Kaluoy ang Akong Gitinguha

Hulyo 15, 2022
Biyernes sa Ikanapulog-limang Semana sa Ordinaryong Panahon
Mga Pagbasa Karong Adlawa

San Buenaventura, Obispo ug Doktor sa Simbahan—Paghandum

Bidyo

“Kon nasabtan pa ninyo ang kahulogan niini, Kaluoy ang Akong gitinguha, dili halad, dili unta ninyo hukman kining mga tawong walay sala.”  Mateo 12:7

Gigutom ang mga Apostoles ni Jesus, ug samtang naglakaw sila, nangutlo sila og mga uhay aron mahupay ang ilang kagutom.  Tungod niini, gihukman sa mga Pariseo ang mga Apostoles kay nagbuhat sila sa giingon sa mga Pariseo nga “supak sa balaod” sa adlaw nga Igpapahulay.  Matod nila, ang pagpangutlo og mga uhay samtang naglakaw giisip nga “trabaho” ug, busa, nakalapas sila sa balaod nga nagsugo sa pagpahulay sa adlaw nga Igpapahulay.

Tinuod ba gayod?  Nagtuo ba gayod ang mga Pariseo nga nakasala ang mga Apostoles sa pagpangutlo og mga uhay samtang naglakaw aron mahupay ang ilang kagutom?  Hinaot nga dili lisod alang kanato nga makita kon unsa ka walay hinungdan ug walay katarongan kining paghukom kanila. Walay daotang gibuhat ang mga Apostoles, apan gihukman gihapon sila.  Sila mga “tawong walay sala,” sumala sa gipunting ni Jesus.

Gitubag ni Jesus ang pagkawalay katarongan sa mga Pariseo pinaagi sa pagpahinumdom kanila sa Kasulatan, “Kaluoy ang Akong gitinguha, dili halad.”  Ug gipunting Niya nga sayop ang paghukom sa mga Apostoles tungod kay wala makasabot ang mga Pariseo niining maong teksto ug niining sugo sa Dios nga magmaluluy-on.

Ang sugo sa pagpahulay sa adlaw nga Igpapahulay gikan sa Dios.  Apan ang sugo sa pagpahulay dili usa ka kinahanglanon nga tumanon tungod lamang kay gisugo kini.  Dili kini usa lamang ka legal nga kinahanglanon nga makapasidungog kuno sa Dios pinaagi lang sa hugot nga pagtuman niini.  Ang pagpahulay sa adlaw nga Igpapahulay labaw sa tanan usa ka gasa sa Dios ngadto sa katawhan, kay nahibalo ang Dios nga nagkinahanglan kita og pahulay ug pagbag-o sa kusog.  Nahibalo Siya nga matag semana nagkinahanglan kita og panahon sa paghinay-hinay, paghalad og pinasahing pagsimba sa Dios, ug paglipay sa pagpakig-uban sa uban.  Apan gihimong palas-anon sa mga Pariseo ang pagpahulay sa adlaw nga Igpapahulay.  Gihimo nila kini nga usa ka hugot nga pagsunod sa letra sa balaod nga wala makahatag og himaya sa Dios ni makapabag-o sa espiritu sa tawo.  

Usa ka mahinungdanong kamatuoran nga atong makat-onan niining teksto mao nga gitawag kita sa Dios sa pagsabot sa Iyang balaod pinaagi sa mga mata sa kaluoy.  Ang kaluoy kanunayng makapabag-o kanato, makabayaw kanato, ug makapuno kanato og bag-ong kusog.  Nagdasig kini kanato sa pagsimba ug nagpuno kanato og paglaom.  Ang kaluoy dili magpahamtang kanato og bug-at nga palas-anon sa hugot nga pagsunod sa letra sa balaod; hinuon, ang kaluoy ug balaod sa Dios maghiusa sa pagbag-o sa atong kusog ug pagpalagsik kanato.

Pamalandongi karong adlawa kon giunsa nimo pagtan-aw ang mga sugo sa Dios ug ang Iyang balaod.  Gitan-aw ba nimo kini nga usa ka hugot ug bug-at nga kinahanglanong tumanon?  O gitan-aw ba nimo kini nga usa ka panalangin sa kaluoy sa Dios nga gituyo sa pagpagaan sa imong palas-anon?

Akong maluluy-ong Ginoo, tabangi ako sa paghigugma sa Imong balaod.  Tabangi ako nga tinuod kining makita diha sa kahayag sa Imong kaluoy ug grasya.  Hinaot nga mabag-o ang akong kusog pinaagi sa tanan Mong gisugo ug madasig ako pinaagi sa Imong kabubut-on.  Jesus, nagsalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw: San Buenaventura

Mga Kapilian sa mga Basahon sa Misa

Pangunang Hulagway: James Tissot, Publikong dominyo, pinaagi sa Wikimedia Commons