ജൂൺ 7, 2021
ആണ്ടുവട്ടക്കാലത്തിലെ പത്താം ആഴ്ചയിലെ തിങ്കളാഴ്ച
ഇന്നത്തെ വായനകൾ
ജനക്കൂട്ടത്തെ കണ്ടപ്പോൾ യേശു മലമുകളിലേക്കു കയറി. അവൻ ഇരുന്നുകഴിഞ്ഞപ്പോൾ ശിഷ്യന്മാർ അവന്റെ അടുത്തെത്തി. അവൻ അവരെ ഇങ്ങനെ പഠിപ്പിക്കാൻ തുടങ്ങി: “ആത്മാവിൽ ദരിദ്രരായവർ ഭാഗ്യവാന്മാർ; എന്തെന്നാൽ, സ്വർഗരാജ്യം അവരുടേതാണ്.” മത്തായി 5:1–3
അഷ്ടസൗഭാഗ്യങ്ങൾ നമ്മുടെ മുമ്പിൽ വയ്ക്കുന്ന അത്യുന്നതമായ വിളിയെക്കുറിച്ച് ധ്യാനിക്കാനാണ് ഇന്ന് നമുക്കു ലഭിക്കുന്ന ക്ഷണം. ഗലീലി കടലിന് തൊട്ടു വടക്കുള്ള ഒരു കുന്നിൻമുകളിലാണ് യേശു ഈ പാഠങ്ങൾ പഠിപ്പിച്ചത്. അവന്റെ പ്രസംഗം കേൾക്കാനും അവൻ ചെയ്ത അനേകം അത്ഭുതങ്ങൾക്ക് സാക്ഷ്യം വഹിക്കാനും ധാരാളം ആളുകൾ യേശുവിന്റെ അടുക്കൽ വന്നിരുന്നു. ജനവാസത്തിൽനിന്ന് അകലെയുള്ള ഈ സ്ഥലത്ത് അവർ അവന്റെ അടുത്തേക്കു കൂട്ടമായി എത്തി. ഇന്ന് “ഗിരിപ്രഭാഷണം” എന്നറിയപ്പെടുന്ന പ്രഭാഷണം നടത്തുമ്പോൾ യേശു അവരെ അവിടെ ഇരുത്തി. മത്തായിയുടെ സുവിശേഷത്തിലെ 5 മുതൽ 7 വരെയുള്ള അധ്യായങ്ങളിലാണ് ഈ പ്രഭാഷണം കാണുന്നത്. യേശു തന്റെ പരസ്യശുശ്രൂഷ ആരംഭിച്ച് അധികം താമസിയാതെയാണ് ഇതു നടന്നത്.
തന്റെ പരസ്യശുശ്രൂഷയ്ക്ക് എത്ര അതിശയകരമായ തുടക്കം! യേശുവിന്റെ ഈ പ്രബോധനം തികച്ചും പുതിയതായിരുന്നു; അത് അനേകരെ വിസ്മയഭരിതരാക്കിയിരിക്കണം. പത്തു കൽപനകൾപോലുള്ള പഴയനിയമത്തിലെ അനുശാസനങ്ങൾ പഠിപ്പിക്കുന്നതിൽ മാത്രമായി യേശു ഇനി ഒതുങ്ങിനിന്നില്ല; അതുവരെ ആരും സങ്കൽപിച്ചിട്ടില്ലാത്ത ഒരു തലത്തിലേക്ക് അവൻ ഇപ്പോൾ ധാർമികനിയമത്തെ ഉയർത്തി.
പുതിയ അധികാരത്തോടും ജ്ഞാനത്തോടുംകൂടെ സംസാരിക്കുന്ന ഈ പുതിയ ഗുരുവിനെ ശ്രവിച്ചപ്പോൾ ജനങ്ങൾക്ക് ഒരേസമയം ആവേശവും ആശയക്കുഴപ്പവും തോന്നിയിരിക്കാം. നീതിക്കുവേണ്ടി വിശക്കുകയും ദാഹിക്കുകയും ചെയ്യുക, കരുണയുള്ളവരും ഹൃദയശുദ്ധിയുള്ളവരുമായിരിക്കുക, സമാധാനം സ്ഥാപിക്കുന്നവരായിരിക്കുക എന്നിവ അവർക്ക് അംഗീകരിക്കാൻ കഴിഞ്ഞിരിക്കാം. എന്നാൽ ദരിദ്രരും ദുഃഖിതരും സൗമ്യരുമായിരിക്കുന്നത് എന്തുകൊണ്ടാണ് അനുഗ്രഹങ്ങളായി കണക്കാക്കപ്പെട്ടത്? അതിലേറെ വെല്ലുവിളി ഉയർത്തുന്ന മറ്റൊരു ചോദ്യം ഇതാണ്: നീതിക്കുവേണ്ടി പീഡിപ്പിക്കപ്പെടുന്നതോ യേശുവിന്റെ നിമിത്തം അപമാനിക്കപ്പെടുകയും വ്യാജമായി കുറ്റാരോപിതരാകുകയും ചെയ്യുന്നതോ നല്ലതാകുന്നത് എന്തുകൊണ്ടാണ്?
യേശുവിന്റെ പുതിയതും സമൂലമായ മാറ്റം ആവശ്യപ്പെടുന്നതുമായ പ്രബോധനം വ്യക്തമായി മനസ്സിലാക്കുമ്പോൾ, ഒരേസമയം ആശയക്കുഴപ്പവും ആവേശവും അനുഭവപ്പെട്ടിരിക്കാവുന്നത് അവന്റെ ആദ്യശിഷ്യന്മാർക്കു മാത്രമല്ല. നിങ്ങളും അവന്റെ പ്രബോധനങ്ങൾ യഥാർഥത്തിൽ ശ്രവിക്കുകയും അവൻ അർഥമാക്കുന്നത് മനസ്സിലാക്കുകയും ചെയ്യുന്നെങ്കിൽ, നിങ്ങളുടെ അസ്തിത്വത്തിന്റെ ഉള്ളറകളിലേക്കുപോലും ആ വെല്ലുവിളി എത്തുന്നതായി കണ്ടെത്തും. യേശുവിന്റെ പ്രബോധനം പൂർണമായും മടികൂടാതെയും സ്വീകരിക്കണം.
പൂർണതയിലേക്കുള്ള നമ്മുടെ വിളിയാണ് അഷ്ടസൗഭാഗ്യങ്ങൾ. വിശുദ്ധിയുടെ ഉന്നതികളിലേക്കു സഞ്ചരിക്കാനും സ്വർഗത്തിന്റെ മഹത്ത്വം നേടാനുമുള്ള വഴി അവ നമുക്കു കാണിച്ചുതരുന്നു. സന്തോഷത്തിന്റെയും ആനന്ദത്തിന്റെയും പൂർണതയിലേക്കുള്ള, കൃത്യവും വിശദവുമായ നമ്മുടെ വഴികാട്ടിയാണ് അവ. എന്നാൽ നമ്മുടെ മനസ്സിലും പ്രവൃത്തികളിലും സമൂലമായ പരിവർത്തനത്തിനും അവ നമ്മെ വിളിക്കുന്നു. അവ സ്വീകരിക്കുക “എളുപ്പമല്ല”; കാരണം, നമ്മിലുള്ള എല്ലാ സ്വാർഥപ്രവണതകളിൽനിന്നും പിന്തിരിയാനും ലൗകികമായ എല്ലാ പ്രലോഭനങ്ങളിൽനിന്നും ആസക്തികളിൽനിന്നും പാപത്തിൽനിന്നും സ്വതന്ത്രമായി ജീവിക്കാൻ തിരഞ്ഞെടുക്കാനും അവ നമ്മോട് ആവശ്യപ്പെടുന്നു. അഷ്ടസൗഭാഗ്യങ്ങൾ ശ്രവിക്കുകയും മനസ്സിലാക്കുകയും സ്വീകരിക്കുകയും ചെയ്യുന്നവരെ പൂർണത കാത്തിരിക്കുന്നു.
വെല്ലുവിളി നിറഞ്ഞ ഈ ഗിരിപ്രഭാഷണത്തിന്റെ ആരംഭത്തെക്കുറിച്ച് ഇന്ന് ചിന്തിക്കുക. ഓരോ സൗഭാഗ്യവും പ്രാർഥനാവിഷയമാക്കാൻ സമയം കണ്ടെത്താൻ ശ്രമിക്കുക. വിശുദ്ധിയിലേക്കുള്ള ഈ ഓരോ ക്ഷണത്തിന്റെയും പൂർണമായ അർഥം പ്രാർഥനയിലൂടെയും ധ്യാനത്തിലൂടെയും മാത്രമേ മനസ്സിലാക്കാൻ കഴിയൂ. ആന്തരികമായ ആത്മീയദാരിദ്ര്യത്തിലേക്കുള്ള വിളിയിൽനിന്ന് ആരംഭിക്കുക. ദൈവഹിതത്തിന്റെ ഭാഗമല്ലാത്ത എല്ലാറ്റിൽനിന്നുമുള്ള സമ്പൂർണമായ അനാസക്തിയിലേക്കാണ് ഈ സൗഭാഗ്യം നമ്മെ വിളിക്കുന്നത്. തുടർന്ന്, നിങ്ങളുടെ പാപത്തെക്കുറിച്ച് ദുഃഖിക്കുന്നതിന്റെയും എല്ലാ കാര്യങ്ങളിലും ഹൃദയശുദ്ധിയും വിനയവും തേടുന്നതിന്റെയും പ്രാധാന്യം പരിചിന്തിക്കുക. ഓരോ സൗഭാഗ്യത്തെക്കുറിച്ചും ധ്യാനിക്കുക; നിങ്ങൾക്ക് ഏറ്റവും വെല്ലുവിളിയായി തോന്നുന്ന സൗഭാഗ്യത്തിനായി കൂടുതൽ സമയം ചെലവഴിക്കുക. ഈ പ്രഭാഷണത്തിലൂടെ നമ്മുടെ കർത്താവിന് നിങ്ങളോടു പറയാൻ ഏറെയുണ്ട്. അതിലൂടെ നിങ്ങളെ വിശുദ്ധിയുടെ ഉന്നതികളിലേക്കു നയിക്കാൻ അവനെ അനുവദിക്കുന്നതിൽ മടിക്കരുത്.
സകല വിശുദ്ധിയുടെയും നാഥാ, അങ്ങ് എല്ലാ വിധത്തിലും പരിപൂർണനാണ്. എല്ലാ പുണ്യങ്ങളും അഷ്ടസൗഭാഗ്യങ്ങളും അങ്ങ് പൂർണതയോടെ ജീവിച്ചു. ജീവിതത്തിന്റെ പൂർണതയിലേക്ക് അങ്ങ് എന്നെ വിളിക്കുന്നത് കേൾക്കാനും എന്റെ ജീവിതം മുഴുവനും ഉദാരമായി സമർപ്പിച്ചുകൊണ്ട് അതിനോടു പ്രതികരിക്കാനും കഴിയേണ്ടതിന്, അങ്ങേക്കായി എന്നെത്തന്നെ തുറന്നുകൊടുക്കാനുള്ള കൃപ എനിക്കു നൽകണമേ. പ്രിയ കർത്താവേ, അങ്ങ് എനിക്കു നൽകാൻ ആഗ്രഹിക്കുന്ന സന്തോഷവും സംതൃപ്തിയും ഞാൻ കണ്ടെത്തേണ്ടതിന് എന്നെ വിശുദ്ധനാക്കണമേ. യേശുവേ, ഞാൻ അങ്ങയിൽ ശരണപ്പെടുന്നു.
തിരുഹൃദയ നൊവേന
നൊവേന തീയതികൾ: 2021 ജൂൺ 2-10
2021 ജൂൺ 11: തിരുഹൃദയത്തിന്റെ മഹോത്സവം
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
മുകളിൽ നൽകിയിരിക്കുന്ന മുഖ്യചിത്രം: Flickr
