Makatakod ang Pagkakabig

Biyernes, Enero 5, 2024

Handumanan ni San Juan Neumann, obispo
Sa mga Diyosesis sa Estados Unidos

Paminaw sa Iningles

Nakahukom si Jesus nga moadto sa Galilea, ug iyang nakaplagan si Felipe. Ug miingon si Jesus kaniya, “Sunod Kanako.” Si Felipe taga-Betsaida, ang lungsod nila ni Andres ug Pedro. Nakaplagan ni Felipe si Natanael ug iyang giingnan, “Nakaplagan namo ang gisulat ni Moises sa Balaod, ug sa mga propeta usab: si Jesus nga taga-Nazaret, anak ni Jose.” Juan 1:43–45

Hinumdomi nga sa miaging bahin sa Ebanghelyo ni Juan, miadto si Andres sa iyang igsoon nga si Pedro aron sultihan siya nga iyang nakaplagan ang Mesiyas. Tungod niini, miadto si Pedro aron makigkita kang Jesus ug nahimo usab Niyang tinun-an. Aduna kitay susamang sugilanon sa Ebanghelyo karong adlawa, nga nahitabo wala madugay human niadtong sugilanon sa Ebanghelyo ni Juan. Human tawga ni Jesus si Felipe aron mahimong tinun-an, dihadiha nangita si Felipe sa iyang igsoon nga si Natanael aron ipaambit kaniya ang maayong balita. Tungod niini, human sa mubo nga pakighimamat ni Natanael kang Jesus, nakabig si Natanael ug miingon, “Rabbi, Ikaw ang Anak sa Dios; Ikaw ang Hari sa Israel.”

Sa usa ka diwa, makaingon kita nga makatakod ang pagkakabig. Sa dihang tawgon sa Dios ang usa ka maayo ug mapaubsanong kalag sa pagsunod Kaniya ug kini motubag, kana nga tawo halos kanunayng madasig sa pagpaambit sa iyang pagkakabig ngadto sa uban niyang gihigugma. Ug kon ipaambit niya ang pagkakabig sa iyang kasingkasing ngadto sa laing tawo, kining iyang gihigugma kasagarang mainteres usab, ug tingali makabig pa gani.

Makatakod gayod ang pagkakabig! Kini tungod kay sa dihang makaila kita sa Dios, mahigugma Kaniya ug mopili sa pagsunod Kaniya, ang kalipay ug lig-ong pagtuo nga naggikan sa pagkakabig sa atong kasingkasing natural natong gustong ipaambit sa uban. Gusto natong masinati usab sa uban ang espirituhanong kalinaw ug kalipay nga atong nakaplagan, pinaagi sa pag-ila kang Kristo uban kanato.

Busa motungha kini nga pangutana: Nakaimpluwensya ba sa uban nga anaa sa imong kinabuhi ang imong gugma sa Dios? Kon “Oo” ang tubag, kini angay nimong ipasalamat. Apan kon “Dili” ang tubag, tingali angay pamalandongan kon nganong wala. Bisan kon dili gayod kini imong sala, maayo nga susihon kon gitugotan ba una nimo ang imong kaugalingon nga tinuod nga makasinati og lawom nga pagkakabig ngadto kang Kristo, ug dayon pamalandongan kon bukas ba ka sa pagpaambit sa sulod sa imong kasingkasing ngadto sa uban.

Busa sugdi sa unang pangutana. Gitugotan ba nimo ang imong kaugalingon nga tinuod nga moagi sa pagkakabig ngadto kang Kristo? Adunay nagkalainlaing ang-ang sa pagkakabig. Sa sinugdan, ang pagkakabig mousab sa direksyon sa atong kinabuhi pinaagi sa pag-abli sa atong mga mata aron makita ang tinuod nga mahinungdanon sa kinabuhi. Atong madiskobrehan ang himaya sa Dios ug ang katagbawan nga naggikan sa pagdawat ug pagtuman sa Iyang kabubut-on. Kon mahitabo kini, ang kalag nga nakasinati sa unang pagkakabig kasagarang magsugod sa pagtalikod sa tanang bug-at nga sala, sa pag-ampo, sa pagbasa sa Balaang Kasulatan, ug sa pagpakita niini nga mga kausaban ngadto sa uban.

Apan ang pagkakabig dili kay kausa lamang mahitabo. Pananglitan, si San Juan de la Cruz detalyadong nagpatin-aw nga samtang ang usa ka tawo mouswag sa kinabuhi sa pagkabalaan, moabot ang panahon nga kinahanglan siyang moagi sa usa ka bag-o gayod nga pagkakabig. Ang iyang pagsunod kang Kristo mogiya kaniya ngadto sa laing mas lawom nga kausaban sa kinabuhi. Ayaw katagbaw sa unang pagkakabig lamang. Tinguhaa usab ang padayong proseso sa pagbag-o nga gikinahanglan sa pagpasalig sa pagsunod kang Kristo.

Mahitungod sa ikaduhang pangutana, kon ang imong kaugalingong pagkakabig nakadasig ba o wala sa imong mga gihigugma sa pagsunod kang Kristo, pag-ampo lamang nga gamiton ka sa Dios sumala sa Iyang kabubut-on. Magmabukas Kaniya, ayaw kahadlok sa pagpaambit sa sulod sa imong kasingkasing, ug paningkamoti nga mosidlak gikan sa imong kaugalingong kinabuhi ang kalipay sa pagsunod kang Kristo. Kon bukas ang uban, tandogon sila sa Dios pinaagi kanimo.

Pamalandongi karon kining duha ka sukaranang pangutana bahin sa espirituhanong kinabuhi, ug itugyan pag-usab ang imong kaugalingon sa tibuok kinabuhing proseso sa pagbag-o, ingon man sa pagkaandam nga tugotan ang Dios sa pagtandog sa uban pinaagi kanimo. Sa kataposan, kining duha ra gayod ang hinungdanon sa kinabuhi ug alang sa kahangtoran.

Ginoo sa tanang pagkabalaan, palihog padayon akong daniha nga mas maduol Kanimo. Tabangi ako sa pagkakabig sa akong kinabuhi, sa pagtalikod sa tanang sala, ug sa pagpili sa pagsunod Kanimo sa tibuok kong kasingkasing. Tabangi usab ako nga magpabiling bukas sa akong panaw sa pagtuo aron makita sa uban ang tanan Nimong gibuhat dinhi kanako ug madawat nila ang Imong pagdapit, pinaagi kanako, sa pagsunod Kanimo. Jesus, misalig ako Kanimo.

Santos sa Adlaw:
San John Neumann, Obispo

Basaha online nga libre!