Abril 5, 2024
Biyernes sulod sa Oktaba sa Pasko sa Pagkabanhaw
Mga Pagbasa Karong Adlawa
Paminaw sa Iningles
Miingon si Jesus kanila, “Dali, pamahaw kamo.” Ug walay usa sa mga tinun-an nga nangahas sa pagpangutana Kaniya, “Kinsa Ka?” kay nahibalo sila nga kadto mao ang Ginoo. Miduol si Jesus, mikuha sa pan ug mihatag niini kanila, ug ingon usab sa isda. Kini mao na ang ikatulong higayon nga nagpakita si Jesus sa Iyang mga tinun-an human Siya banhawa gikan sa mga patay. Juan 21:12–14
Ang mga pagpakita ni Jesus human sa Iyang Pagkabanhaw naputos sa misteryo. Dili kini misteryo nga makapalibog, kondili misteryo sa hilabihang kalalom nga makapukaw og dakong pagtahod ug kahingangha. Niining ikatulong higayon nga nagpakita si Jesus sa Iyang mga tinun-an, una Siyang misulti kanila gikan sa baybayon human sila mangisda sa tibuok gabii nga walay nakuha. Gisultihan Niya sila nga mosulay pag-usab ug itaktak ang pukot sa tuong bahin sa sakayan. Gibuhat nila kini bisan wala sila makahibalo nga si Jesus diay ang nakigsulti kanila. Apan sa dihang nakakuha silag isda nga labaw pa sa ilang makaya, nakaamgo sila nga kadto mao ang Ginoo.
Ang “misteryo” niining pagpakita ni Jesus human sa Iyang pagkabanhaw adunay daghang aspeto. Nganong wala man dayon mailhi sa mga tinun-an si Jesus? Nganong gisugo man sila ni Jesus nga itaktak ang pukot sa tuong bahin sa sakayan? Nganong nailhan man si Jesus pinaagi niining pagkakuha og usa ka gatos ug kalim-an ug tulo ka dagkong isda? Nganong nagluto man si Jesus og pamahaw alang sa mga tinun-an didto sa baybayon? Ug nganong gisulat man ni Juan nga “walay usa sa mga tinun-an nga nangahas sa pagpangutana Kaniya, ‘Kinsa Ka?’” Bisan tuod kining tanang misteryo adunay mga tubag nga gitanyag sa mga santos ug sa bantogang mga tighubad sa Balaang Kasulatan sulod sa daghang siglo, mapuslanon usab nga pamalandongan lamang nato ang kamatuoran nga ang mga pagpakita ni Jesus human sa Iyang pagkabanhaw sa pagkatinuod naputos sa misteryo.
Sa usa ka nobelang misteryo, ang magbabasa hatagan og nagkalainlaing dili klarong mga timailhan aron matabangan siyang makasabot ug makasulbad sa misteryo. Gituyo nga dili klaro ang mga timailhan aron mas makalingaw ug mahagit ang magbabasa sa pagsulbad niini. Apan kon mahitungod na sa usa ka “misteryo sa pagtuo,” sama sa misteryo sa pagtuo nga naglibot sa mga pagpakita ni Jesus human sa Iyang pagkabanhaw, lahi gayod kini nga matang sa misteryo. Niining mga kahimtanga, ang misteryo adunay kalalom ug kalapad, ug kini makadani kanato nga mosulod pa gayod sa walay kinutobang kinaiya sa Dios ug sa Iyang buhat sa pagluwas.
Tagda, pananglitan, kining usa ka linya nga gikutlo sa ibabaw: “Ug walay usa sa mga tinun-an nga nangahas sa pagpangutana Kaniya, ‘Kinsa Ka?’ kay nahibalo sila nga kadto mao ang Ginoo.” Daw nagtigom ang mga tinun-an palibot kang Jesus samtang nag-andam Siya og pamahaw sa baybayon, ug nanglingkod sila didto nga puno sa dakong pagtahod ug kahingangha Kaniya. Ang ilang hilom nga pagtahod ug kahingangha Kaniya niining Iyang pagpakita nagpadayag nga dili igo ang mga pulong. Kasagaran, kon makakita ka og usa ka tawo nga nalipay kang makita, motimbaya ka kaniya ug mosugod sa pagpakigsulti, mangumusta, ug uban pa. Apan dinhi, ang mga tinun-an nagpabilin niining balaang pagtahod ug kahingangha, naminaw Kaniya, midawat niining pagkaona, ug namalandong sa misteryo sa Iyang presensya ingon nga Nabanhaw.
Pamalandongi karon ang mga paagi sa pagduol kanimo sa atong Ginoo. Sayon ra nga dili nato Siya mamatikdan kay ang Iyang padayong presensya sa atong kinabuhi usa usab ka misteryo. Hunahunaa kon wala pa tagda sa mga tinun-an ang tawag ni Jesus nga “Isalibay ang pukot sa tuong kilid sa sakayan…” Kon wala pa nila tumana kana nga sugo, tingali wala gayod nila mailhi nga ang Ginoo diay kadto. Pamalandongi ang mga paagi sa pagpakigsulti kanimo sa atong Ginoo. Motubag ka ba? Mailhan ba nimo Siya? Motugot ka ba nga madani ka ngadto niining balaang kahingangha ug pagtahod sa Iyang diosnong presensya? Sunda ang panig-ingnan sa mga tinun-an ug magmaabtikon sa pag-ila sa padayong presensya sa atong Ginoo sa imong palibot.
Akong diosnong Ginoo, anaa Ka kanunay uban kanako, adlaw ug gabii, apan sa makadaghan wala ko Ikaw mamatikdi ug simbaa. Tabangi ako nga mas makaamgo sa Imong presensya sa akong kinabuhi. Samtang nagabuhat ako niini, tabangi ako nga mas lawom nga mosulod niining balaang mga misteryo uban sa gugma, debosyon ug matinahurong kahingangha. Jesus, misalig ako Kanimo.
Dugang pa alang sa Pasko sa Pagkabanhaw
Ikawalong Adlaw: Nobena sa pagpangandam alang sa Domingo sa Balaang Kalooy
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Vicente Ferrer, Pari
(Dili saulogon isip liturhikanhong handumanan karong tuiga kay natunong kini sulod sa Oktaba sa Pasko sa Pagkabanhaw)
Mga Kapilian sa mga Basahon sa Misa
Mga Pamalandong sa Balaang Kasulatan alang sa Panahon sa Pasko sa Pagkabanhaw
