Pagkadili Makataronganon batok sa Pagkanormal 

Hulyo 5, 2022
Martes sa Ikanapulog-upat nga Semana sa Panahon sulod sa Tuig
Mga Pagbasa Karong Adlawa

San Antonio Zaccaria, Pari—Opsiyonal nga Handumanan

Santa Isabel sa Portugal—Dili Obligadong Handumanan
(Gisaulog sa Hulyo 4 gawas sa USA)

Bidyo

Gidala ngadto kang Jesus ang usa ka giyawaan nga dili makasulti, ug sa dihang napagula ang yawa, nakasulti ang amang nga lalaki. Nahibulong ang mga panon sa katawhan ug miingon, “Wala pa gayoy nakita nga sama niini sa Israel.” Apan miingon ang mga Pariseo, “Nagpagula Siya og mga yawa pinaagi sa gahom sa prinsipe sa mga yawa.”  Mateo 9:32-34

Dako gayod ang kalainan nga atong makita tali sa reaksyon sa mga panon sa katawhan ug sa reaksyon sa mga Pariseo. Makapasubo gayod kini nga kalainan.

Ang reaksyon sa mga panon sa katawhan, nga mao ang ordinaryong mga tawo, puno sa kahibulong. Ang ilang reaksyon nagpadayag og yano ug putli nga pagtuo nga nagdawat sa ilang nakita. Dakong panalangin ang pagbaton niini nga matang sa pagtuo.

Ang reaksyon sa mga Pariseo puno sa paghukom, dili makataronganong panghunahuna, pagpangabugho ug kabangis. Labaw sa tanan, dili kini makataronganon. Unsa may nakapahinabo nga ang mga Pariseo mihinapos nga si Jesus “nagpagula og mga yawa pinaagi sa gahom sa prinsipe sa mga yawa?” Sigurado nga walay bisan unsa sa gibuhat ni Jesus nga makapahinabo kanila sa pagkab-ot niini nga konklusyon. Busa, ang bugtong makataronganong konklusyon mao nga ang mga Pariseo napuno sa pagpangabugho ug pagkasina. Ug kining mga salaa maoy nagtukmod kanila ngadto niining kataw-anan ug dili makataronganong konklusyon. 

Ang leksyon nga angay natong makat-onan gikan niini mao nga kinahanglan kitang moduol sa ubang tawo uban sa pagpaubos ug pagkamatinud-anon imbes sa pagpangabugho. Kon tan-awon nato ang mga tawo sa atong palibot uban sa pagpaubos ug gugma, natural kitang makakab-ot og tinuod ug matinud-anong mga konklusyon mahitungod kanila. Ang pagpaubos ug matinud-anong gugma makatabang kanato sa pag-ila sa kaayo sa uban ug sa pagkalipay niana nga kaayo. Tinuod, makamatikod usab kita sa sala, apan ang pagpaubos makatabang kanato sa paglikay sa paghimog dinalidali ug dili makataronganong mga paghukom mahitungod sa uban tungod sa pagpangabugho ug pagkasina.

Pamalandongi karong adlawa ang imong naandang paagi sa paghunahuna ug pagsulti mahitungod sa uban.  Mas sama ka ba sa mga panon sa katawhan nga nakakita, mituo ug nahibulong sa maayong mga butang nga gibuhat ni Jesus?  O mas sama ka sa mga Pariseo nga may kalagmitang magmugna og mga bakak ug magpasobra sa ilang mga konklusyon?  Paningkamoti nga sundogon ang normal nga pagtubag sa mga panon sa katawhan aron ikaw usab makakaplag og kalipay ug kahibulong diha kang Cristo.

Akong makapahibulong nga Ginoo, nangandoy ako nga makabaton og yano, mapaubsanon ug putli nga pagtuo.  Tabangi ako nga makita usab Ikaw diha sa uban sa mapaubsanong paagi.  Tabangi ako nga makita Ikaw ug mahibulong sa Imong presensya diha sa kinabuhi sa mga tawo nga akong mahimamat matag adlaw.  Jesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Santos Karong Adlawa:
San Antonio Zaccaria, Pari—Opsiyonal nga Handumanan

Santa Isabel sa Portugal—Dili Obligadong Handumanan
(Gisaulog sa Hulyo 4 gawas sa USA)

Mga Kapilian sa mga Basahon sa Misa

Hulagway: Ang Buta ug Amang nga Lalaki nga Giyawaan ni James Tissot