Septiyembre 25, 2023
Lunes sa Ikakawhaan ug Lima nga Semana sa Kasagarang Panahon
Mga Pagbasa alang Karong Adlawa
Paminaw sa Iningles
“Busa, pagbantay kamo kon giunsa ninyo pagpaminaw. Kay ang aduna pay iya hatagan pa ug dugang, apan ang walay iya kuhaan bisan pa sa iyang gituohang iya.” Lucas 8:18
Daghan ka ba ug nabatonan? O diyutay ra? Sumala sa mga pulong ni Jesus, kon daghan ka ug nabatonan, makadawat ka pa ug labaw pa; apan kon diyutay ra ang imong nabatonan, bisan kana mawala pa kanimo. Makataronganon ba kini sa imong tan-aw?
Siyempre, ang atong Ginoo wala magsulti bahin sa kalibotanong mga butang. Wala Siya mag-ingon nga kon daghan ka ug kuwarta, madugangan pa kini, o nga kon kabos ka, mosamot ka pagkakabos. Hinunoa, si Jesus naghisgot bahin sa grasya nga nagagikan sa pagsabot sa Iyang balaang Pulong. Matikdi nga ang teksto sa ibabaw nagsugod sa pag-ingon, “Busa, pagbantay kamo kon giunsa ninyo pagpaminaw.”
Ang “pagpaminaw” sa Pulong sa Diyos nagpasabot nga tinuod nimong gidawat ang gitudlo ni Jesus. Ang pagpaminaw dili lamang ang pagkadungog sa mga pulong pinaagi sa imong mga dalunggan. Usa sa unang mga Amahan sa Simbahan, si San Beda, nagpatin-aw nga ang tinuod nga pagpaminaw sa Pulong sa Diyos pinaagi sa atong hunahuna motultol kanato sa paghigugma nianang Pulonga, ug ang paghigugma sa Pulong motultol sa pagsabot. Dili kini makab-ot pinaagi lamang sa paggamit sa salabutan, nga daw ang atong kinaiyanhong mga hiyas mao ang pangunang paagi sa pagsabot sa tanan nga gitudlo ni Jesus. Hinunoa, nagagikan kini sa espirituhanong pagsabot nga madawat pinaagi sa labaw-sa-kinaiyanhong gasa sa Espiritu nga nagtudlo kanato sa tanang butang.
Kon gusto nimong “mas masabtan” ang mga misteryo sa Diyos, itugyan ang imong kaugalingon sa pagtuon ug pagpamalandong sa Balaang Kasulatan pinaagi sa imong hunahuna. Basaha ang Kasulatan, pamalandongi kini ug gamita kini sa imong pag-ampo. Sayon rang malimtan nga ang Pulong sa Diyos usa ka Buhi nga Pulong. Nagpasabot kini nga sa dihang mouslob kita sa Kasulatan uban sa pag-ampo, nagtagbo kita sa Diyos Mismo diha sa pag-ampo. Buhi ang Diyos diha sa Iyang balaang Pulong. Personal nato Siyang mahimamat, ug kini mahitabo lamang pinaagi sa usa ka pinasahing grasya nga kinahanglan andam kitang modawat.
Ang matahom niining pagtulon-an ni Jesus mao nga kon mas masabtan nato ang Iyang Pulong pinaagi niining grasyaha, mas mouslob kita niini, ug magpadayon kini sa pagtubo sulod kanato. Apan kon gamay ra nga panahon ang atong igahin sa pagpamalandong sa Pulong sa Diyos diha sa pag-ampo, magsugod kitang “makalimot,” ingnon ta, sa espirituhanong giladmon sa kaalam sa Diyos. Mawala kanato ang diyutayng pagsabot nga atong nabatonan, ug kon mahitabo kini, mas dali kitang madani sa daghang kalibog ug pagpanglimbong nga mikaylap sa atong kalibotan ug modawat niini.
Pamalandongi karon ang imong batasan sa pagpamalandong sa Kasulatan diha sa pag-ampo. Kon wala pa nimo kini buhata, paghukom nga himoon kini nga imong batasan. Mahimo kang magsugod sa usa sa mga Ebanghelyo ug mopasalig sa pagbasa niini sa hinayhinay matag adlaw uban sa pag-ampo. Ang tumong dili ang paghuman sa pagbasa sa mga basahon sa Bibliya. Ang tumong mao ang lawom nga pagsulod sa matag basahon. Ang matag kapitulo ug matag linya nagtanyag kanato ug lawom nga espirituhanong kahayag ug pagsabot nga nagpaabot lamang nga ihatag ug dawaton. Ipahinungod ang imong kaugalingon niining balaang batasan, ug mahibulong ka sa espirituhanong mga bahandi nga igasa kanimo sa atong Ginoo.
Buhing Pulong sa Dios, akong Ginoo ug akong Hari, nagpasalamat ako Kanimo sa paagi sa Imong pagduol kanako ug sa tanan Nimong mga anak pinaagi sa Imong sinulat nga Pulong. Pun-a ako sa gugma alang nianang Pulonga aron matag adlaw akong ipunting ang akong hunahuna sa lawom nga mga kamatuoran nga gipadayag niini. Hinaot nga mahimamat ko Ikaw, minahal nga Ginoo, ug molalom ang akong pagsabot kon Kinsa Ikaw ug unsa ang buot Nimong ipadayag kanako. Hesus, nagsalig ako Kanimo.
Nobena kang Santa Teresita sa Lisieux: Septiyembre 22-30
Ikaupat nga Adlaw- Septiyembre 25
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
Gipiling hulagway sa ibabaw: Ni Thomas B. gikan sa Pixabay
