നിങ്ങൾക്കു ദുരിതം!

2020 ഒക്ടോബർ 14
സാധാരണകാലത്തിലെ ഇരുപത്തിയെട്ടാം ആഴ്ചയിലെ ബുധനാഴ്ച
ഇന്നത്തെ വായനകൾ

വിശുദ്ധ കലിസ്റ്റസ് ഒന്നാമൻ, മാർപാപ്പയും രക്തസാക്ഷിയും—ഐച്ഛിക അനുസ്മരണം

“നിങ്ങൾക്കു ദുരിതം! നിങ്ങൾ ആളുകൾ അറിയാതെ ചവിട്ടിനടക്കുന്ന, കാണപ്പെടാത്ത ശവക്കുഴികൾപോലെയാണ്.” അപ്പോൾ നിയമപണ്ഡിതരിൽ ഒരുവൻ അവനോടു മറുപടി പറഞ്ഞു: “ഗുരോ, ഇങ്ങനെ പറയുന്നതിലൂടെ നീ ഞങ്ങളെയും അപമാനിക്കുകയാണ്.” അവൻ പറഞ്ഞു: “നിയമപണ്ഡിതരേ, നിങ്ങൾക്കും ദുരിതം! ചുമക്കാൻ പ്രയാസമുള്ള ഭാരങ്ങൾ നിങ്ങൾ മനുഷ്യരുടെമേൽ കെട്ടിവയ്ക്കുന്നു; എന്നാൽ അവയിൽ തൊടാൻ നിങ്ങൾ ഒരു വിരൽപോലും അനക്കുന്നില്ല.” ലൂക്കാ 11:44-46

യേശുവും ഈ നിയമപണ്ഡിതനും തമ്മിലുള്ള സംഭാഷണം എത്ര രസകരവും അൽപ്പം ആശ്ചര്യകരവുമാണ്! ഇവിടെ യേശു ഫരിസേയരെ കഠിനമായി ശാസിക്കുകയാണ്. യേശുവിന്റെ വാക്കുകൾ അപമാനകരമാണെന്നു പറഞ്ഞ് നിയമപണ്ഡിതരിൽ ഒരുവൻ അവനെ തിരുത്താൻ ശ്രമിക്കുന്നു. അപ്പോൾ യേശു എന്തു ചെയ്യുന്നു? അവൻ പിന്മാറുകയോ അയാളെ വ്രണപ്പെടുത്തിയതിന് ക്ഷമ ചോദിക്കുകയോ ചെയ്യുന്നില്ല; പകരം, തന്റെ കഠിനമായ ശാസന ആ നിയമപണ്ഡിതനു നേരെ തിരിക്കുന്നു. അത് തീർച്ചയായും അയാളെ അത്ഭുതപ്പെടുത്തിയിരിക്കണം!

യേശു തങ്ങളെ “അപമാനിക്കുന്നു” എന്ന് ആ നിയമപണ്ഡിതൻ ചൂണ്ടിക്കാണിക്കുന്നു എന്നതാണ് ശ്രദ്ധേയം. യേശു പാപം ചെയ്യുകയാണെന്നും അതിനാൽ ശാസിക്കപ്പെടേണ്ടതുണ്ടെന്നുമുള്ള മട്ടിലാണ് അയാൾ അത് ചൂണ്ടിക്കാണിക്കുന്നത്. അപ്പോൾ യേശു ഫരിസേയരെയും നിയമപണ്ഡിതനെയും അപമാനിക്കുകയായിരുന്നോ? അതെ, ഒരുപക്ഷേ അങ്ങനെയായിരുന്നിരിക്കാം. അത് യേശുവിന്റെ ഭാഗത്തുനിന്നുള്ള പാപമായിരുന്നോ? തീർച്ചയായും അല്ല. യേശു പാപം ചെയ്യുന്നില്ല.

ഇവിടെ നാം അഭിമുഖീകരിക്കുന്ന രഹസ്യം ഇതാണ്: ചിലപ്പോൾ സത്യം, ഒരർഥത്തിൽ പറഞ്ഞാൽ, “അപമാനകരമാണ്.” അത് ഒരാളുടെ അഹങ്കാരത്തെ മുറിപ്പെടുത്തുന്നു. ഏറ്റവും ശ്രദ്ധേയമായ കാര്യം ഇതാണ്: ഒരാൾക്ക് അപമാനിക്കപ്പെട്ടതായി തോന്നുമ്പോൾ, മറ്റൊരാൾ പറഞ്ഞതോ ചെയ്തതോ കൊണ്ടല്ല, സ്വന്തം അഹങ്കാരം കൊണ്ടാണ് അങ്ങനെ തോന്നുന്നതെന്ന് ആദ്യം തിരിച്ചറിയണം. ആരെങ്കിലും അതിരുകടന്ന് കഠിനമായി പെരുമാറിയാൽപ്പോലും, അപമാനിക്കപ്പെട്ടെന്ന തോന്നൽ അഹങ്കാരത്തിന്റെ ഫലമാണ്. ഒരാൾ യഥാർഥത്തിൽ വിനയമുള്ളവനാണെങ്കിൽ, സഹായകരമായ ഒരു തിരുത്തലായി ശാസനയെ സ്വാഗതം ചെയ്യുമായിരുന്നു. ദുഃഖകരമെന്നു പറയട്ടെ, യേശുവിന്റെ ശാസന ഹൃദയത്തിൽ സ്വീകരിച്ച് സ്വന്തം പാപത്തിൽനിന്നു മോചിതനാകാൻ ആവശ്യമായ വിനയം ആ നിയമപണ്ഡിതനില്ലെന്നു തോന്നുന്നു.

മറ്റൊരാളിൽനിന്നുള്ള തിരുത്തൽ സ്വീകരിക്കാൻ വേണ്ടത്ര വിനയം നിങ്ങൾക്കുണ്ടോ എന്ന് ഇന്ന് വിചിന്തനം ചെയ്യുക. ആരെങ്കിലും നിങ്ങളുടെ പാപം ചൂണ്ടിക്കാണിക്കുമ്പോൾ നിങ്ങൾക്ക് നീരസം തോന്നുന്നുണ്ടോ? അതോ, പ്രയോജനകരമായ ഒരു തിരുത്തലായി അതിനെ സ്വീകരിച്ച് വിശുദ്ധിയിൽ വളരാൻ അതു നിങ്ങളെ സഹായിക്കുന്നതിന് അനുവദിക്കുന്നുണ്ടോ?

കർത്താവേ, എനിക്ക് യഥാർഥ വിനയം നൽകണമേ. മറ്റുള്ളവർ എന്നെ തിരുത്തുമ്പോൾ ഒരിക്കലും നീരസം തോന്നാതിരിക്കാൻ എന്നെ സഹായിക്കണമേ. വിശുദ്ധിയിലേക്കുള്ള എന്റെ വഴിയിൽ എന്നെ സഹായിക്കുന്ന കൃപകളായി മറ്റുള്ളവരുടെ തിരുത്തലുകൾ ഞാൻ സ്വീകരിക്കട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.

പുതിയത്! ആഴങ്ങൾ തേടി, എന്ന പേരിൽ വിശുദ്ധ ഇഗ്നേഷ്യസിന്റെ ആത്മീയാഭ്യാസങ്ങളെ ആധാരമാക്കിയുള്ള ഒരു വർഷം നീളുന്ന സാധന ആരംഭിക്കാൻ വർഷത്തിലെ ഏറ്റവും അനുയോജ്യമായ സമയം ഒക്ടോബർ മാസമാണ്!