandong sa paagi ni Jesus sa paghimo sa Iyang mga milagro. Daghan ang natingala ug nakurat sa Iyang milagrosong gahum. Apan alang kang Jesus, daw ordinaryo lamang kini nga bahin sa Iyang adlaw. Wala Niya kini padak-a, ug sa pagkatinuod, kanunay Niyang gisultihan ang mga tawo nga dili ipanugilon ang Iyang mga milagro.
Usa ka tin-aw nga gipadayag niini kanato mao nga si Jesus adunay hingpit nga gahum ibabaw sa pisikal nga kalibotan ug sa tanang balaod sa kinaiyahan. Gipahinumdoman kita niini nga asoy nga Siya ang Magbubuhat sa Uniberso ug ang tinubdan sa tanang naglungtad. Kon makamugna Siya sa tanang butang pinaagi lamang sa Iyang pagbuot, sayon ra usab alang Kaniya ang pagmugna pag-usab ug pag-usab sa mga balaod sa kinaiyahan pinaagi sa Iyang kabubut-on.
Ang pagsabot sa tibuok kamatuoran mahitungod sa Iyang hingpit nga awtoridad ibabaw sa kinaiyahan angay usab maghatag kanato og pagsalig sa Iyang hingpit nga awtoridad ibabaw sa espirituhanong kalibotan ug sa tanang bahin sa atong kinabuhi. Mahimo Niya ang tanang butang, ug mahimo Niya kining tanan sa sayon nga paagi.
Kon makabaton kita og lawom nga pagtuo sa Iyang gahum nga walay kinutoban, ug og tin-aw nga pagsabot sa Iyang hingpit nga gugma ug hingpit nga pagkaila kanato, makasalig kita Kaniya sa paagi nga wala gayod nato damha nga mahimo diay. Nganong dili man kita hingpit nga mosalig Kaniya nga makahimo sa tanang butang ug hingpit nga nahigugma kanato? Nganong dili man kita mosalig Kaniya nga nahibalo sa tanan mahitungod kanato ug nagtinguha lamang sa atong kaayohan? Kita kinahanglang mosalig Kaniya! Takos Siya nianang pagsaliga, ug ang atong pagsalig maghatag og luna sa Iyang gahum nga walay kinutoban nga molihok sa atong kinabuhi.
Pamalandongi karon ang duha ka butang. Una, nasabtan ba nimo kon unsa kalawom ang Iyang gahum? Ikaduha, nahibalo ka ba nga ang Iyang gugma nag-aghat Kaniya sa paggamit nianang gahoma alang sa imong kaayohan? Ang pagkahibalo ug pagtuo niining mga kamatuorana mag-usab sa imong kinabuhi ug magtugot Kaniya sa paghimo og mga milagro sa grasya.
Ginoo sa tanang gahum ug gugma, nagtuo gayod ako sa Imong hingpit nga awtoridad ibabaw sa tanang butang ug sa Imong bug-os nga awtoridad ibabaw sa akong kinabuhi. Tabangi ako nga mosalig Kanimo ug mosalig sa Imong gugma alang kanako. Jesus, misalig gayod ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw:
Adlaw sa Kagawasan—USA Opsyonal nga Handumanan
Santa Isabel sa Portugal—Opsiyonal nga Handumanan
(Gisaulog sa Hulyo 5 sa USA)
Mga Kapilian sa mga Basahon sa Misa
Hulagway: Pagpabuhi Pag-usab sa Anak nga Babaye ni Jairo ni Paolo Veronese
