Disyembre 3, 2023
Unang Domingo sa Adbiyento (Tuig B)
Mga Pagbasa Karong Adlawa
Paminaw sa Iningles
“Si Jesus miingon sa iyang mga tinun-an: “Pagmabinantayon! Pagmatngon! Wala kamo mahibalo kon kanus-a moabot ang panahon.” Marcos 13:33
Unsang panahona ang gipasabot sa atong Ginoo? Ang Iyang gipasabot mao ang panahon sa Iyang pag-anhi. Apan kinahanglan sabton nga bisan tuod mianhi Siya kanato kaniadto sa unod, ug bisan tuod mobalik Siya pag-usab sa unod aron paghukom sa mga buhi ug sa mga patay sa kataposan sa panahon, wala gayod Siya mohunong sa pag-anhi kanato adlaw ug gabii pinaagi sa makapausab nga gasa sa grasya. Matinagdanon ka ba niining Iyang pag-anhi? O gipasagdan mo lang nga makalabay ang dili maihap nga mga panalangin sa grasya sa Diyos nga buot Niyang ihatag kanimo matag adlaw, sa tibuok adlaw?
Daghan kaayog mga makabalda sa kalibotan. Mabalda kita sa pagdani sa bahandi, sa pagpatuyang sa atong mga tinguha, ug sa walay hunong nga kasaba sa modernong midya, mga elektronikong gadyet ug uban pa. Kini ug daghan pang ubang mga makabalda matag adlaw makapalisod pag-ayo sa kanunay nga “pagmabinantayon” ug “pagmatngon.” Kini tungod kay limitado ang atong katakos sa pagpunting sa atensiyon. Bisan tuod ang uban makakat-on sa “pagdungan-dungan og mga buluhaton” sa usa ka sukod, walay bisan kinsa nga makapadayon sa pagbahin sa iyang atensiyon tali sa presensiya sa Diyos ug sa mga makabalda sa kalibotan.
Ang uban tingali mangatarongan nga kinahanglan makig-uban sa kalibotan karon. Dili mahimo nga mag-ampo kanunay ug ang Diyos lamang ang hunahunaon. Apan kadtong matintal sa paghunahuna niini wala makasabot sa pagkamaminaw ug pagkamabinantayon nga gitawag kita sa pagkinabuhi.
Ang pagkamabinantayon ug pagkamaminaw nagpasabot lamang nga ang Diyos mao ang sentro sa atong kinabuhi ug ang hinungdan ug katuyoan sa tanan natong gibuhat matag adlaw. Ang atong gugma ug pag-alagad sa Diyos dili mahimong bahinbahinon. Dili nato mahimong igahin ang pipila ka panahon alang sa kalibotan ug ang ubang panahon alang sa Diyos. Hinuon, ang tanan natong gibuhat, matag adlaw, sa tibuok adlaw, kinahanglan nga adunay himaya sa Diyos ug katumanan sa hingpit nga kabubut-on sa Diyos isip sentro ug bugtong katuyoan sa atong kinabuhi. Busa, kon makig-uban kita sa kalibotan, mogamit sa social media, motuman sa mga buluhaton sa panimalay, modugang og mga oras sa trabaho, ug uban pa, kinahanglan kanunay natong pamalandongon kining yano nga pangutana, “Ginoo, gibuhat ko ba kini alang sa Imong himaya ug uyon sa Imong kabubut-on?” Kinahanglan nga dili gayod nato kalimtan ang pagpangutana niini sa atong kaugalingon. Kinahanglan nga kanunay natong himoon ang himaya sa Diyos ug ang katumanan sa Iyang kabubut-on nga sentrong katuyoan ug hinungdan sa tanan natong gibuhat. Kon makakinabuhi kita niining paagiha, atong madiskobrehan nga mas sayon na ang kanunay ug bisan asa nga pagkamaminaw ug pagkamabinantayon sa kabubut-on sa Diyos.
Pamalandongi karong adlawa kon asa nimo kasagarang ipunting ang imong atensiyon. Unsa ang labing kanunay nimong gihunahuna matag adlaw? Unsa ang labing imong gitagad ug gibantayan? Kon ang tubag niana nga pangutana dili ang padayon nga mga pag-aghat sa Diyos ug sa Iyang grasya, nan ilha kana nga kamatuoran. Sa mapaubsanong kasingkasing, pag-ampo nga mausab ka ug makasugod sa pag-ugmad sa usa ka makapausab nga naandang buhat sa pagpunting sa imong atensiyon sa atong Ginoo matag adlaw, aron Siya mahimong imong inadlaw nga giya ug sentro sa tanan nga butang.
Ginoo sa tanang grasya, moanhi Ka kanako adlaw ug gabii, makigsulti kanako, motawag kanako ug magtinguha sa paggiya kanako. Hinaot makat-on ako sa pagpunting sa akong tibuok atensiyon Kanimo matag adlaw aron Ikaw lamang ug ang Imong balaang kabubut-on ang kanunay nga mogiya kanako. Jesus, misalig ako Kanimo.
Nobena sa Imakulada nga Panamkon
Nobyembre 29 – Disyembre 7
Nobena ni San Andres alang sa Pasko
Sa tradisyon, giampo kini 15 ka beses matag adlaw gikan sa Nobyembre 30 hangtod sa Bisperas sa Pasko.
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Francisco Javier, Pari
Dili saulogon isip liturhikanhong handumanan karong tuiga kay natunong kini sa Domingo
Mga Kapilian sa mga Basahon sa Misa
