നിങ്ങളുടെ സ്വർഗീയ അമ്മ

2021 മേയ് 24, തിങ്കളാഴ്ച

സഭയുടെ മാതാവായ പരിശുദ്ധ കന്യകാമറിയത്തിന്റെ അനുസ്മരണം
പന്തക്കുസ്തയ്ക്കു ശേഷമുള്ള തിങ്കളാഴ്ച

യേശുവിന്റെ കുരിശിനരികിൽ അവന്റെ അമ്മയും അമ്മയുടെ സഹോദരിയും ക്ലോപ്പാസിന്റെ ഭാര്യയായ മറിയവും മഗ്ദലനമറിയവും നിന്നിരുന്നു. തന്റെ അമ്മയും താൻ സ്നേഹിച്ച ശിഷ്യനും അവിടെ നിൽക്കുന്നതു കണ്ടപ്പോൾ യേശു അമ്മയോടു പറഞ്ഞു: “സ്ത്രീയേ, ഇതാ, നിന്റെ മകൻ.” പിന്നെ അവൻ ശിഷ്യനോടു പറഞ്ഞു: “ഇതാ, നിന്റെ അമ്മ.” ആ സമയം മുതൽ ആ ശിഷ്യൻ അവളെ തന്റെ വീട്ടിൽ സ്വീകരിച്ചു. യോഹന്നാൻ 19:25–27

ഫ്രാൻസിസ് മാർപാപ്പ 2018-ൽ റോമൻ ആരാധനാക്രമ കലണ്ടറിൽ ഉൾപ്പെടുത്തിയതും നാം ഇന്ന് ആഘോഷിക്കുന്നതുമായ ഈ അനുസ്മരണം ഒരു സത്യം എടുത്തുകാട്ടുന്നു: പരിശുദ്ധ കന്യകാമറിയം ക്രിസ്തുവെന്ന വ്യക്തിയുടെ മാതാവും അതിനാൽ ദൈവമാതാവും മാത്രമല്ല, സഭയുടെ മാതാവും, അതായത് എല്ലാ വിശ്വാസികളുടെയും മാതാവുമാണ്. പരിശുദ്ധ കന്യകാമറിയം നിങ്ങളുടെ അമ്മയാണ്. നിങ്ങളുടെ അമ്മയെന്ന നിലയിൽ, ഒരു ഉത്തമ അമ്മ നൽകാൻ ആഗ്രഹിക്കുന്നതെല്ലാം നിങ്ങൾക്കു നൽകിക്കൊണ്ട്, അവൾ യഥാർഥമായും വാത്സല്യവും അനുകമ്പയും കരുതലും കരുണയും ഉള്ളവളായിരിക്കുന്നു. തന്റെ മക്കളെ സംരക്ഷിക്കാൻ ഏതറ്റംവരെയും പോകുന്ന, ഏറ്റവും വീറുറ്റ അമ്മയാണ് അവൾ. തന്റെ പ്രിയമക്കളായ നിങ്ങളോട് പൂർണമായും സമർപ്പിതയായ അമ്മയാണ് അവൾ.

ഈ അനുസ്മരണത്തിനായി തിരഞ്ഞെടുത്ത സുവിശേഷഭാഗം നമ്മുടെ പരിശുദ്ധ അമ്മ കുരിശിന്റെ ചുവട്ടിൽ നിൽക്കുന്നതായി ചിത്രീകരിക്കുന്നു. തന്റെ പുത്രൻ അന്ത്യവേദന അനുഭവിക്കുമ്പോൾ, അവന്റെ തൊട്ടുതാഴെയല്ലാതെ മറ്റൊരിടത്തും അവൾ ഉണ്ടാകുമായിരുന്നില്ല. ഭയന്ന് അവൾ ഓടിപ്പോയില്ല. ദുഃഖം അവളെ തളർത്തിയില്ല. സ്വയംസഹതാപത്തിൽ അവൾ മനംമടുത്തിരുന്നില്ല. ഇല്ല, സമർപ്പണവും കരുതലും അനുകമ്പയും വിശ്വസ്തതയുമുള്ള ഒരമ്മയുടെ പൂർണമായ സ്നേഹത്തോടും കരുത്തോടുംകൂടെ അവൾ തന്റെ പുത്രനരികിൽ നിന്നു.

തന്റെ പുത്രന്റെ സഹനത്തിന്റെയും മരണത്തിന്റെയും വേളയിൽ അവൾ അവനരികിൽ നിന്നപ്പോൾ, യേശു അവളുടെ നേരെ തിരിഞ്ഞ് അപ്പോസ്തലനായ യോഹന്നാനെ അവളുടെ മാതൃപരിപാലനത്തിനു ഭരമേല്പിച്ചു. ആദിമ സഭാപിതാക്കന്മാരുടെ കാലംമുതൽ ഇന്നത്തെ സഭയുടെ ഏറ്റവും പുതിയ പ്രബോധനങ്ങൾവരെ, യേശു യോഹന്നാനെ മറിയത്തിനും മറിയത്തെ യോഹന്നാനും ഭരമേല്പിച്ച ഈ പ്രവൃത്തി, എല്ലാ വിശ്വാസികളെയും മറിയം അമ്മയുടെ മാതൃപരിപാലനത്തിനു ഭരമേല്പിക്കുന്നതായിട്ടാണ് മനസ്സിലാക്കപ്പെട്ടിട്ടുള്ളത്. അതിനാൽ, മറിയം അമ്മ രക്ഷകനായ ക്രിസ്തുവിന്റെ തന്നെ മാതാവു മാത്രമല്ല, വീണ്ടെടുക്കപ്പെട്ട എല്ലാവരുടെയും മാതാവും, നമ്മുടെയെല്ലാം അമ്മയും, സഭയുടെ മാതാവും ആയിത്തീരുന്നു.

സ്വർഗത്തിൽ നിങ്ങൾക്കുള്ള ആത്മീയ അമ്മയെക്കുറിച്ച് ചിന്തിക്കുക. ജീവൻ നൽകുന്നവളാണ് അമ്മ. കുരിശിലൂടെ നേടിത്തന്ന കൃപയുടെ പുതുജീവൻ നിങ്ങൾക്കു നൽകാനുള്ള ദൗത്യം സ്വർഗത്തിലെ നിങ്ങളുടെ അമ്മയെ ഭരമേല്പിച്ചിരിക്കുന്നു. നിങ്ങളുടെ അമ്മയെന്ന നിലയിൽ, നിങ്ങൾക്കു നന്മയാകുന്ന ഒന്നും അവൾ നിങ്ങൾക്കു നിഷേധിക്കുകയില്ല. തന്റെ മക്കളോടു വാത്സല്യം കാണിക്കുന്നവളുമാണ് അമ്മ. സ്വർഗത്തിലുള്ള നമ്മുടെ അമ്മയുടെ വിമലഹൃദയം നിങ്ങളോടുള്ള അതിരറ്റ വാത്സല്യത്താൽ നിറഞ്ഞിരിക്കുന്നു. അവളുടെ ലാളനകൾ ശാരീരികമല്ലെങ്കിലും, അവ അതിനെക്കാൾ ഏറെ ആഴമുള്ളവയാണ്. നിങ്ങളുടെ ആവശ്യനേരത്ത് പ്രാർഥിച്ചുകൊണ്ട് അവളിലേക്കു തിരിയുമ്പോൾ, അവൾ നിങ്ങൾക്കു പകർന്നുതരുന്ന കൃപയുടെ ആർദ്രതയാൽ നിങ്ങളെ ലാളിക്കുന്നു. രക്തവും ജലവും കരുണയുടെ ഉറവയായി പ്രവഹിച്ചപ്പോൾ, കുരിശിൽ ചൊരിയപ്പെട്ട തന്റെ പുത്രന്റെ കൃപ അവൾ നിങ്ങൾക്കു നൽകുന്നു. വാത്സല്യവും സമർപ്പണവുമുള്ള ഒരമ്മ ചെയ്യുന്നതുപോലെ മറിയം അമ്മ ആ കരുണ നിങ്ങളുടെമേൽ ചൊരിയുന്നു. അവൾ ഒന്നും നൽകാതെ മാറ്റിവയ്ക്കുന്നില്ല.

നിങ്ങളോടു നമ്മുടെ പരിശുദ്ധ അമ്മയുടെ ഹൃദയത്തിലുള്ള സ്നേഹത്തെക്കുറിച്ച് നിങ്ങൾക്ക് അറിവില്ലെങ്കിൽ, നിങ്ങളുടെ ജീവിതത്തിൽ അവൾക്കുള്ള പങ്കിനെക്കുറിച്ചുള്ള ധാരണ ആഴപ്പെടുത്താനുള്ള അവസരമായി ഈ അനുസ്മരണത്തെ ഉപയോഗിക്കുക. പല മക്കളും തങ്ങളുടെ അമ്മമാരുടെ സ്നേഹത്തിന്റെ ആഴം പൂർണമായി മനസ്സിലാക്കാതെ, അമ്മമാരുടെ സാന്നിധ്യവും സ്നേഹവും സ്വാഭാവികമായി ലഭിക്കേണ്ടതെന്നു കരുതുന്നു. സ്വർഗത്തിലെ നമ്മുടെ അമ്മയുടെ കാര്യത്തിലും അങ്ങനെതന്നെയാണ്. സ്വർഗത്തിൽ അവളോടു ചേർന്ന് അവളെ മുഖാമുഖം കാണുന്നതുവരെ, അവളുടെ സ്നേഹവും നമ്മുടെ ജീവിതത്തിൽ അവൾ നിരന്തരം നടത്തുന്ന മാതൃസഹജമായ പ്രവർത്തനങ്ങളും നാം ഒരിക്കലും പൂർണമായി ഗ്രഹിക്കുകയില്ല.

നിങ്ങളുടെ ജീവിതത്തിലെ ഓരോ നിമിഷത്തിലും മറിയം അമ്മ നിങ്ങളോടൊപ്പം നിൽക്കുന്നതിനെക്കുറിച്ച് ഇന്ന് ധ്യാനിക്കുക. നിങ്ങളുടെ സന്തോഷങ്ങളിലും സങ്കടങ്ങളിലും, പ്രലോഭനങ്ങളുടെയും പോരാട്ടങ്ങളുടെയും വേളകളിലും, ആശയക്കുഴപ്പത്തിന്റെയും വ്യക്തതയുടെയും നിമിഷങ്ങളിലും അവൾ അവിടെയുള്ളതായി കാണുക. നിങ്ങൾക്ക് ഏറ്റവും ആവശ്യമുള്ളപ്പോൾ നല്ല ആത്മീയ ദാനങ്ങളെല്ലാം നൽകിക്കൊണ്ട് അവൾ നിങ്ങളുടെ അരികിൽ നിൽക്കുന്നതായി കാണുക. അവൾ യഥാർഥ അമ്മയാണ്; നിങ്ങളുടെ സ്നേഹത്തിനും നന്ദിക്കും അവൾ അർഹയാണ്.

എന്റെ ഏറ്റവും പ്രിയപ്പെട്ട അമ്മേ, അചഞ്ചലമായ വിശ്വസ്തതയോടും സ്നേഹത്തോടുംകൂടെ അങ്ങ് അങ്ങയുടെ പുത്രനരികിൽ നിന്നു. അങ്ങ് അവനെ പരിപാലിച്ചു, വളർത്തി, ഒരിക്കലും അവന്റെ അരികിൽനിന്നു വിട്ടുപോയില്ല. ഞാനും അങ്ങയുടെ പ്രിയപ്പെട്ട കുഞ്ഞാണ്. എന്നോടുള്ള അങ്ങയുടെ സ്നേഹപൂർണമായ വിശ്വസ്തതയ്ക്കു ഞാൻ നന്ദി പറയുന്നു. ജീവിതത്തിലുടനീളം അങ്ങ് എനിക്കു നൽകുന്ന അങ്ങയുടെ പുത്രന്റെ കൃപയ്ക്കായി ഞാൻ എന്റെ ഹൃദയം തുറക്കുന്നു. അങ്ങയുടെ മാതൃപരിപാലനത്തിൽ കൂടുതൽ ശ്രദ്ധയുള്ളവനാകാനും എന്റെ ജീവിതത്തിലെ അങ്ങയുടെ സാന്നിധ്യത്തെപ്രതി അനുദിനം നന്ദിയിൽ വളരാനും എന്നെ സഹായിക്കണമേ. മറിയം അമ്മേ, ഞങ്ങൾക്കുവേണ്ടി പ്രാർഥിക്കണമേ. ഈശോയേ, ഞാൻ അങ്ങയിൽ ശരണപ്പെടുന്നു.