ಭಾನುವಾರ, ಸೆಪ್ಟೆಂಬರ್ 8, 2019
ಸಾಮಾನ್ಯ ಕಾಲದ ಇಪ್ಪತ್ತಮೂರನೆಯ ಭಾನುವಾರ, ವರ್ಷ C
ಪೂಜ್ಯ ಕನ್ಯಾಮರಿಯಮ್ಮನ ಜನನ – ಹಬ್ಬ
“ನಿಮ್ಮಲ್ಲಿ ಯಾವನಾದರೂ ಒಂದು ಗೋಪುರವನ್ನು ಕಟ್ಟಲು ಬಯಸಿದರೆ, ಅದನ್ನು ಪೂರ್ಣಗೊಳಿಸಲು ಸಾಕಷ್ಟು ಹಣವಿದೆಯೇ ಎಂದು ನೋಡಲು ಮೊದಲು ಕುಳಿತು ವೆಚ್ಚವನ್ನು ಲೆಕ್ಕಹಾಕುವುದಿಲ್ಲವೇ?” ಲೂಕ 14:28
ಪ್ರಭು ನಿಮ್ಮಿಂದ ಬಯಸುವ ಎಲ್ಲದಕ್ಕೂ ನೀವು ಸಿದ್ಧರಾಗಿದ್ದೀರಾ? ಮೇಲಿನ ಈ ಚಿಕ್ಕ ಪ್ರಶ್ನೆಯ ಮೂಲಕ ನೀವು ಸಿದ್ಧರಾಗಿರಬೇಕು ಎಂದು ಯೇಸು ಹೇಳುತ್ತಿದ್ದಾರೆ. ನೀವು ಒಂದು ಗೋಪುರವನ್ನು ಕಟ್ಟಬೇಕೆಂದಿದ್ದರೆ, ಅದನ್ನು ಪೂರ್ಣಗೊಳಿಸಲು ಬೇಕಾದಷ್ಟು ಸಂಪನ್ಮೂಲಗಳು ನಿಮ್ಮಲ್ಲಿವೆಯೆಂದು ಖಚಿತಪಡಿಸಿಕೊಂಡು, ಮುಂದಾಗಿಯೇ ಯೋಜಿಸುವಷ್ಟು ವಿವೇಕಿಗಳಾಗಿರುತ್ತೀರಿ ಎಂದು ಆಶಿಸಬಹುದು. ಆಧ್ಯಾತ್ಮಿಕ ಜೀವನದಲ್ಲಿಯೂ ಹಾಗೆಯೇ. ಕ್ರಿಸ್ತನನ್ನು ಅನುಸರಿಸುವ ಆಯ್ಕೆಯನ್ನು ಮಾಡಲು ನಮಗೆ ಬೇಕಾದ ಎಲ್ಲ ಸಂಪನ್ಮೂಲಗಳೂ ನಮ್ಮಲ್ಲಿವೆ ಎಂದು ಖಚಿತಪಡಿಸಿಕೊಳ್ಳುವುದು ಅತ್ಯಗತ್ಯ.
ಇದು, “ಕ್ರಿಸ್ತನನ್ನು ಅನುಸರಿಸಲು ನನಗೆ ಯಾವ ಸಂಪನ್ಮೂಲಗಳು ಬೇಕು?” ಎಂಬ ಪ್ರಶ್ನೆಯನ್ನು ಎತ್ತುತ್ತದೆ. ಉತ್ತರ ಸರಳವಾಗಿದೆ. ಈ ಸುವಾರ್ತೆಯ ಕೊನೆಯಲ್ಲಿ ಯೇಸು ಹೀಗೆ ಹೇಳುತ್ತಾರೆ: “ಅದೇ ರೀತಿಯಲ್ಲಿ, ನಿಮ್ಮಲ್ಲಿ ಯಾವನಾದರೂ ತನ್ನ ಆಸ್ತಿಪಾಸ್ತಿಗಳನ್ನೆಲ್ಲ ತ್ಯಜಿಸದಿದ್ದರೆ ಅವನು ನನ್ನ ಶಿಷ್ಯನಾಗಲಾರನು” (ಲೂಕ 14:33). ಬೇರೆ ಮಾತಿನಲ್ಲಿ ಹೇಳುವುದಾದರೆ, ನಮ್ಮ ಜೀವನದಲ್ಲಿ ದೇವರ ಚಿತ್ತವನ್ನು ನೆರವೇರಿಸಲು ಬೇಕಾದುದೆಲ್ಲವೂ ನಮಗೆ ದೊರೆಯಬೇಕೆಂದರೆ, ನಾವು ಎಲ್ಲವನ್ನೂ ದೇವರಿಗೆ ಸಮರ್ಪಿಸಬೇಕು.
ಕ್ರಿಸ್ತನ ಶಿಷ್ಯರಾಗಿರುವುದು ನಾವು ಅರೆಮನಸ್ಸಿನಿಂದ ಮಾಡಬಹುದಾದ ಕೆಲಸವಲ್ಲ; ಅನೇಕರು ಹಾಗೆ ಮಾಡಲು ಪ್ರಯತ್ನಿಸಿದರೂ ಅದು ಸಾಧ್ಯವಿಲ್ಲ. ನಾವು ಅವರನ್ನು ಅನುಸರಿಸಲು ಆಯ್ಕೆಮಾಡುವಾಗ, ಅದು ಪೂರ್ಣಹೃದಯದಿಂದಲೇ ಆಗಿರಬೇಕು. ಅಂದರೆ, ನಾವು ನಮ್ಮನ್ನು ಸಂಪೂರ್ಣವಾಗಿ ತೊಡಗಿಸಿಕೊಳ್ಳಬೇಕು. ಇಲ್ಲದಿದ್ದರೆ, ನಮ್ಮ ಪ್ರಭು ನಮ್ಮಿಂದ ಕೇಳುವ ಎಲ್ಲವನ್ನೂ ನೆರವೇರಿಸಲು ನಮಗೆ ಎಂದಿಗೂ ಸಾಧ್ಯವಾಗುವುದಿಲ್ಲ. ಅವರು ನಮ್ಮಿಂದ ಎಲ್ಲವನ್ನೂ ಬಯಸುತ್ತಾರೆ ಎಂಬ ಅರ್ಥದಲ್ಲಿ ಅವರು ನಮ್ಮಿಂದ ಬಹಳಷ್ಟನ್ನು ಅಪೇಕ್ಷಿಸುವ ದೇವರು. ಆದರೆ ನಮ್ಮ ಪ್ರಭುವಿನ ಈ ಅಪೇಕ್ಷೆ ಸಂಪೂರ್ಣವಾಗಿ ನಮ್ಮ ಒಳಿತಿಗಾಗಿಯೇ ಇದೆ. ನಾವು ಜೀವನದಲ್ಲಿ ಸಂತೋಷ ಮತ್ತು ಸಾರ್ಥಕತೆಯನ್ನು ಬಯಸುವುದಾದರೆ, ಅವರಿಗೆ ಎಲ್ಲವನ್ನೂ ಕೊಡಬೇಕು.
ನಿಮ್ಮ ಜೀವನದ ಪ್ರತಿಯೊಂದು ಅಂಶವನ್ನೂ ಕ್ರಿಸ್ತನಿಗೆ ಅರ್ಪಿಸಲು ನೀವು ಎಷ್ಟು ಸಿದ್ಧರಾಗಿದ್ದೀರಿ ಮತ್ತು ಮನಸ್ಸುಳ್ಳವರಾಗಿದ್ದೀರಿ ಎಂಬುದನ್ನು ಇಂದು ಧ್ಯಾನಿಸಿ. ಏನೇ ಆದರೂ ಅವರಿಗೆ “ಹೌದು” ಎಂದು ಹೇಳಲು ನೀವು ಸಿದ್ಧರಿದ್ದೀರಾ? ಅವರು ಕೇಳಿದರೆ, ಯಾವುದನ್ನೂ ನಿಮಗಾಗಿ ಉಳಿಸಿಕೊಳ್ಳದೆ “ನಿಮ್ಮ ಆಸ್ತಿಪಾಸ್ತಿಗಳನ್ನೆಲ್ಲ ತ್ಯಜಿಸಲು” ನೀವು ಸಿದ್ಧರಿದ್ದೀರಾ? ನಿಮ್ಮ ಬಳಿ ಅನೇಕ ವಸ್ತುಗಳಿರಬಹುದು. ನಮ್ಮ ಪ್ರಭು ನಿಮ್ಮ ಎಲ್ಲ ಆಸ್ತಿಪಾಸ್ತಿಗಳನ್ನು ಅಕ್ಷರಶಃ, ಭೌತಿಕವಾಗಿ ಬಿಟ್ಟುಬಿಡಲು ನಿಮ್ಮನ್ನು ಕರೆಯದಿರಬಹುದು. ಆದರೂ ನಿಮ್ಮಲ್ಲಿರುವುದೆಲ್ಲವನ್ನೂ ನಿಮ್ಮ ಇಡೀ ಅಸ್ತಿತ್ವವನ್ನೂ ನೀವು ಅವರಿಗೆ ಸಮರ್ಪಿಸಬೇಕು. ಆಗ ಮಾತ್ರ ಅವರ ಅತ್ಯಂತ ಮಹಿಮಾನ್ವಿತ ಚಿತ್ತವನ್ನು ನೆರವೇರಿಸಲು ನಿಮಗೆ ಬೇಕಾದುದನ್ನು ಅವರು ನೀಡಬಲ್ಲರು.
ಕರ್ತನೇ, ನನ್ನ ಜೀವನ ನಿಮ್ಮದು. ನನ್ನ ಜೀವನದ ಎಲ್ಲವನ್ನೂ ಏನನ್ನೂ ಉಳಿಸಿಕೊಳ್ಳದೆ ನಿಮಗೆ ಸಮರ್ಪಿಸುವ ಅನುಗ್ರಹವನ್ನು ದಯಪಾಲಿಸಿ. ನನ್ನ ಜೀವನವನ್ನು, ನನ್ನ ಹಣಕಾಸನ್ನು, ನನ್ನ ಆಸ್ತಿಪಾಸ್ತಿಗಳನ್ನು, ನನ್ನ ಕುಟುಂಬವನ್ನು, ನನ್ನ ದುಡಿಮೆಯನ್ನು ಮತ್ತು ನನ್ನ ಸಂಪೂರ್ಣ ಭವಿಷ್ಯವನ್ನು ನಿಮಗೆ ಸಮರ್ಪಿಸುತ್ತೇನೆ. ಪ್ರಿಯ ಕರ್ತನೇ, ಎಲ್ಲವೂ ನಿಮ್ಮದು. ನಿಮ್ಮ ಚಿತ್ತದಂತೆ ನನ್ನನ್ನು ನಡೆಸಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ದಿನದ ಸಂತ – ಪೂಜ್ಯ ಕನ್ಯಾಮರಿಯಮ್ಮನ ಜನನ
