ഡിസംബർ 17, 2019
ആഗമനകാലത്തിലെ ചൊവ്വാഴ്ച
ഇന്നത്തെ വായനകൾ
എലെയാസർ മത്താന്റെ പിതാവായി; മത്താൻ യാക്കോബിന്റെയും യാക്കോബ് മറിയത്തിന്റെ ഭർത്താവായ ജോസഫിന്റെയും പിതാവായി. മറിയത്തിൽനിന്ന് ക്രിസ്തു എന്നു വിളിക്കപ്പെടുന്ന യേശു ജനിച്ചു. മത്തായി 1:15b-16
ക്രിസ്തുവിന്റെ ജനനത്തിനുള്ള അടുത്ത ഒരുക്കമായി ഇന്ന് നാം ഒരു “അഷ്ടദിനാചരണം” ആരംഭിക്കുന്നു. ഈ അഷ്ടദിനാചരണത്തിനുശേഷം നാം മഹിമാപൂർണ്ണമായ തിരുപ്പിറവിയുടെ മഹോത്സവത്തിലേക്കു പ്രവേശിക്കുന്നു!
ഈ ദിവസം യേശുവിന്റെ പൂർവികരുടെ നീണ്ട വംശാവലി നമ്മുടെ മുമ്പിൽ അവതരിപ്പിക്കപ്പെടുന്നു. മത്തായിയുടെ സുവിശേഷം ഒന്നാം അധ്യായത്തിലെ 2-16 വാക്യങ്ങൾ, പതിനാലു പൂർവികർ വീതമുള്ള മൂന്നു നിരകൾ നമുക്കു നൽകുന്നു. വംശാവലി അബ്രാഹത്തിൽ ആരംഭിച്ച് യേശുവിൽ അവസാനിക്കുന്നു. ഈ വംശാവലിയിൽനിന്നും അതിൽ പേരെടുത്തുപറയുന്ന എല്ലാവരിൽനിന്നും ഒരു വിശുദ്ധഗ്രന്ഥപണ്ഡിതന് രസകരമായ നിരവധി വസ്തുതകൾ കണ്ടെത്താനാകുമെങ്കിലും, അതിന്റെ അർത്ഥത്തിന്റെ ഹൃദയവും ആത്മാവും ഒന്നാം വാക്യത്തിൽ കാണാം: “അബ്രാഹത്തിന്റെ പുത്രനും ദാവീദിന്റെ പുത്രനുമായ യേശുക്രിസ്തുവിന്റെ വംശാവലിഗ്രന്ഥം.” ദൈവം അബ്രാഹത്തിനു നൽകിയ വാഗ്ദാനവും ദൈവപുത്രനിൽ അതു നിറവേറിയതും തമ്മിലുള്ള നേരിട്ടുള്ള ബന്ധം ഇതു കാണിക്കുന്നു.
ഈ വാഗ്ദാനത്തിന്റെ പൂർത്തീകരണത്തിൽ നാം കാണുന്ന ഒരു കാര്യം ദൈവം വിശ്വസ്തനാണ് എന്നതാണ്. അബ്രാഹത്തിനു നൽകിയ വാഗ്ദാനം നിറവേറാൻ നൂറ്റാണ്ടുകൾ വേണ്ടിവന്നു എന്നതു സത്യമാണ്. എങ്കിലും അതു നിറവേറുകതന്നെ ചെയ്തു. തന്റെ സന്തതികളിൽ ഒരുവൻ ലോകത്തിന്റെ രക്ഷകനായി മഹിമയോടെ ജനിക്കുന്നതിനു സാക്ഷിയായപ്പോൾ അബ്രാഹം അത്യന്തം ആനന്ദിച്ചു എന്നതിൽ സംശയമില്ലെന്നുതന്നെ പറയാം.
ദൈവത്തിന്റെ സമയവും അവിടുത്തെ വഴികളും പലപ്പോഴും നാം ആദ്യം സങ്കൽപ്പിക്കുന്നതിൽനിന്നു വ്യത്യസ്തമാണെന്നും ഇതു നമ്മോടു പറയുന്നു. നമുക്കു പല “നല്ല” ആശയങ്ങളും തോന്നാം; അവ യാഥാർഥ്യമാകുമെന്നു പ്രത്യാശിക്കുകയും ചെയ്യാം. എന്നാൽ, നാം പ്രത്യാശിച്ചതുപോലെ അവ ഉടനടി സംഭവിക്കാതെ വരുമ്പോൾ പലപ്പോഴും നാം നിരുത്സാഹിതരായേക്കാം.
ദൈവത്തിന്റെ പരിപൂർണ്ണമായ “ദീർഘകാല” പദ്ധതി നൽകുന്ന പാഠം ഇന്നു പഠിക്കുക. താൻ എന്താണു ചെയ്യുന്നതെന്ന് അവിടുത്തേക്കറിയാം; നമുക്കെല്ലാവർക്കുമായുള്ള തന്റെ പദ്ധതി അവിടുന്ന് നടപ്പാക്കിക്കൊണ്ടിരിക്കുകയാണ്. രക്ഷയിലേക്കും സമാധാനത്തിലേക്കും നയിക്കുന്ന പാതയിലൂടെ അവിടുന്ന് നമ്മെ സാവധാനത്തിലും വ്യക്തമായ ഉദ്ദേശ്യത്തോടെയും നയിക്കുന്നു. നാം കാര്യങ്ങൾ ചെയ്യുന്ന രീതിയിലായിരിക്കില്ല അത്; എങ്കിലും അതു പരിപൂർണ്ണമായ വഴിയാണ്.
നിങ്ങളുടെ ജീവിതത്തിനായി ദൈവം ഒരുക്കിയിരിക്കുന്ന പദ്ധതിയെക്കുറിച്ച് ഇന്നു ചിന്തിക്കുക. ക്ഷമയിലേക്കും ദീർഘക്ഷമയിലേക്കുമാണോ അവിടുന്ന് നിങ്ങളെ വിളിക്കുന്നത്? ഏറെ ആവശ്യപ്പെടുന്നതും പൂർണ്ണവുമായ ഒരു വിശ്വാസമാണോ അവിടുന്ന് നിങ്ങളിൽനിന്ന് ആവശ്യപ്പെടുന്നത്? നിങ്ങളുടെ സ്വന്തം ആശയങ്ങളും അഭിലാഷങ്ങളും സമർപ്പിക്കണമെന്ന് അവിടുന്ന് ആവശ്യപ്പെടുന്നുണ്ടോ? അതെ, ഇവയെല്ലാമും അതിലേറെയും അവിടുന്ന് ആവശ്യപ്പെടുന്നു. സ്വർഗസ്ഥനായ നമ്മുടെ പിതാവിന്റെ ഹൃദയത്തിലുള്ള പരിപൂർണ്ണ പദ്ധതിക്കായി നിങ്ങളെത്തന്നെ വീണ്ടും സമർപ്പിക്കുക; വഴിയിലെ ഓരോ ചുവടിലും അവിടുന്ന് നിങ്ങളെ നയിക്കും.
കർത്താവേ, അങ്ങയുടെ വഴികൾ പരിപൂർണ്ണമാണെന്നും അങ്ങയുടെ പദ്ധതികൾ പലപ്പോഴും എന്റെ പദ്ധതികളല്ലെന്നും ഞാൻ അറിയുന്നു. എന്റെ സ്വന്തം ആശയങ്ങളും ആഗ്രഹങ്ങളും വിട്ടുകൊടുക്കാനും അങ്ങ് എനിക്കായി ഒരുക്കിയിരിക്കുന്ന എല്ലാറ്റിനും വിശ്വാസത്തോടെ കൂടുതൽ ആഴത്തിൽ എന്നെത്തന്നെ സമർപ്പിക്കാനും എന്നെ സഹായിക്കണമേ. കർത്താവേ, അങ്ങയുടെ ജ്ഞാനം പരിപൂർണ്ണമാണ്. പൂർണ്ണഹൃദയത്തോടെ അതു വിശ്വസിക്കാൻ എന്നെ സഹായിക്കണമേ. ഈശോയെ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
