മാർച്ച് 11, 2021
നോമ്പുകാലം മൂന്നാം വാരത്തിലെ വ്യാഴാഴ്ച
ഇന്നത്തെ വായനകൾ
എന്നാൽ ദൈവത്തിന്റെ വിരൽകൊണ്ടാണ് ഞാൻ പിശാചുക്കളെ പുറത്താക്കുന്നതെങ്കിൽ, ദൈവരാജ്യം നിങ്ങളുടെമേൽ വന്നിരിക്കുന്നു. ലൂക്കാ 11:20
ദൈവരാജ്യം പലവിധത്തിൽ നമ്മുടെമേൽ വന്നുചേരാം. മുകളിൽ നൽകിയിരിക്കുന്ന ഇന്നത്തെ സുവിശേഷവാക്യം, സംസാരശേഷിയില്ലാതിരുന്ന ഒരുവനിൽനിന്ന് ഈശോ പിശാചിനെ പുറത്താക്കുന്ന സംഭവവിവരണത്തിന്റെ മധ്യത്തിലാണ് വരുന്നത്. പിശാച് പുറത്താക്കപ്പെട്ടപ്പോൾ, സംസാരശേഷിയില്ലാതിരുന്ന ആ മനുഷ്യൻ സംസാരിക്കാൻ തുടങ്ങി; എല്ലാവരും വിസ്മയിച്ചു. ചിലർ വിസ്മയിക്കുകയും അതുവഴി വിശ്വാസത്തിൽ വളരുകയും ചെയ്തെങ്കിലും, മറ്റു ചിലർ തങ്ങളുടെ വിസ്മയത്തെ യുക്തിരാഹിത്യമായി മാറ്റി.
ഈശോ ചെയ്തതു കണ്ടിട്ടും അവിടുത്തെ ശക്തി ദൈവികമാണെന്ന് അംഗീകരിക്കാൻ മനസ്സില്ലാതിരുന്നതാണ് ചിലരുടെ യുക്തിരാഹിത്യം. അതിനാൽ അവരിൽ ചിലർ പറഞ്ഞു: “പിശാചുക്കളുടെ തലവനായ ബെയെൽസെബൂലിന്റെ ശക്തികൊണ്ടാണ് ഇവൻ പിശാചുക്കളെ പുറത്താക്കുന്നത്.” ഈശോ ഒരു പിശാചിനെ പുറത്താക്കിയെന്നത് അവർക്ക് നിഷേധിക്കാൻ കഴിഞ്ഞില്ല; കാരണം, അതു സംഭവിക്കുന്നത് അവർ സ്വന്തം കണ്ണുകൊണ്ടു കണ്ടിരുന്നു. എന്നാൽ ഈശോയുടെ ദൈവത്വം അംഗീകരിക്കാൻ അവർ തയ്യാറായില്ല. അതുകൊണ്ട്, ഈശോ ആ പ്രവൃത്തി ചെയ്തത് “പിശാചുക്കളുടെ തലവന്റെ” ശക്തികൊണ്ടാണെന്ന യുക്തിരഹിതമായ നിഗമനത്തിലേക്ക് അവർ എടുത്തുചാടി.
ചിലരുടെ ഈ യുക്തിരഹിതമായ നിലപാട്, ഒരാൾക്ക് സ്വീകരിക്കാവുന്ന ഏറ്റവും അപകടകരമായ നിലപാടുകളിൽ ഒന്നാണ്. ദുശ്ശാഠ്യമുള്ള ഹൃദയത്തിന്റെ നിലപാടാണത്. ദൈവത്തിന്റെ ശക്തി പ്രവർത്തിക്കുന്നതിന്റെ വിസ്മയകരമായ സാക്ഷ്യം അവർക്ക് ലഭിച്ചു. എന്നിട്ടും തങ്ങൾ കണ്ടതിന് വിശ്വാസത്തോടെ പ്രത്യുത്തരം നൽകാൻ അവർ വിസമ്മതിച്ചു. ഈശോ മുകളിൽ പറഞ്ഞതുപോലെ, ദുശ്ശാഠ്യമുള്ളവരുടെമേൽ ദൈവരാജ്യം വന്നുചേരുമ്പോൾ, അവർ അക്രമാസക്തമായും കോപത്തോടെയും യുക്തിരഹിതമായും പ്രതികരിക്കുന്നു. ഇത്തരത്തിലുള്ള പ്രതികരണം ഇന്നത്തെ മതേതരലോകത്തിൽ അത്യന്തം വ്യാപകമാണ്. ഉദാഹരണത്തിന്, മതേതര മാധ്യമരംഗത്തുള്ള പലരും ദൈവരാജ്യത്തിന്റെ ഭാഗമായ എല്ലാറ്റിനോടും നിരന്തരം അക്രമാസക്തമായും യുക്തിരഹിതമായും പ്രതികരിക്കുന്നു. തത്ഫലമായി, ദുഷ്ടൻ അനേകരെ എളുപ്പത്തിൽ വഴിതെറ്റിക്കുകയും ആശയക്കുഴപ്പവും അരാജകത്വവും സൃഷ്ടിക്കുകയും ചെയ്യുന്നു.
വ്യക്തമായി കാണാൻ കണ്ണുള്ളവർക്ക്, ദൈവരാജ്യത്തോടുള്ള അക്രമാസക്തവും യുക്തിരഹിതവുമായ ഈ തിരസ്കാരം വളരെ വ്യക്തമാണ്. വിശ്വാസവും തുറന്ന ഹൃദയവുമുള്ളവർക്കാകട്ടെ, സുവിശേഷത്തിന്റെ നിർമലമായ സന്ദേശം വരണ്ടുണങ്ങിയ ആത്മാവിന് ജലംപോലെയാണ്. അവർ അത് ഉള്ളിലേക്കു സ്വീകരിക്കുകയും വലിയ ഉന്മേഷം കണ്ടെത്തുകയും ചെയ്യുന്നു. ദൈവരാജ്യം അവരുടെമേൽ വന്നുചേരുമ്പോൾ, ദൈവരാജ്യത്തെ വളർത്താനുള്ള വിശുദ്ധമായ തീക്ഷ്ണതയാൽ അവർ ശക്തിയും പ്രചോദനവും പ്രവർത്തിക്കാനുള്ള ഉത്സാഹവും നേടുന്നു. യുക്തിരാഹിത്യം അപ്രത്യക്ഷമാകുകയും ദൈവത്തിന്റെ നിർമലമായ സത്യം വിജയം വരിക്കുകയും ചെയ്യുന്നു.
ഇന്ന് നിങ്ങളുടെ ഹൃദയത്തെക്കുറിച്ച് ചിന്തിക്കുക. ഏതെങ്കിലും വിധത്തിൽ നിങ്ങൾ ദുശ്ശാഠ്യം പുലർത്തുന്നുണ്ടോ? ക്രിസ്തുവിന്റെയും അവിടുത്തെ സഭയുടെയും ഏതെങ്കിലും പ്രബോധനങ്ങളെ നിരസിക്കാൻ നിങ്ങൾക്ക് പ്രലോഭനമുണ്ടാകുന്നുണ്ടോ? നിങ്ങളുടെ വ്യക്തിജീവിതത്തിൽ നിങ്ങൾ കേൾക്കേണ്ടതും എന്നാൽ തുറന്ന മനസ്സോടെ സ്വീകരിക്കാൻ നിങ്ങൾക്കു ബുദ്ധിമുട്ടുള്ളതുമായ ഏതെങ്കിലും സത്യമുണ്ടോ? ഇന്നും എല്ലാ ദിവസവും ദൈവരാജ്യം നിങ്ങളുടെമേൽ വന്നുചേരാനും, അങ്ങനെ സംഭവിക്കുമ്പോൾ ഈ ലോകത്തിൽ അതു സ്ഥാപിക്കുന്നതിനുള്ള ശക്തമായ ഒരു ഉപകരണമായി നിങ്ങൾ മാറാനും പ്രാർത്ഥിക്കുക.
സകലത്തിന്റെയും രാജാവായ എന്റെ മഹത്വപൂർണ്ണനായ നാഥാ, അങ്ങ് സർവശക്തനും എല്ലാറ്റിന്മേലും പൂർണ്ണ അധികാരമുള്ളവനുമാണ്. എന്റെ ജീവിതത്തിലേക്ക് വന്ന് അങ്ങയുടെ അധികാരം പ്രയോഗിക്കണമേ. വന്ന് അങ്ങയുടെ രാജ്യം സ്ഥാപിക്കണമേ. എന്റെ ഹൃദയം അങ്ങയോടും അങ്ങ് നൽകുന്ന മാർഗനിർദേശത്തോടും എപ്പോഴും തുറവുള്ളതായിരിക്കണമേ എന്നു ഞാൻ പ്രാർത്ഥിക്കുന്നു. ഈശോയേ, ഞാൻ അങ്ങയിൽ ശരണപ്പെടുന്നു.
കുരിശിൻ ചുവട്ടിൽ 40 ദിനങ്ങൾ – ധ്യാനം ഇരുപത്തിരണ്ട് – “ഇതാ, നിങ്ങളുടെ രാജാവ്!”
വിശുദ്ധ യൗസേപ്പിതാവിനോടുള്ള നൊവേന
മാർച്ച് 10–18
ദൈവകരുണയെക്കുറിച്ചുള്ള വിചിന്തനങ്ങൾ
നോമ്പുകാലത്തേക്കുള്ള തിരുവചന ധ്യാനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
_-_James_Tissot.jpg){kind=link}