Agosto 25, 2022
Huwebes sa Ikakawhaag-usa nga Semana sa Panahon sulod sa Tuig
Mga Pagbasa Karong Adlawa
San Luis, Hari—Opsyonal nga Handumanan
San Jose de Calasanz, Pari—Opsyonal nga Handumanan
Paminaw sa Iningles
“Pagpabiling magtukaw! Kay wala kamo mahibalo kon unsang adlawa moabot ang inyong Ginoo.” Mateo 24:42
Unsa kaha kon karon na kana nga adlaw?! Unsa kaha kon nahibalo ka nga karon mao ang adlaw nga mobalik ang atong Ginoo dinhi sa kalibotan uban sa tanan Niyang kahalangdon ug himaya aron paghukom sa mga buhi ug sa mga patay? Mausab ba ang imong binuhatan? Lagmit mausab gayod ang binuhatan natong tanan. Tingali mokontak kita sa daghang tawo kutob sa atong mahimo aron pahibaw-on sila nga hapit nang mobalik ang Ginoo, mokompisal, ug dayon igahin ang nahibiling adlaw sa pag-ampo.
Apan unsa man ang labing angay nga tubag sa maong pangutana? Kon pinaagi sa usa ka talagsaong pagpadayag gikan sa Dios, gipahibalo ka nga karon mao ang adlaw sa pagbalik sa Ginoo, unsa man ang labing angay nimong tubag? Adunay nag-ingon nga ang labing angay nga tubag mao ang pagpadayon sa imong adlaw sama sa bisan unsang ordinaryong adlaw. Ngano man? Kay sa labing maayong kahimtang, kitang tanan nagkinabuhi matag adlaw nga daw kini na ang atong kataposan, ug adlaw-adlaw natong gisunod ang Kasulatan sa ibabaw. Matag adlaw, naningkamot kita nga “magpabiling magtukaw” ug maandam sa pagbalik sa atong Ginoo sa bisan unsang takna. Kon tinuod gayod natong gikinabuhi kining Kasulatan, dili na igsapayan kon ang Iyang pagbalik mahitabo karon, ugma, sunod tuig, o daghang tuig pa gikan karon.
Apan kining tawag nga “magpabiling magtukaw” wala lamang magtumong sa kataposan ug mahimayaong pag-abot ni Kristo. Nagtumong usab kini sa matag takna sa matag adlaw nga ang atong Ginoo moduol kanato pinaagi sa grasya. Nagtumong kini sa matag pag-aghat sa Iyang gugma ug kalooy diha sa atong mga kasingkasing ug kalag. Nagtumong kini sa Iyang makanunayong malumong mga hunghong nga nagtawag kanato nga mas maduol pa Kaniya.
Matngon ka ba sa Iyang pagduol kanimo niining mga paagiha matag adlaw? Matngon ka ba sa dili maihap nga mga paagi nga Iyang gigamit aron mas hingpit nga mosulod sa imong kinabuhi? Bisan wala kita mahibalo sa adlaw nga moabot ang atong Ginoo sa Iyang kataposang kadaugan, nahibalo kita nga ang matag adlaw ug ang matag takna sa matag adlaw maoy higayon sa Iyang pag-abot pinaagi sa grasya. Paminawa Siya, pagmatngon, pagbantay, ug pagpabiling magtukaw!
Ginoo sa tanang grasya, tabangi ako sa pagpangita sa Imong tingog ug sa pagmatngon sa Imong presensya sa akong kinabuhi. Hinaot nga kanunay akong magtukaw ug andam nga maminaw Kanimo sa dihang motawag Ka. Jesus, misalig ako Kanimo.
Nobena kang Santa Monica
Agosto 18–26
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos sa Adlaw –
Mga Kapilian sa mga Basahon sa Misa
