Hulyo 14, 2022
Huwebes sa Ikanapulog-limang Semana sa Kasagarang Panahon
Mga Pagbasa Karong Adlawa
Santa Kateri Tekakwitha, Birhen—Handumanan sa USA
San Camilo de Lellis, Pari—Opsiyonal nga Handumanan
(Sa Estados Unidos, kini nga handumanan gibalhin ngadto sa Hulyo 18)
Paminaw sa Iningles
Miingon si Jesus: “Duol kamo kanako, kamong tanan nga gikapoy ug gibug-atan, ug papahulayon ko kamo.” Mateo 11:28
Kini nga pagdapit ni Jesus kinahanglan tingali natong madungog sa mas kanunay kay sa atong naamgohan. Usa kini ka malumong pagdapit nga tugotan ang atong Ginoo sa pagpagaan sa atong adlaw-adlaw nga palas-anon, sa paghupay sa atong mga kabalaka, tensiyon, mga gikabalak-an ug sa tanan nga nakapabug-at kanato. Usa kini ka pagdapit sa gugma ug kalooy nga angay natong dawaton kanunay.
Unsa man ang imong gipas-an? Unsa man ang nakapabug-at kanimo ug nagtintal kanimo nga mahulog sa depresyon, kasubo o bisan sa pagkawalay paglaom? Aduna bay butang nga balikbalik nimong gihunahuna ug dili nimo mahunong? Aduna bay kabalaka nga morag dili gayod nimo mahanaw? Bisan unsa pa ang nagsamok sa imong kasingkasing, gusto ni Jesus nga kuhaon kini gikan kanimo.
Usahay, nagpadayon kita sa kinabuhi nga may bug-at nga mga palas-anon nga nahadlok kitang buhian. Mahimong mahadlok kitang moduol kang Jesus ug mahadlok nga pasudlon Siya sa atong kinabuhi. Ang pagduol kang Jesus nagpasabot nga kinahanglan natong atubangon sa matinud-anon ug bukas nga paagi ang bisan unsang nakapabug-at kanato, ug kinahanglan natong atubangon kini nga mga palas-anon diha sa presensiya ni Jesus.
Apan ang labing mahinungdanong angay natong masayran mao nga si Jesus malumo, maloloy-on ug madagayaon sa pagpasaylo ug grasya. Mas dako pa ang Iyang tinguha nga kuhaon ang atong mga palas-anon kay sa atong tinguha nga mahaw-as kita niini. Nakita Niya ang pagdaogdaog nga giatubang sa daghan ug lawom kaayo ang Iyang tinguha nga mawagtang kana nga pagdaogdaog.
Pamalandongi karong adlawa kanang malumong pagdapit ni Jesus: “Duol kamo kanako.” Duol Kaniya nga walay kahadlok ug walay pagduhaduha. Itugyan Kaniya ang tanan ug tugoti Siya sa paghan-ay sa mga butang. Gihigugma ka Niya labaw pa sa imong nahibaloan ug tultolan ka Niya ngadto sa hustong dalan.
Ginoo kong nagdapit kanako, miduol gayod ako Kanimo ug gibutang ko ang akong kinabuhi ug matag palas-anon sa Imong atubangan. Gihatag ko Kanimo ang akong kinabuhi, akong mga paglaom, akong mga kahadlok, akong kagahapon, akong kaugmaon ug ang tanan nga nakapabalaka kanako. Jesus, gihatag ko Kanimo ang tanan. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos Karong Adlawa:
Santa Kateri Tekakwitha
Mga Kapilian sa mga Basahon sa Misa
