Umari Kamo, ug Inyong Makita

Huwebes, Enero 4, 2024

Paminaw sa Iningles

Miingon sila Kaniya, “Rabbi” (nga kon hubaron nagpasabot og Magtutudlo), “diin Ka nagpuyo?” Miingon Siya kanila, “Umari kamo, ug inyong makita.” Busa miadto sila ug nakita nila ang Iyang gipuy-an, ug nagpabilin sila uban Kaniya nianang adlawa. Juan 1:38–39

Pagkamakapaikag niining panag-estoryaha. Si Andres maoy usa sa duha ka tinun-an ni Juan Bautista nga nakadungog kang Juan nga miingon nga si Hesus mao ang “Kordero sa Diyos.” Tungod niini, gibiyaan ni Andres ug sa laing tinun-an si Juan Bautista ug misugod sila sa paglakaw sunod kang Hesus. Sa pagsugod nila pagsunod kang Hesus, milingi Siya kanila ug nangutana kon unsa ang ilang gipangita. Ug ang ilang tubag, nga gisundan sa pagdapit ni Hesus, gitala sa ibabaw.

Talagsaon ang pagdapit ni Hesus: “Umari kamo, ug inyong makita.” Tungod nianang pagdapit, kining duha ka tinun-an miadto ug nagpabilin uban kang Hesus nianang adlawa. Apan dili kay mao ra kadto ang nahitabo. Tin-aw sa mosunod nga teksto nga pinaagi sa ilang pagpabilin uban kang Hesus nianang adlawa, kining duha ka tinun-an mituo kon kinsa gayod si Hesus. Sa unahan sa teksto, miadto si Andres sa iyang igsoon nga si Pedro aron sultihan siya, “Nakaplagan namo ang Mesiyas.” Unsa kaha ang nahitabo sa ilang adlaw uban kang Hesus nga nakapakombinsir kanila kon kinsa gayod Siya?

Bisan tuod wala gilakip sa Ebanghelyo ang mga detalye sa ilang pagpabilin uban kang Hesus, daw tin-aw nga ang yano nga pag-uban diha sa presensiya ni Hesus mao ra ang gikinahanglan niining mga tinun-an. Pamalandongi pag-usab ang duha ka bahin sa pagdapit ni Hesus: “Umari kamo…” nga gisundan sa “ug inyong makita.”

Sa dihang mosulti ang atong Ginoo sa matag usa kanato, susama gayod niini ang Iyang pagdapit. Una, dapiton kita Niya sa pag-uban Kaniya. Kinahanglan kitang moadto sa dapit diin nagpuyo si Hesus. Asa man kana? Alang kanato, dili kini kinahanglan nga usa ka pisikal nga dapit; kondili, una sa tanan, usa kini ka dapit sa pag-ampo. Kinahanglan natong madungog si Hesus nga nagdapit kanato sa pagduol Kaniya pinaagi sa sulodnong panaw sa personal nga pag-ampo. Didto, sa kahiladman sa atong kalag, makapahulay kita uban sa atong Ginoo. Gidapit kita Niya sa yano nga pagpabilin didto sa Iyang balaang presensiya.

Sa dihang moduol kita Kaniya ug mopahulay uban Kaniya diha sa Iyang presensiya, adunay laing mahitabo: “ug inyong makita.” Makita nato Siya, mailhan nato Siya, malamdagan kita Niya ug motuo kita Kaniya. Sa sinugdan, mahitabo kini pinaagi sa Iyang gipamulong nga Pulong. Sa kataposan, mahitabo kini pinaagi sa usa ka sulodnong pagpadayag nga madawat lamang nato diha sa pag-ampo.

Pamalandongi karon kining malumo nga pagdapit nga gihatag sa atong Ginoo niining mga tinun-an. Samtang imong gipamalandongan kining mga pulonga, paminawa kini nga gipamulong usab alang kanimo. Sa sinugdan, paggahin og panahon sa pagpamalandong lamang sa pulong nga “umari.” Tugoti kini nga motuhop sa imong kalag. Tugoti kini nga mahimong lawom nga personal alang kanimo. Hibaloi nga kini usa ka tinuod ug mahigugmaong pagdapit gikan kang Hesus. Human niana, paningkamoti nga mogahin og panahon sa pagpamalandong sa mga pulong nga “ug inyong makita.” Unsa man ang buot sa Diyos nga imong makita? Unsang personal nga pagpadayag sa pagtuo ang buot ihatag sa Diyos kanimo? “Umari kamo, ug inyong makita.” Tugoti kining mga pulonga nga mousab sa imong kinabuhi, sama nga giusab niini ang kinabuhi niining unang mga tinun-an sa atong Ginoo.

Ginoo, padayon Mo akong gidapit sa pagduol Kanimo, sa pagpakig-uban Kanimo ug sa paglingkod uban Kanimo diha sa Imong balaang presensya. Palihog tabangi ako nga madungog kining malumong pagdapit sa Imong gugma. Sa akong pagpaminaw niini, palihog ablihi ang mga mata sa akong kalag aron makita Ka, mailhan Ka ug mahigugma Kanimo sa mas hingpit nga paagi. Ug sa akong pagtan-aw Kanimo, hatagi ako sa grasya ug kusog sa pagsunod Kanimo bisan asa Mo ako dad-a. Hesus, nagsalig ako Kanimo.

Bag-o alang sa 2024!