Martes, Agosto 29, 2023
Handumanan sa Pag-antos ni San Juan Bautista
Paminaw sa Iningles
Si Herodes mao ang nagpabilanggo ug nagpagapos kang Juan Bautista tungod kang Herodias, ang asawa sa iyang igsoon nga si Felipe, nga iyang gipangasawa. Miingon man si Juan kang Herodes, “Dili uyon sa balaod nga imong angkonon ang asawa sa imong igsoon.” Si Herodias nagtanim og kasuko batok kaniya ug buot mopatay kaniya, apan wala siya makahimo niini. Marcos 6:17–19
Ang pag-antos ug kamatayon ni San Juan Bautista adunay dakong pagkapareho sa pag-antos ug kamatayon ni Jesus. Mag-agaw sila. Si Juan usa sa unang miila sa balaang presensya sa atong Ginoo sa dihang milukso siya sa kalipay sulod sa sabakan sa iyang inahan atol sa Pagduaw ni Maria kang Elisabet. Si Juan nagpuyo sa balaan ug yano nga kinabuhi, nga midawat sa iyang misyon sa pag-andam sa dalan alang sa Ginoo. Siya ang kataposan ug labing bantogan sa mga propeta sa Daang Tugon. Mahitungod kaniya, miingon si Jesus nga walay natawo sa babaye nga labaw pa kang Juan. Tungod niini, dili gayod kita angay mahibulong nga ang pag-antos ug kamatayon ni Juan susama ug naglandong daan sa kamatayon sa Manluluwas sa Kalibotan.
Nahadlok si Herodes kang Juan kay nagtuo siya nga si Juan usa ka balaang tawo sa Diyos. Iyang gipabilanggo si Juan nga may pagmahay, kay nasayod siya nga inosente kini. Sa samang paagi, sa wala pa hukmi ni Pilato si Jesus sa kamatayon, iyang nakita nga wala Siyay sala sa bisan unsang krimen. Nasayod si Pilato nga inosente si Jesus, apan gitugotan niya ang kahadlok nga mogiya sa iyang desisyon sa paghukom sa atong Ginoo.
Sa kataposan, gipatay si Juan tungod sa pagdumot ug mga laraw ni Herodias, ang dili subay sa balaod nga asawa ni Herodes. Ang kasuko ni Herodias nahimong hinagiban nga mipugos kang Herodes sa pagpapatay kang Juan. Sa samang paagi, ang kasina ug kasuko sa mga pangulo sa relihiyon niadtong panahona maoy nag-aghat ug nagduso sa pagpatay kang Jesus. Si Pilato, sama kang Herodes, sa sinugdan dili buot mohukom sa atong Ginoo. Apan ang walay hunong nga pagdumot sa mga eskriba ug mga Pariseo mipugos kang Pilato sa paghukom kang Jesus, sama nga ang pagdumot ni Herodias mipugos kang Herodes sa pagpapatay kang Juan.
Human sa kamatayon ni Juan, miabot ang pipila sa iyang mga tinun-an aron kuhaon ang iyang lawas ug ilubong. Gitugotan kini ni Herodes, tingali tungod sa iyang pagbati sa pagkasad-an. Mao usab ang nahitabo sa atong Ginoo: gitugotan ni Pilato ang pipila ka mga tinun-an ug ang balaang mga babaye sa pagdala sa patayng lawas ni Jesus ngadto sa lubnganan aron ilubong.
Sa kataposan, ang maayong bunga sa kamatayon ni Jesus milabaw sa walay kinutoban sa krimen nga gihimo batok Kaniya. Mao usab kang Juan. Makaseguro kita nga, isip usa ka martir, ang dugo nga iyang giula sa pagpamatuod kang Kristo namunga og espirituhanong mga bunga nga milabaw sa tanan niyang nahimo sa iyang publikong ministeryo.
Ang matag usa kanato gitawag sa pagsundog sa atong Ginoo ug, busa, angay usab kitang magkuhag inspirasyon kang San Juan Bautista. Silang duha inosente apan nag-antos pag-ayo. Silang duha misulti sa kamatuoran bisan pa sa pagdumot sa uban. Silang duha mihalad sa ilang kinabuhi subay sa plano sa Amahan. Si Jesus mao ang Manluluwas ni Juan; si Juan usa lamang ka mag-uuna ug alagad sa atong Ginoo.
Pamalandongi karon ang pagdapit sa Diyos kanimo sa pagsundog sa kinabuhi ni Juan Bautista pinaagi sa pagpakighiusa sa iyang Ginoo. Ang unang paagi sa pagsundog mao ang pagtugyan sa imong kaugalingon sa pagsangyaw sa kamatuoran sumala sa imong misyon. Unsang misyon ang gihatag sa Diyos kanimo? Sa unsang paagi ka Niya gitawag sa pagsangyaw sa Ebanghelyo uban ang kaisog, kusog, determinasyon ug pagkamatinud-anon hangtod sa kataposan? Pamalandongi usab ang inhustisya nga gipahamtang una kang Juan ug unya sa atong Ginoo. Samtang ginapamalandongan mo kini, sulayi pagtan-aw ang bisan unsang inhustisya nga imong nasinati sa kinabuhi diha sa kahayag sa kinabuhi ni Juan ug ni Jesus. Wala sila molikay sa inhustisya. Gidawat nila kini isip sakripisyo ug gihalad ngadto sa Amahan sa Langit. Ang Sakripisyo ni Jesus nagdala sa Kaluwasan sa Kalibotan; ang kang Juan usa lamang ka pagpakig-ambit nianang mahimayaong paghalad. Iuban ang imong paghalad sa ilaha, ug ayaw pagpanuko sa pagbuhat niini uban ang lalom nga gugma ug pagsalig sa laraw sa Amahan.
Labing mahimayaong Ginoo, Imong gidapit si San Juan Bautista sa pag-andam sa dalan alang sa Imong pag-abot ug sa Imong kamatayon. Iyang gihalad ang iyang kinabuhi isip martir, ug kini nga sakripisyo nagbunga og daghang maayong bunga. Palihog hatagi ako sa grasya sa pagsunod sa iyang mga tunob pinaagi sa matinud-anong pagtuman sa akong misyon sa kinabuhi uban ang kaisog ug kusog. Hinaot nga dili gayod ako matarog atubangan sa inhustisya aron madawat ko kini ug mahimo kong espirituwal nga halad Kanimo. Jesus, ako nagsalig Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Ang Pagpunggot sa Ulo ni San Juan Bautista, Martir
Mga Kapilian sa mga Basahon sa Misa
Hulagway: Ang Pagpunggot sa Ulo ni San Juan Bautista, pinaagi sa Wikimedia Commons
