Nobyembre 6, 2023
Lunes sa Ikakatloan ug Usa nga Semana sa Ordinaryong Panahon
Mga Pagbasa alang sa Karong Adlawa
Paminaw sa Iningles
“Kon maghikay ka og paniudto o panihapon, ayaw dapita ang imong mga higala, mga igsoon, mga paryente, o mga silingang adunahan, kay basin dapiton usab ka nila ug sa ingon mabayran ka. Hinuon, kon maghikay ka og kombira, dapita ang mga kabos, ang mga may kakulangan sa lawas, ang mga piang, ug ang mga buta; bulahan ka gayod kay dili sila makabalos kanimo.” Lucas 14:12–14
Gisultihan ba kita ni Jesus nga sala ang pagdapit sa mga higala ug pamilya alang sa usa ka panihapon? Dili gayod. Aduna Siyay gitudlo kanato nga mas lawom pa niini. Maayo ang pagpahigayon og panihapon alang sa uban kon gugma ang atong tuyo. Apan kon ang tumong sa panihapon, o sa bisan unsang buhat sa gugmang-putli, mao ang kawang nga himaya, nan ang kakawangan nga atong maangkon gikan nianang buhata mao ra ang bayad nga atong madawat. Ikasubo, daghan ang nangita ug nakaangkon sa “bayad” sa kawang nga himaya sa nagkalainlaing paagi. Ang leksiyon ni Jesus nagtudlo kanato nga ang bugtong tuyo sa atong pagbuhat og maayo kinahanglan mao ang mapaubsanon ug tinagong tuyo sa mahigugmaong pag-alagad.
Tungod sa tentasyon sa garbo, dali ra kitang mabalaka pag-ayo kon unsay hunahuna sa uban mahitungod kanato. Ang pagpahigayon og paniudto o panihapon alang sa mga higala, pamilya, ug sa imong mga silingang adunahan usa lamang ka pananglitan kon giunsa paglihok sa sala sa garbo. Niining kontekstoha, si Jesus nagsulti mahitungod sa usa ka tawo nga nagbuhat og usa ka butang alang lamang sa pagpaayo sa iyang imahe ug sa pagdawat og pagdayeg ug pag-ulog-ulog gikan sa uban. Kini nga matang sa “himaya” tinuod gayong kawang, kay dili lamang kini walay kapuslanan alang sa kaayohan sa kalag, kondili makadaot usab.
Nganong ginabuhat man nimo ang imong ginabuhat? Ginabuhat ba nimo ang imong maayong mga buhat aron makita ug dayegon kini sa uban? Naningkamot ka ba pag-ayo aron ipakita sa mga tawo kon unsa ka kaayo? Nabalaka ka ba pag-ayo sa mga opinyon sa uban? Kon “oo” ang tubag sa bisan hain niining mga pangutanaha, basin mas dako pa diay ang imong pakigbisog sa garbo kay sa imong naamgohan.
Sa kasukwahi, kontento ka ba sa pagbuhat og maayo nga dili makita sa uban? Makakaplag ka ba og kalipay sa pagtabang lamang sa uban, bisan walay bisan kinsa nga nahibalo niini? Nag-alagad ug naghatag ka ba sa imong kaugalingon tungod lamang kay gusto nimong makahatag og maayong kausaban sa kinabuhi sa uban? Mao kini ang gipasabot ni Jesus sa dihang miingon Siya nga kinahanglan kang maghikay og kombira alang sa mga kabos, mga may kakulangan sa lawas, mga piang, mga buta, ug sa tanan nga dili makabalos kanimo. Sa ato pa, kon dili nimo madawat ang “ganti” sa kawang nga himaya, maayo kana. Mao kana ang kinahanglan nimong tumong.
Pamalandongi karon kon unsa kakusog ang imong tinguha nga mahimong inila. Hunahunaa ang usa ka kahimtang diin naghago ka adlaw ug gabii sulod sa pipila ka panahon aron makahimo og maayong buhat. Hunahunaa nga kining maayong buhat nakahatag og dakong kaayohan sa uban. Unya hunahunaa nga walay nasayod nga ikaw ang naghimo niadtong maayong buhat ug, busa, wala kay nadawat nga pasalamat o pag-ila. Unsay imong bation? Angay unta nga magmaya ka tungod sa duha ka hinungdan. Una, magmaya ka kay nakahimo ka sa pag-alagad ug pagdala og kaayohan. Ikaduha, magmaya ka kay ang Dios ug ang Dios lamang ang nasayod sa imong buhat sa gugma. Kon makita sa Dios ang atong kaayo ug walay paghinakog nga pag-alagad, sa usa ka diwa, gibutang Niya ang Iyang Kaugalingon sa pagkautangan kanato. Ang “utang” nga gidawat sa Dios mao ang Iyang pagpasalamat ug gugma nga Iyang gipadayag kanato pinaagi sa walay kataposang mga ganti nga Iyang giandam. Paningkamoti nga maangkon kining walay kataposang mga ganti pinaagi sa pag-alagad sa labing tago ug mapaubsanong mga paagi kutob sa mahimo. Kining mga ganti labaw gayod kaayo sa lumalabay nga mga ganti sa kawang nga himaya.
Labing mahimayaong Dios, mianhi Ka sa yuta aron mag-antos ug mamatay. Pinaagi niadtong buhat sa hingpit nga gugma, Imong gipahinabo ang labing dakong kaayohan nga sukad nahibaloan. Imong gihalad kining balaang pag-alagad sa gugma sa labing tago ug mapaubsanong mga paagi. Tungod niini, gihimaya Ka karon hangtod sa kahangtoran. Tabangi ako sa pagpakig-ambit sa Imong mga buhat sa mapaubsanon ug tinagong pag-alagad aron ako usab, sa umaabot nga adlaw, makaambit sa himaya sa Langit. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapanguhaan alang sa Kwaresma
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
Gipasiugda nga hulagway sa ibabaw: Si Jesus, ilalom sa kahoy Ni Left
