Oktubre 17, 2023
Martes sa Ikakawhaan ug Walong Semana sa Ordinaryong Panahon
Mga Pagbasa Karong Adlawa
San Ignacio sa Antioquia, Obispo ug Martir—Handumanan
Adlaw sa Pagpuasa, Paglikay sa Karne, ug Pag-ampo alang sa Kalinaw sa Balaang Yuta
Paminaw sa Iningles
Human makasulti si Jesus, usa ka Pariseo midapit Kaniya sa pagpangaon sa balay niini. Misulod Siya ug mihilig sa lamesa aron mokaon. Nahibulong ang Pariseo sa pagkakita nga wala Niya tumana ang gitakdang pagpanghugas sa wala pa mokaon. Miingon ang Ginoo kaniya, “O kamong mga Pariseo! Bisan tuod inyong gilimpyohan ang gawas sa kopa ug sa plato, sa sulod puno kamo sa pagpanglungkab ug kadaotan. Mga hungog kamo!” Lucas 11:37–40
Lisod handurawon nga si Jesus motawag og hungog sa usa ka tawo. Apan mao gayod kana ang Iyang gibuhat. Kining Pariseo bag-o pa lamang nahuman sa pagpaminaw sa sunodsunod nga mga pagtulon-an ni Jesus, ug unya gidapit niya ang atong Ginoo sa panihapon sa iyang balay, sa usa ka daw buhat sa pagkamaayo. Apan samtang nagpadayon ang asoy, tataw nga kining Pariseo dili higala ni Jesus. Hinunoa, ang iyang pagkamaabiabihon ug pagkamaayo maoy tabon sa kadaotan nga anaa sa iyang kalag.
Nganong ingon man kabangis ang tubag ni Jesus, nga gitawag man Niya ang Pariseo og hungog? Tungod kay kining Pariseo puno sa pagpakaaron-ingnon. Ang iyang mga buhat sa gawas wala maggikan sa usa ka kasingkasing nga puno sa gugma ug pagtuo. Hinunoa, ang iyang mga buhat sa gawas pasundayag lamang. Usa siya ka tigpakaaron-ingnon. Sama sa daghang mga Pariseo, dako kaayo siyag pagtagad sa nagkalainlaing ritwal sa gawas, sama sa estriktong pagpanghugas sa iyang mga kamot sa dili pa mokaon. Nagtuo siya nga ang pagbuhat niini timaan sa iyang pagkabalaan ug pagkasuod sa Diyos. Apan dili diay. Ang iyang kasingkasing puno sa paghukom ug pagpakamatarong sa kaugalingon. Iyang gitamay ang uban ug gibayaw ang iyang kaugalingon. Sa pagbuhat niini, iyang gilimbongan ang uban ug bisan ang iyang kaugalingon.
Ang pangunang mensahe nga angay natong makuha niini mao nga kinahanglan natong tutokan pag-ayo kon unsay anaa sa atong mga kasingkasing. Ang atong mga kasingkasing, ang atong kinabuhi sa kinasuloran, kinahanglan mamulak sa gugma alang sa Diyos ug sa isigkatawo. Kinahanglan natong igugol ang tanan natong paningkamot sa pag-ugmad sa usa ka matinud-anong kinabuhi sa hiyas sa atong kinasuloran. Mahimo kini pinaagi sa pag-ampo ug pagpaubos. Ang pagpaubos moabli sa atong mga mata aron makita ang kamatuoran kon kinsa kita. Ang pag-ampo molig-on kanato aron magbag-o samtang makita nato kon unsay angayng usbon sa atong kinasuloran. Niining paagiha lamang, kon tin-aw na natong makita ang kamatuoran kon kinsa kita ug mainampoon kitang mosalig sa grasya nga nadawat pinaagi sa pag-ampo, mahimo kitang mga tawo nga tinuod nga matarong ug balaan. Ug niana lamang makita sa atong mga buhat sa gawas ang pagkabalaan sa atong kinasuloran.
Pamalandongi karong adlawa kining gamhanang mga pulong ni Jesus: “Mga hungog kamo!” Ayaw kasuko niining mga pulonga; mga pulong kini sa gugma gikan sa atong Ginoo. Kini ang Iyang maisogong paningkamot sa pagpukaw niining Pariseo ug sa paggiya kaniya palayo sa iyang pagpakaaron-ingnon. Paminawa kining mga pulonga nga daw gisulti usab kini kanimo. Ang matag usa kanato mapainubsanong makabenepisyo niining mahigugmaong pagbadlong ni Jesus. Ang matag usa kanato kinahanglan mapainubsanong magpausab sa mas hingpit nga paagi sa atong kinasuloran. Tugoti ang mga pulong ni Jesus nga mosulti kanimo ug mopadayag kanimo sa mga paagi nga kinahanglan kang magbag-o. Tingali ang imong garbo nagdala kanimo sa batasan sa paghukom sa uban diha sa imong kinasuloran. Tingali kini nagbuta kanimo sa mga sala nga kinahanglan nimong ikompisal. Kon maminaw ka niining mga pulonga nga daw gisulti kini kanimo, nan ang kainit sa tinguha ni Jesus motandog kanimo, ug maabli ang imong mga mata aron makita kon unsay anaa sa imong kalag nga kinahanglan usbon. Ayaw kini pakabuta-bungoli. Pag-abli sa imong kaugalingon, pagpaubos ug pagpaminaw.
Akong Ginoo nga nagdilaab sa gugma, nagpahayag Ka og mga pulong sa gugma sa daghang paagi. Usahay malumo Ka ug usahay lig-on Ka. Palihog hatagi ako sa grasya ug pagpaubos nga akong gikinahanglan aron bukas kong modawat sa Imong lig-ong mga pagbadlong nga puno sa gugma. Tabangi ako nga matinud-anong makita ang mga bahin sa akong kinabuhi nga kinahanglan nakong usbon aron ang Imong grasya makabag-o sa akong sulodnong kinabuhi ug moawas ngadto sa akong mga buhat. Gihigugma Ko Ikaw, minahal nga Ginoo. Tabangi ako nga mas mahigugma Kanimo. Jesus, misalig ako Kanimo.
Adlaw sa Pagpuasa, Paglikay sa Karne, ug Pag-ampo alang sa Kalinaw sa Balaang Yuta
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Ignacio sa Antioquia, Obispo ug Martir—Handumanan
Mga Kapilian sa mga Basahon sa Misa
.jpg){kind=link}