2020 ജൂലൈ 10
ആണ്ടുവട്ടത്തിലെ പതിനാലാം ആഴ്ചയിലെ വെള്ളിയാഴ്ച
ഇന്നത്തെ വായനകൾ
യേശു തന്റെ അപ്പസ്തോലന്മാരോടു പറഞ്ഞു: “ഇതാ, ചെന്നായ്ക്കളുടെ ഇടയിലേക്ക് ആടുകളെപ്പോലെ ഞാൻ നിങ്ങളെ അയയ്ക്കുന്നു. അതിനാൽ നിങ്ങൾ സർപ്പങ്ങളെപ്പോലെ വിവേകികളും പ്രാവുകളെപ്പോലെ നിഷ്കളങ്കരുമായിരിക്കുവിൻ. മനുഷ്യരെ സൂക്ഷിച്ചുകൊള്ളുവിൻ; അവർ നിങ്ങളെ ന്യായാലയങ്ങളിൽ ഏൽപ്പിക്കുകയും തങ്ങളുടെ സിനഗോഗുകളിൽവച്ച് ചമ്മട്ടികൊണ്ട് അടിക്കുകയും ചെയ്യും. എന്നെപ്രതി നിങ്ങളെ ദേശാധിപതികളുടെയും രാജാക്കന്മാരുടെയും മുമ്പിൽ കൊണ്ടുപോകും; അവർക്കും വിജാതീയർക്കും സാക്ഷ്യം നൽകാനാണത്.” മത്തായി 10:16-18
യേശു പ്രസംഗിച്ചുകൊണ്ടിരുന്ന കാലത്ത് അവിടുത്തെ ഒരു അനുയായിയായി നിങ്ങൾ ജീവിക്കുന്നതായി സങ്കൽപ്പിക്കുക. അവിടുത്തെക്കുറിച്ച് വലിയ ആവേശമുണ്ടെന്നും അവിടുന്ന് പുതിയ രാജാവാകുമെന്നും അവിടുന്നാണ് മിശിഹായെന്നും വലിയ പ്രതീക്ഷകൾ നിലനിൽക്കുന്നുവെന്നും സങ്കൽപ്പിക്കുക. വരാനിരിക്കുന്ന കാര്യങ്ങളെക്കുറിച്ച് ഏറെ പ്രത്യാശയും ആവേശവും ഉണ്ടാകുമായിരുന്നു.
എന്നാൽ അപ്പോൾ, തികച്ചും അപ്രതീക്ഷിതമായി, യേശു ഈ പ്രബോധനം നൽകുന്നു. തന്റെ അനുയായികൾ പീഡിപ്പിക്കപ്പെടുകയും ചമ്മട്ടിയടി ഏൽക്കുകയും ചെയ്യുമെന്നും ഈ പീഡനം വീണ്ടും വീണ്ടും തുടരുമെന്നും അവിടുന്ന് പറയുന്നു. ഇതു കേട്ട് അവിടുത്തെ അനുയായികൾ ഒരു നിമിഷം നിന്നുപോയിരിക്കണം; യേശുവിനെ ഗൗരവമായി ചോദ്യം ചെയ്യാനും അവിടുത്തെ അനുഗമിക്കുന്നത് തക്ക മൂല്യമുള്ള കാര്യമാണോ എന്നു ചിന്തിക്കാനും ഇത് അവരെ പ്രേരിപ്പിച്ചിരിക്കണം.
നൂറ്റാണ്ടുകളിലുടനീളം ക്രൈസ്തവർക്കെതിരായ പീഡനം ശക്തമായി നിലനിന്നിട്ടുണ്ട്. എല്ലാ കാലങ്ങളിലും എല്ലാ സംസ്കാരങ്ങളിലും അതു സംഭവിച്ചിട്ടുണ്ട്. ഇന്നും അതു തുടരുന്നു. അപ്പോൾ, ഇതിനെ നാം എങ്ങനെ നേരിടണം? നാം എങ്ങനെ പ്രതികരിക്കണം?
ക്രൈസ്തവജീവിതം എന്നത് എല്ലാവരുമായും വെറുതെ “ഒത്തുപോകുക” മാത്രമാണെന്ന ചിന്തയുടെ കെണിയിൽ പല ക്രൈസ്തവരും വീണുപോകാം. നാം സ്നേഹവും ദയയും ഉള്ളവരാണെങ്കിൽ എല്ലാവരും നമ്മെയും സ്നേഹിക്കുമെന്നു വിശ്വസിക്കാൻ എളുപ്പമാണ്. എന്നാൽ യേശു പറഞ്ഞത് അതല്ല.
പീഡനം സഭയുടെ ജീവിതത്തിന്റെ ഭാഗമായിരിക്കുമെന്നും നമുക്ക് അതു സംഭവിക്കുമ്പോൾ നാം ആശ്ചര്യപ്പെടരുതെന്നും യേശു വ്യക്തമാക്കി. നമ്മുടെ സംസ്കാരത്തിൽ ജീവിക്കുന്നവർ നമ്മെ ചവിട്ടിമെതിക്കുകയും നമ്മോടു ദുഷ്ടതയോടെ പെരുമാറുകയും ചെയ്യുമ്പോൾ നാം ആശ്ചര്യപ്പെടരുത്. ഇങ്ങനെ സംഭവിക്കുമ്പോൾ വിശ്വാസം നഷ്ടപ്പെടാനും മനസ്സുതളരാനും എളുപ്പമാണ്. നാം നിരുത്സാഹിതരാകുകയും നമ്മുടെ വിശ്വാസജീവിതം രഹസ്യമായി ഒതുക്കിവയ്ക്കാൻ തോന്നുകയും ചെയ്യാം. നമ്മുടെ സംസ്കാരവും ലോകവും നമ്മുടെ വിശ്വാസം പരസ്യമായി ജീവിക്കുന്നത് ഇഷ്ടപ്പെടുന്നില്ലെന്നും അംഗീകരിക്കുകയില്ലെന്നും അറിഞ്ഞുകൊണ്ട് അങ്ങനെ ജീവിക്കുക പ്രയാസമാണ്.
ഇതിനുള്ള ഉദാഹരണങ്ങൾ നമുക്കു ചുറ്റുമുണ്ട്. ക്രൈസ്തവ വിശ്വാസത്തോടുള്ള ശത്രുത വർധിച്ചുവരുന്നത് മനസ്സിലാക്കാൻ മതേതര വാർത്താമാധ്യമങ്ങളിലെ വാർത്തകൾ വായിച്ചാൽ മാത്രം മതി. അതിനാൽ, മുമ്പെന്നത്തേക്കാളും അധികമായി ഇന്ന് നാം യേശുവിന്റെ വാക്കുകൾക്കു ചെവികൊടുക്കണം. അവിടുത്തെ മുന്നറിയിപ്പിനെക്കുറിച്ച് നാം ബോധവാന്മാരായിരിക്കണം; അവിടുന്ന് നമ്മോടൊപ്പമുണ്ടായിരിക്കുമെന്നും ആവശ്യം വരുമ്പോൾ പറയേണ്ട വാക്കുകൾ നമുക്കു നൽകുമെന്നുമുള്ള അവിടുത്തെ വാഗ്ദാനത്തിൽ പ്രത്യാശ വയ്ക്കുകയും വേണം. എല്ലാറ്റിലുമുപരി, നമ്മെ സ്നേഹിക്കുന്ന ദൈവത്തിൽ പ്രത്യാശയും ഉറച്ച വിശ്വാസവും വയ്ക്കാൻ ഈ വചനഭാഗം നമ്മെ ആഹ്വാനം ചെയ്യുന്നു.
ലോകത്തിന്റെ ശത്രുത നേരിടാൻ നിങ്ങൾ എത്രമാത്രം സന്നദ്ധരും ഒരുക്കമുള്ളവരുമാണെന്ന് ഇന്ന് ധ്യാനിക്കുക. അതേ ശത്രുതയോടെ നിങ്ങൾ തിരിച്ചുപ്രതികരിക്കരുത്. മറിച്ച്, ക്രിസ്തുവിന്റെ സഹായവും ശക്തിയും ജ്ഞാനവുംകൊണ്ട് ഏതുതരം പീഡനവും സഹിച്ചുനിൽക്കാനുള്ള ധൈര്യവും കരുത്തും നേടാൻ നിങ്ങൾ പരിശ്രമിക്കണം.
കർത്താവേ, അങ്ങയോടു ശത്രുത പുലർത്തുന്ന ലോകത്തിൽ എന്റെ വിശ്വാസം ജീവിക്കുമ്പോൾ എനിക്കു ശക്തിയും ധൈര്യവും ജ്ഞാനവും നൽകണമേ. പരുഷമായ പെരുമാറ്റവും തെറ്റിദ്ധാരണയും നേരിടുമ്പോൾ സ്നേഹത്തോടും കരുണയോടും കൂടി പ്രതികരിക്കാൻ എനിക്കു കഴിയുമാറാകണമേ. ഈശോയേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
ചിത്രം: ഹെൻറിക് ഓൾറിക്കിന്റെ ഗിരിപ്രഭാഷണം
