2021 മേയ് 23
പെന്തക്കുസ്താ ഞായറാഴ്ച മഹോത്സവം (വർഷം B)
പന്തക്കുസ്താ തിരുനാളിലെ വായനകൾ
പെട്ടെന്ന് ആകാശത്തുനിന്ന് ശക്തമായി വീശിയടിക്കുന്ന കാറ്റിന്റേതുപോലുള്ള ഒരു ശബ്ദമുണ്ടായി. അവർ ഇരുന്നിരുന്ന വീടുമുഴുവൻ അതു നിറഞ്ഞു. അപ്പോൾ അഗ്നിനാവുകൾപോലുള്ളവ അവർക്കു പ്രത്യക്ഷപ്പെട്ടു; അവ വേർപിരിഞ്ഞ് ഓരോരുത്തരുടെയും മേൽ വന്നു നിന്നു. അവരെല്ലാവരും പരിശുദ്ധാത്മാവിനാൽ നിറഞ്ഞ്, ആത്മാവ് സംസാരിക്കാൻ കഴിവു നൽകിയതനുസരിച്ച് വിവിധ ഭാഷകളിൽ സംസാരിക്കാൻ തുടങ്ങി. അപ്പസ്തോല പ്രവർത്തനങ്ങൾ 2:2–4
ജന്മദിനാശംസകൾ! ഇന്ന് പെന്തക്കുസ്താദിനത്തിൽ പരിശുദ്ധാത്മാവിന്റെ ആഗമനം ആഘോഷിക്കുമ്പോൾ, സഭയുടെ ജനനവും നാം ആഘോഷിക്കുന്നു. അതിനാൽ, സഭാജീവിതത്തിൽ നിങ്ങൾക്കുള്ള അംഗത്വത്തിന്റെ ആഘോഷം കൂടിയാണ് ഇന്ന്. ഒരു മാനുഷിക സ്ഥാപനം എന്ന നിലയിൽ, സഭ തന്റെ അംഗങ്ങളുടെ പാപങ്ങൾ നിമിത്തം എന്നും കഷ്ടതകൾ അനുഭവിച്ചിട്ടുണ്ട്. ദുഃഖകരമായ ഈ സത്യത്തെക്കുറിച്ച് ഇന്ന് നാം കൂടുതൽ കൂടുതൽ ബോധവാന്മാരാകുന്നു. എന്നാൽ സഭ തന്നിൽത്തന്നെ ക്രിസ്തുവിന്റെ നിർമല വധുവാണ്. ഭൂമിയിലും സ്വർഗത്തിലും ശുദ്ധീകരണസ്ഥലത്തിലുമുള്ള ക്രിസ്തുവിന്റെ ശരീരമാണ് സഭ. ഭൂമിയിലുള്ള നാം സമരസഭയിലെ അംഗങ്ങളാണ്. സ്വർഗത്തിലുള്ളവർ വിജയസഭയിലെ അംഗങ്ങളാണ്. ശുദ്ധീകരണസ്ഥലത്തിലുള്ളവർ സഹനസഭയിലെ അംഗങ്ങളാണ്. എന്നാൽ നാമെല്ലാവരും നമ്മുടെ ശിരസ്സായ ക്രിസ്തുവിന്റെ കീഴിൽ, അവിടുത്തെ വിശുദ്ധ ശരീരമായ സഭയിലെ അംഗങ്ങളെന്ന നിലയിൽ ഒന്നിച്ചുചേർന്നിരിക്കുന്നു.
എല്ലാ ഞായറാഴ്ചയും സഭയിലുള്ള നമ്മുടെ വിശ്വാസം നാം ഏറ്റുപറയുന്നു. “ഏകവും വിശുദ്ധവും സാർവത്രികവും ശ്ലൈഹികവുമായ സഭയിൽ” വിശ്വസിക്കുന്നുവെന്ന് നാം ഏറ്റുപറയുന്നു. കൃത്യമായി എന്താണ് ഇതിന്റെ അർഥം? ഒന്നാമതായി, പരിശുദ്ധാത്മാവിന്റെ ശക്തിയാലും പ്രവർത്തനത്താലും ക്രിസ്തുവിൽ വിശ്വാസം ഏറ്റുപറയുന്നവർ “ഒന്നായി” ഐക്യപ്പെടുന്നു എന്നാണ് ഇതിനർഥം. ഈ ഏകത്വം നിത്യതയോളം നിലനിൽക്കുന്ന ഒരു ആത്മീയ ഐക്യമാണ്. അത് അഭേദ്യമാണ്; നാം ഏതു ജീവിതം നയിക്കാനാണോ സൃഷ്ടിക്കപ്പെട്ടത്, ആ ജീവിതത്തിലേക്ക് അത് നമ്മെ പുനഃസ്ഥാപിക്കുന്നു. അതായത്, ദൈവത്തോടും മറ്റുള്ളവരോടുമുള്ള ഐക്യത്തിന്റെ ജീവിതം, ദൈവവുമായുള്ള മനുഷ്യകുലത്തിന്റെ കൂട്ടായ്മ.
ഒരൊറ്റ കുടുംബമെന്ന നിലയിൽ സഭ “വിശുദ്ധയും” ആണ്. ക്രിസ്തുവിന്റെ വീണ്ടെടുപ്പിൽ പങ്കുചേർന്നുകൊണ്ട് അവിടുത്തെ രക്തത്താൽ നാം പൂർണരാക്കപ്പെടുന്നു എന്നു പറയുന്നതിന്റെ മറ്റൊരു രൂപമാണ് വിശുദ്ധി. അവിടുത്തെ കരുണയാൽ നമ്മുടെ പാപങ്ങൾ ക്ഷമിക്കപ്പെടുകയും, പുത്രന്റെ നിത്യജീവനിൽ പങ്കുചേർന്നുകൊണ്ട് നാം സ്വർഗസ്ഥനായ പിതാവിന്റെ മക്കളായിത്തീരുകയും ചെയ്യുന്നു.
“സാർവത്രികം” എന്ന വാക്ക്, രക്ഷ എല്ലാവർക്കും വാഗ്ദാനം ചെയ്യപ്പെട്ടിരിക്കുന്നു എന്ന സത്യത്തെ സൂചിപ്പിക്കുന്നു. ഈ ദാനം സ്വീകരിക്കാൻ സന്നദ്ധരായ എല്ലാ മനുഷ്യർക്കും നൽകപ്പെട്ട സാർവത്രികമായ ഒരു വിളിയാണത്. ഏതാനും പേരെ മാത്രമല്ല, എല്ലാവരെയും രക്ഷിക്കാനാണ് ദൈവം വന്നത്; അനേകർ ഈ രക്ഷാദാനം സ്വീകരിക്കുകയും ചെയ്യും.
തന്റെ അപ്പസ്തോലന്മാരുടെ മധ്യസ്ഥതയിലൂടെ തന്റെ സഭ സ്ഥാപിക്കാൻ ദൈവം തിരഞ്ഞെടുത്തു എന്ന അർഥത്തിലാണ് നാം “ശ്ലൈഹികർ” ആയിരിക്കുന്നത്. രക്ഷാകരമായ സത്യം പ്രഘോഷിക്കപ്പെടുന്നതിനും കുരിശിലൂടെ നേടിയ കൃപ വിതരണം ചെയ്യപ്പെടുന്നതിനുമുള്ള ഉപകരണങ്ങളാകാൻ അവർ സവിശേഷമായി വിളിക്കപ്പെട്ടു. അപ്പസ്തോലന്മാരുടെ പ്രവർത്തനം ഇന്ന് അവരുടെ പിൻഗാമികളായ മെത്രാന്മാരിലൂടെയും മെത്രാന്മാരുടെ സഹപ്രവർത്തകരായ വൈദികരിലൂടെയും തുടരുന്നു. അവർ പാപികളായിരിക്കാമെങ്കിലും, ലോകത്തിനു തന്റെ കൃപയും സത്യവും പകർന്നുനൽകാൻ ദൈവം അവരെ ഉപയോഗിക്കുന്നു.
ക്രിസ്തുവിന്റെ ഏകശരീരത്തിലെ അംഗമെന്ന നിലയിൽ, സുവിശേഷം പങ്കുവച്ചുകൊണ്ടും ആഴമായ പ്രാർഥനാജീവിതം നയിച്ചുകൊണ്ടും തന്റെ കുടുംബത്തെ വളർത്താൻ ദൈവം നിങ്ങളെയും ക്ഷണിക്കുന്നു. നിങ്ങൾ വിളിക്കപ്പെടുകയും അയയ്ക്കപ്പെടുകയും ചെയ്യുന്നു; ഇന്ന് നാം പ്രത്യേകമായി ആഘോഷിക്കുന്ന പരിശുദ്ധാത്മാവിന്റെ വർഷണത്തിലൂടെയാണ് ഇത് സംഭവിക്കുന്നത്.
ദൈവത്തിന്റെ കുടുംബമായ സഭയിൽ അംഗമാകാൻ ക്ഷണിക്കപ്പെടുക എന്നത് എത്ര അത്ഭുതകരമായൊരു ഭാഗ്യമാണെന്ന് ഇന്ന് ചിന്തിക്കുക. ആ ക്ഷണം മറ്റുള്ളവരിലേക്കും എത്തിക്കാനുള്ള നിങ്ങളുടെ സുപ്രധാന കടമയെക്കുറിച്ചും ചിന്തിക്കുക. നിങ്ങളിലൂടെ ആരിലേക്കാണോ ദൈവം എത്തിച്ചേരാൻ ആഗ്രഹിക്കുന്നത്, അവരുമായി സുവിശേഷത്തിന്റെ രക്ഷാകരമായ സന്ദേശം പങ്കുവയ്ക്കാൻ നിങ്ങൾക്കും സഹായിക്കാനാകേണ്ടതിന്, നിങ്ങളുടെ ജീവിതത്തിൽ പരിശുദ്ധാത്മാവിന്റെ ഏഴു ദാനങ്ങളും വർധിക്കണമെന്നു പ്രാർഥിക്കുക.
പരിശുദ്ധാത്മാവേ, എഴുന്നള്ളി വരണമേ, അങ്ങയുടെ വിശ്വാസികളുടെ ഹൃദയങ്ങൾ നിറയ്ക്കണമേ; അവരിൽ അങ്ങയുടെ സ്നേഹാഗ്നി ജ്വലിപ്പിക്കണമേ. അങ്ങയുടെ ആത്മാവിനെ അയയ്ക്കണമേ; അവർ സൃഷ്ടിക്കപ്പെടും. അങ്ങ് ഭൂമിയുടെ മുഖം നവീകരിക്കുകയും ചെയ്യും. പരിശുദ്ധാത്മാവിന്റെ പ്രകാശത്താൽ വിശ്വാസികളുടെ ഹൃദയങ്ങളെ പഠിപ്പിച്ച ദൈവമേ, അതേ പരിശുദ്ധാത്മാവിനാൽ ഞങ്ങൾ യഥാർഥ ജ്ഞാനമുള്ളവരാകാനും അവിടുത്തെ ആശ്വാസങ്ങൾ സദാ ആസ്വദിക്കാനും ഞങ്ങളുടെ കർത്താവായ ക്രിസ്തുവഴി അനുഗ്രഹിക്കണമേ. ആമ്മേൻ. ഈശോയേ, ഞാൻ അങ്ങയിൽ ശരണപ്പെടുന്നു.
കത്തോലിക്കാ ദൈനംദിന ധ്യാനങ്ങൾ
ആണ്ടുവട്ടക്കാലം: മേയ് 24–ഓഗസ്റ്റ് 31
താഴെപ്പറയുന്ന വിൽപ്പനക്കാരിൽനിന്ന് ഇ-പുസ്തകം & പേപ്പർബാക്ക് രൂപങ്ങളിൽ ലഭ്യമാണ്:
Amazon പേപ്പർബാക്ക് പതിപ്പ് – Kindle – Google Play Books – iBooks – Barnes & Noble
ദൈവകരുണയെക്കുറിച്ചുള്ള വിചിന്തനങ്ങൾ
കൂടുതൽ വായനയ്ക്ക് – പന്തക്കുസ്താ ഞായറാഴ്ച
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
പരിശുദ്ധാത്മാവിന്റെ ഏഴു ദാനങ്ങൾ
ദൈവഭയം: ഈ ദാനത്താൽ, ദൈവവുമായുള്ള തന്റെ ബന്ധത്തിന് ഹാനി വരുത്തിയേക്കാവുന്ന ഏതൊരു കാര്യത്തെക്കുറിച്ചും ക്രൈസ്തവന് ആഴമായ അവബോധമുണ്ടാകുന്നു. ഈ ബന്ധത്തിന് ഹാനി വരുത്തുന്നതിനെക്കുറിച്ച് വിശുദ്ധമായ ഒരു “ഭയം” ഉണ്ടാകുകയും, എന്തു വിലകൊടുത്തും അത്തരം കാര്യങ്ങൾ ഒഴിവാക്കാനുള്ള കൃപ ലഭിക്കുകയും ചെയ്യുന്നു.
ജ്ഞാനം: ഈ ദാനത്തിലൂടെ, തന്റെ താത്ത്വിക ചിന്താശക്തി ഉപയോഗിച്ച് “ദൈവിക യാഥാർഥ്യങ്ങളെക്കുറിച്ച് ധ്യാനിക്കാൻ” ക്രൈസ്തവവിശ്വാസിക്ക് പ്രത്യേക കൃപ നൽകപ്പെടുന്നു. കാര്യങ്ങളെ സമഗ്രമായി കാണാനും നമ്മുടെ ലോകത്തിൽ സമാധാനത്തിന്റെയും ഐക്യത്തിന്റെയും ഉപകരണമായി ഏറ്റവും നന്നായി വർത്തിക്കേണ്ടത് എങ്ങനെയെന്നു മനസ്സിലാക്കാനും നമുക്കു കഴിയുന്നു.
ബുദ്ധി: വിശ്വാസകാര്യങ്ങളിൽ അതിസ്വാഭാവികമായ ഉറപ്പുണ്ടാകാനുള്ള കഴിവാണിത്. ജീവിതത്തിന്റെ അർഥം വ്യക്തമാകുന്നു. ദൈവിക വെളിപാടിന്റെ കൂടുതൽ ആഴമേറിയ വശങ്ങളുടെ അർഥം ഗ്രഹിക്കാനും സഹനത്തിന്റെ അർഥം മനസ്സിലാക്കാനും നമ്മെ സംശയത്തിലേക്കു പ്രലോഭിപ്പിക്കുന്ന കാര്യങ്ങളെ തിരിച്ചറിയാനും നമുക്കു കഴിയും. ദൈവത്തിന്റെ പദ്ധതിയനുസരിച്ച് ജീവിതത്തിലെ സകലവും നന്മയ്ക്കായി എങ്ങനെ പ്രവർത്തിക്കാമെന്ന് ഈ ദാനത്തിലൂടെ നാം മനസ്സിലാക്കുന്നു.
അറിവ്: ഈ ദാനത്തിലൂടെ, ഏതു സാഹചര്യത്തിലും ദൈവത്തിന്റെ ഹിതം എന്താണെന്ന് ക്രൈസ്തവവിശ്വാസി പ്രധാനമായും പ്രായോഗിക ബുദ്ധിയാൽ മനസ്സിലാക്കുന്നു. എങ്ങനെ ജീവിക്കണമെന്നും ദൈവഹിതം എങ്ങനെ വിവേചിച്ചറിയണമെന്നും അനുദിന ജീവിതത്തിൽ എന്തു തീരുമാനമെടുക്കണമെന്നും നാം അറിയുന്നു. കഴിഞ്ഞകാല തെറ്റുകളിൽനിന്നു പഠിക്കാനും ഈ ദാനം നമ്മെ പ്രാപ്തരാക്കുന്നു.
ആലോചന: ഈ ദാനത്തിലൂടെ, സഭ മുഴുവനെയും ചേർത്തുനിർത്തുന്ന ഒരു ചങ്ങലയിലെ കണ്ണിയായി ക്രൈസ്തവവിശ്വാസി തന്നെത്തന്നെ കാണുന്നു. നമ്മുടെ യാത്രയിൽ പരസ്പരം സഹായിക്കാനും താങ്ങാകാനും ദൈവം നമ്മിൽ ഓരോരുത്തരെയും ഉപയോഗിക്കുന്നു. പരസ്പരം വളർത്തുന്നതിൽ നമ്മുടെ പങ്കു നിർവഹിക്കാനായി എന്തു പറയണമെന്നും എങ്ങനെ പ്രവർത്തിക്കണമെന്നും നാം അറിയുന്നു.
ആത്മധൈര്യം: ലളിതമായി പറഞ്ഞാൽ, നന്മ ചെയ്യാനും തിന്മ ഒഴിവാക്കാനുമുള്ള മനസ്സിന്റെയും ആത്മാവിന്റെയും ദൃഢതയാണിത്. ഇത് ഒരുതരം ക്രൈസ്തവ ധൈര്യമാണ്. സ്നേഹത്തിൽ അടിമുടി സമർപ്പിതമായ ഒരു ജീവിതത്തിലേക്ക് സുവിശേഷം നമ്മെയെല്ലാം വിളിക്കും. ആ വിളി അനുസരിച്ചു മുന്നേറാൻ ആവശ്യമായ ശക്തി ആത്മധൈര്യം നമുക്കു നൽകുന്നു.
ദൈവഭക്തി: ഈ ദാനം ഒന്നാമതായി ദൈവത്തെ ആദരിക്കാനും സ്നേഹിക്കാനും നമ്മെ പ്രാപ്തരാക്കുന്നു; അതോടൊപ്പം പരസ്പരം അന്തസ്സ് തിരിച്ചറിയാനും ദൈവമക്കളെന്ന നിലയിൽ അന്യോന്യം ആദരിക്കാനും നമ്മെ സഹായിക്കുന്നു.
