ಡಿಸೆಂಬರ್ 15, 2019
ಆಗಮನ ಕಾಲದ ಮೂರನೇ ಭಾನುವಾರ
ಇಂದಿನ ವಾಚನಗಳು
ಯೋಹಾನನು ಅವರೆಲ್ಲರಿಗೆ ಉತ್ತರವಾಗಿ ಹೀಗೆಂದನು: “ನಾನು ನಿಮಗೆ ನೀರಿನಿಂದ ಜ್ಞಾನಸ್ನಾನ ಮಾಡಿಸುತ್ತಿದ್ದೇನೆ. ಆದರೆ ನನಗಿಂತ ಶಕ್ತಿಶಾಲಿಯಾದವರು ಬರುತ್ತಿದ್ದಾರೆ. ಅವರ ಪಾದರಕ್ಷೆಗಳ ಬಾರುಗಳನ್ನು ಬಿಚ್ಚುವುದಕ್ಕೂ ನಾನು ಯೋಗ್ಯನಲ್ಲ. ಅವರು ನಿಮಗೆ ಪವಿತ್ರಾತ್ಮರಿಂದಲೂ ಅಗ್ನಿಯಿಂದಲೂ ಜ್ಞಾನಸ್ನಾನ ಮಾಡಿಸುವರು. ತಮ್ಮ ಕಣವನ್ನು ಸ್ವಚ್ಛಗೊಳಿಸಿ, ಗೋದಿಯನ್ನು ತಮ್ಮ ಕಣಜದಲ್ಲಿ ಸಂಗ್ರಹಿಸಲು ಅವರ ಕೈಯಲ್ಲಿ ತೂರುಮೊರವಿದೆ. ಆದರೆ ಹೊಟ್ಟನ್ನು ಆರದ ಅಗ್ನಿಯಲ್ಲಿ ಸುಟ್ಟುಬಿಡುವರು.” ಲೂಕ 3:16-17
ಈ ಭಾನುವಾರವೂ ಸಂತ ಸ್ನಾನಿಕ ಯೋಹಾನನ ಮಹಿಮಾಭರಿತ ಸಾಕ್ಷ್ಯವನ್ನು ನಮಗೆ ನೀಡಲಾಗಿದೆ. ಮೇಲಿನ ಈ ವಾಕ್ಯಭಾಗವು ಆರಾಧನಾ ವಾಚನಚಕ್ರದ C ವರ್ಷದ್ದು. ಆದರೆ A & B ವರ್ಷಗಳಲ್ಲಿಯೂ ಸ್ನಾನಿಕ ಯೋಹಾನನನ್ನು ನಮ್ಮ ಮುಂದೆ ಪ್ರಸ್ತುತಪಡಿಸಲಾಗುತ್ತದೆ.
ಯೋಹಾನನು ತನ್ನ ಈ ಬೋಧನೆಯಲ್ಲಿ, ಯೇಸು ಬಂದು “ಪವಿತ್ರಾತ್ಮರಿಂದಲೂ ಅಗ್ನಿಯಿಂದಲೂ” ಜ್ಞಾನಸ್ನಾನ ಮಾಡಿಸುವರು ಎಂದು ಹೇಳುತ್ತಾನೆ. “ಅಗ್ನಿಯಿಂದ” ಜ್ಞಾನಸ್ನಾನ ಹೊಂದುವ ಈ ಚಿತ್ರಣವು ಧ್ಯಾನಿಸಲು ಯೋಗ್ಯವಾದದ್ದು. ಯೇಸು ನಮ್ಮ ಆತ್ಮಗಳಿಗೆ ಬಯಸುವ ಆಳವಾದ ಶುದ್ಧೀಕರಣವನ್ನು ಇದು ವಿಶೇಷವಾಗಿ ನಮಗೆ ತಿಳಿಸುತ್ತದೆ.
ಶುದ್ಧೀಕರಿಸಲ್ಪಡುವುದು ಎಂದರೆ ಏನು? ಮೊದಲನೆಯದಾಗಿ, ನಮ್ಮ ಆತ್ಮದ ಶುದ್ಧೀಕರಣವು ನೋವನ್ನು ಉಂಟುಮಾಡುತ್ತದೆ. ಆದರೆ ಅದು ಒಂದು ರೀತಿಯ ಮಧುರವಾದ ನೋವು. ಪಾಪದಿಂದ ವಿಮುಖರಾಗಿ ದೇವರಿಗೆ ಇನ್ನಷ್ಟು ಹತ್ತಿರವಾಗಲು ದೊಡ್ಡ ತ್ಯಾಗ ಮತ್ತು ಶರಣಾಗತಿ ಬೇಕಾಗುತ್ತದೆ. ನಮ್ಮೊಳಗೆ ಮಹತ್ಕಾರ್ಯಗಳನ್ನು ಮಾಡಲು ನಾವು ದೇವರಿಗೆ ಅವಕಾಶ ನೀಡಬೇಕಾಗುತ್ತದೆ. ದೇವರು ಮಾಡಲು ಬಯಸುವ ಅತ್ಯಂತ ಮಹತ್ತರವಾದ ಕಾರ್ಯವೆಂದರೆ ನಮ್ಮನ್ನು ಶುದ್ಧೀಕರಿಸುವುದೇ.
ನಾವು ಮರಣಹೊಂದಿದ ಬಳಿಕ ಶುದ್ಧಿಸ್ಥಳವಿದೆ ಎಂಬ ಸತ್ಯವನ್ನು ನಮ್ಮ ಕ್ಯಾಥೊಲಿಕ್ ವಿಶ್ವಾಸವು ನಮಗೆ ತಿಳಿಸುತ್ತದೆ. ಶುದ್ಧಿಸ್ಥಳವು ತೀವ್ರವಾದ ಆಧ್ಯಾತ್ಮಿಕ ನೋವಿನ ಸ್ಥಳವೆಂದು ಹೇಳಲಾಗುತ್ತದೆ. ಆದರೆ ಇಲ್ಲಿಯೂ ಆ ನೋವು ಒಂದು ರೀತಿಯಲ್ಲಿ ಮಧುರವಾದದ್ದೇ. ನಾವು ಅಂಟಿಕೊಂಡಿರುವ, ಆದರೆ ದೇವರು ನಾವು ಬಿಟ್ಟುಬಿಡಬೇಕೆಂದು ಬಯಸುವ ಎಲ್ಲದರಿಂದ ನಮ್ಮನ್ನು ಬಿಡಿಸುವುದರಿಂದ ಅದು ನೋವುಂಟುಮಾಡುತ್ತದೆ. ನಾವು ಯಾರೆಂಬುದರಲ್ಲಿ ಮತ್ತು ನಾವು ಯಾವುದನ್ನು ಪ್ರೀತಿಸುತ್ತೇವೆ ಎಂಬುದರಲ್ಲಿ ಸಂಪೂರ್ಣ ಪರಿವರ್ತನೆಗೆ ಒಳಗಾಗುವುದರಿಂದ ಅದು ನೋವುಂಟುಮಾಡುತ್ತದೆ. ನಾವು ದೇವರನ್ನು, ದೇವರನ್ನು ಮಾತ್ರವೇ ಪ್ರೀತಿಸಲು ಕಲಿಯುತ್ತೇವೆ. ದೇವರ ಮೇಲಿನ ನಮ್ಮ ಪ್ರೀತಿಯಲ್ಲಿ ಒಂದಾಗುತ್ತಾ, ನಾವು ಎಲ್ಲ ಜನರನ್ನೂ ಪ್ರೀತಿಸುವವರಾಗುತ್ತೇವೆ.
ಅದು ಮಧುರವೂ ಆಗಿದೆ. ಏಕೆಂದರೆ ನಾವು ಶುದ್ಧೀಕರಿಸಲ್ಪಡುತ್ತಾ ಹೋದಂತೆ, ದೇವರಿಗೆ ಅಪಾರವಾಗಿ ಹತ್ತಿರವಾಗುತ್ತೇವೆ ಮತ್ತು ಪವಿತ್ರತೆಯಲ್ಲಿ ಬೆಳೆಯುತ್ತೇವೆ. ಇದು ಪಾಪದ ಹೊರೆಯನ್ನು ತೆಗೆದುಹಾಕಿ, ನಾವು ಪ್ರೀತಿಸಬೇಕಾದ ರೀತಿಯಲ್ಲಿ ಪ್ರೀತಿಸಲು ನಮ್ಮನ್ನು ಸ್ವತಂತ್ರರನ್ನಾಗಿಸುತ್ತದೆ.
ಆದರೆ ನಮ್ಮ ಶುದ್ಧೀಕರಣವು ಶುದ್ಧಿಸ್ಥಳದಲ್ಲೇ ಆರಂಭವಾಗಬೇಕೆಂದಿಲ್ಲ. ಇಲ್ಲಿಯೇ, ಈಗಲೇ ಆ ಶುದ್ಧೀಕರಣದ ಪ್ರಕ್ರಿಯೆಯನ್ನು ಪ್ರವೇಶಿಸಲು ನಾವೆಲ್ಲರೂ ಕರೆಯಲ್ಪಟ್ಟಿದ್ದೇವೆ. ಇಂದು ಸ್ನಾನಿಕ ಯೋಹಾನನ ಮಾತುಗಳಿಗೆ ಕಿವಿಗೊಟ್ಟು, ಪವಿತ್ರ ಜೀವನದಿಂದ ನಮ್ಮನ್ನು ದೂರವಿಡುವ ಎಲ್ಲದಕ್ಕೂ ಪಶ್ಚಾತ್ತಾಪಪಡಲು ನಾವು ಕರೆಯಲ್ಪಟ್ಟಿದ್ದೇವೆ.
ದೇವರು ನಿಮ್ಮನ್ನು ಯಾವ ಶುದ್ಧೀಕರಣಕ್ಕೆ ಕರೆಯುತ್ತಿರಬಹುದು ಎಂಬುದನ್ನು ಇಂದು ಧ್ಯಾನಿಸಿ. ನೀವು ಯಾವುದಕ್ಕೆ ಅಂಟಿಕೊಂಡಿದ್ದೀರಿ? ಅದರಲ್ಲಿ ಯಾವುದರಿಂದ ನೀವು ಮುಕ್ತರಾಗಬೇಕೆಂದು ಅವರು ಬಯಸುತ್ತಾರೆ? ದೇವರ ಪ್ರೀತಿಯ ಶುದ್ಧೀಕರಿಸುವ ಅಗ್ನಿಗೆ ನಿಮ್ಮನ್ನು ಒಪ್ಪಿಸಿಕೊಡಿ. ಈ ಆಗಮನ ಕಾಲದಲ್ಲಿ ಆ ಪ್ರೀತಿಯು ನಿಮ್ಮನ್ನು ಶುದ್ಧಗೊಳಿಸಲು ಅವಕಾಶ ನೀಡಿ.
ಪ್ರಭುವೇ, ನನ್ನ ಆತ್ಮವು ನಿಮ್ಮಿಂದ ಶುದ್ಧೀಕರಿಸಲ್ಪಡಬೇಕೆಂದು ನಾನು ನಿಜವಾಗಿಯೂ ಹಾತೊರೆಯುತ್ತೇನೆ. ಪವಿತ್ರ ಜೀವನವನ್ನು ನಾನು ನಿಜವಾಗಿಯೂ ಬಯಸುತ್ತೇನೆ. ನೀವು ನನಗಾಗಿ ಕಾಯ್ದಿರಿಸಿರುವ ಆನಂದ ಮತ್ತು ಸ್ವಾತಂತ್ರ್ಯವನ್ನು ನಾನು ಅನುಭವಿಸಲು ಆರಂಭಿಸುವಂತೆ, ಈ ಪ್ರಕ್ರಿಯೆಯನ್ನು ಇಲ್ಲಿಯೇ, ಈಗಲೇ ಆರಂಭಿಸಲು ನನಗೆ ಸಹಾಯಮಾಡಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಟ್ಟಿದ್ದೇನೆ.
ಈ ಕ್ರಿಸ್ಮಸ್‌ಗೆ ವಿಶ್ವಾಸದ ಉಡುಗೊರೆಯನ್ನು ನೀಡಿ
