നിങ്ങളുടെ ഹൃദയം മൃദുവാക്കുക

ജൂലൈ 8, 2021
ആണ്ടുവട്ടത്തിലെ പതിനാലാം ആഴ്ചയിലെ വ്യാഴാഴ്ച
ഇന്നത്തെ വായനകൾ

“ആരെങ്കിലും നിങ്ങളെ സ്വീകരിക്കുകയോ നിങ്ങളുടെ വാക്കുകൾ കേൾക്കുകയോ ചെയ്യുന്നില്ലെങ്കിൽ, ആ വീടോ പട്ടണമോ വിട്ടുപോകുമ്പോൾ നിങ്ങളുടെ കാലുകളിലെ പൊടി തട്ടിക്കളയുക. ആമേൻ, ഞാൻ നിങ്ങളോടു പറയുന്നു: വിധിദിവസത്തിൽ ആ പട്ടണത്തെക്കാൾ സോദോം, ഗൊമോറ ദേശങ്ങൾക്കു സഹിക്കാവുന്നതായിരിക്കും.” മത്തായി 10:14–15

ഹൃദയകാഠിന്യത്തിന്റെ പേരിൽ യേശു ഫരിസേയരെ എത്ര കഠിനമായി കുറ്റംവിധിച്ചുവെന്ന് ഓർക്കുക. മത്തായിയുടെ സുവിശേഷം 23-ാം അധ്യായത്തിൽ, കപടനാട്യക്കാരും അന്ധരായ വഴികാട്ടികളുമായ ഈ ഫരിസേയർക്കെതിരെ “നിങ്ങൾക്കു ദുരിതം” എന്നു പറഞ്ഞുകൊണ്ട് യേശു ഏഴു തവണ കുറ്റംവിധിക്കുന്നു. അവരെ മാനസാന്തരത്തിലേക്കു വിളിക്കുകയെന്ന ലക്ഷ്യത്തോടെയായിരുന്നതിനാൽ, ഈ കുറ്റവിധികൾ യേശുവിന്റെ സ്നേഹപ്രവൃത്തികളായിരുന്നു. അതുപോലെ, ഇന്നത്തെ സുവിശേഷത്തിൽ, പന്ത്രണ്ടുപേർ ഒരു പട്ടണത്തിൽ സുവിശേഷം പ്രസംഗിക്കുമ്പോൾ തിരസ്കരിക്കപ്പെട്ടാൽ എന്തു ചെയ്യണമെന്ന് യേശു അവർക്കു നിർദേശം നൽകുന്നു. അവർ തങ്ങളുടെ കാലുകളിലെ “പൊടി തട്ടിക്കളയണം.”

സുവിശേഷം പ്രസംഗിക്കാനുള്ള ദൗത്യം നൽകി പന്ത്രണ്ടുപേരെ “ഇസ്രായേൽ ഭവനത്തിലെ നഷ്ടപ്പെട്ട ആടുകളുടെ” അടുത്തേക്ക് യേശു അയയ്ക്കുന്ന പശ്ചാത്തലത്തിലാണ് ഈ നിർദേശം നൽകപ്പെട്ടത്. മോശയുടെ നിയമത്തിന്റെയും പ്രവാചകന്മാരുടെയും സന്ദേശം നേരത്തേതന്നെ ഏൽപ്പിക്കപ്പെട്ടിരുന്നവരുടെ അടുത്തേക്കായിരുന്നു അന്ന് അവർ പോകേണ്ടിയിരുന്നത്. എന്നാൽ ഇപ്പോൾ ദൈവരാജ്യം വന്നെത്തിയിരിക്കുന്നു എന്നാണ് അവർ പ്രഘോഷിക്കേണ്ടിയിരുന്നത്. വാഗ്ദാനം ചെയ്യപ്പെട്ട മിശിഹാ യേശുവായിരുന്നു; അവിടുന്ന് ഇപ്പോൾ ഇവിടെ സന്നിഹിതനായിരുന്നു. ഇസ്രായേൽ ഭവനത്തിൽ യേശുവിനെ തിരസ്കരിക്കുന്നവരാകട്ടെ, അപ്പസ്തോലന്മാർ തങ്ങളുടെ കാലുകളിൽനിന്ന് ആ പട്ടണത്തിലെ പൊടി തട്ടിക്കളയുന്ന ഈ പ്രവാചകപ്രവൃത്തിയിലൂടെ കുറ്റംവിധിക്കപ്പെടേണ്ടിയിരുന്നു.

ആദ്യമൊക്കെ ഇത് അല്പം കഠിനമായി തോന്നാം. ക്ഷമയും തുടർച്ചയായ സംഭാഷണങ്ങളും സൗമ്യതയും മറ്റും കൂടുതൽ ഫലപ്രദമായിരിക്കുമെന്ന് ഒരാൾക്കു തോന്നാം. ഇന്നത്തെ നമ്മുടെ പല അനുഭവങ്ങളിലും അത് അങ്ങനെയായിരിക്കാമെങ്കിലും, യേശു പന്ത്രണ്ടുപേർക്കും ഈ കല്പന നൽകി എന്ന വസ്തുത നിലനിൽക്കുന്നു.

ഫരിസേയരെ കുറ്റംവിധിച്ചതുപോലെതന്നെ, കാലുകളിലെ പൊടി തട്ടിക്കളയുന്ന ഈ പ്രവാചകപ്രവൃത്തിയും ഒരു സ്നേഹപ്രവൃത്തിയായിരുന്നു. തീർച്ചയായും, വിവേകശൂന്യമായ കോപത്താൽ അപ്പസ്തോലന്മാർ ഇതു ചെയ്യാൻ പാടില്ലായിരുന്നു. തിരസ്കരണം അവരുടെ അഭിമാനത്തെ മുറിപ്പെടുത്തിയതുകൊണ്ടോ ഈ ആളുകളോടുള്ള അവജ്ഞകൊണ്ടോ ആയിരുന്നില്ല അവർ അങ്ങനെ ചെയ്യേണ്ടിയിരുന്നത്. മറിച്ച്, പട്ടണവാസികളുടെ പ്രവൃത്തികളുടെ അനന്തരഫലങ്ങൾ അവർക്കു കാണിച്ചുകൊടുക്കാനുള്ള മാർഗമായിട്ടായിരുന്നു അപ്പസ്തോലന്മാർ അങ്ങനെ ചെയ്യേണ്ടിയിരുന്നത്. തിരഞ്ഞെടുക്കപ്പെട്ട ജനത്തിന്റെ ഈ പട്ടണങ്ങൾ വാഗ്ദാനം ചെയ്യപ്പെട്ട മിശിഹായെ തിരസ്കരിക്കുമ്പോൾ, അതിന്റെ അനന്തരഫലങ്ങൾ അവർ മനസ്സിലാക്കേണ്ടതുണ്ടായിരുന്നു. സന്ദേശവാഹകരെ തിരസ്കരിക്കുന്നതിലൂടെ സുവിശേഷത്തിന്റെ രക്ഷാകരമായ കൃപയെയാണ് തങ്ങൾ തിരസ്കരിക്കുന്നതെന്ന് അവർ അറിയേണ്ടതുണ്ടായിരുന്നു.

ഒന്നാമതായി, യേശു ആരെക്കുറിച്ചാണ് സംസാരിച്ചതെന്നു പരിഗണിക്കേണ്ടത് പ്രധാനമാണ്. സുവിശേഷസന്ദേശം “സ്വീകരിക്കാതിരിക്കുകയും” അതു “കേൾക്കാൻ” പോലും തയ്യാറാകാതിരിക്കുകയും ചെയ്യുന്നവരെക്കുറിച്ചാണ് അവിടുന്നു സംസാരിച്ചത്. ദൈവത്തെയും അവിടുത്തെ രക്ഷാകരസന്ദേശത്തെയും പൂർണമായി തിരസ്കരിച്ചവരാണിവർ. തങ്ങളുടെ സ്വതന്ത്രമായ തിരഞ്ഞെടുപ്പിലൂടെ അവർ ദൈവത്തിൽനിന്നും അവിടുത്തെ വിശുദ്ധ സുവിശേഷത്തിൽനിന്നും സ്വയം വേർപെട്ടിരിക്കുന്നു. അവർ പിടിവാശിക്കാരും ദുശ്ശാഠ്യക്കാരും ഹൃദയകാഠിന്യമുള്ളവരുമാണ്. അതിനാൽ, സുവിശേഷത്തോടു പൂർണമായി അടഞ്ഞിരിക്കുന്ന ഈ അങ്ങേയറ്റത്തെ സാഹചര്യത്തിലാണ്, ഈ പ്രവാചകപ്രവൃത്തി ചെയ്തുകൊണ്ട് അവിടം വിട്ടുപോകാൻ യേശു തന്റെ അപ്പസ്തോലന്മാരോടു നിർദേശിക്കുന്നത്. ഇതു ചെയ്യുന്നതു കാണുമ്പോൾ, ഒരുപക്ഷേ ചിലർക്ക് എന്തോ നഷ്ടപ്പെട്ടുവെന്ന തോന്നൽ ഉണ്ടാകാം. ഒരുപക്ഷേ ചിലർ തങ്ങൾക്കു തെറ്റുപറ്റിയെന്നു തിരിച്ചറിയാം. ഒരുപക്ഷേ ചിലർക്കു വിശുദ്ധമായ കുറ്റബോധം ഉണ്ടാകുകയും ഒടുവിൽ അവരുടെ ഹൃദയങ്ങൾ മൃദുവാകുകയും ചെയ്യാം.

യേശുവിന്റെ ഈ പ്രബോധനം നിങ്ങളുടെയും കണ്ണുകൾ തുറക്കേണ്ടതാണ്. സുവിശേഷസന്ദേശം നിങ്ങൾ എത്രമാത്രം പൂർണമായി സ്വീകരിക്കുകയും ശ്രദ്ധിച്ചു കേൾക്കുകയും ചെയ്യുന്നു? ദൈവരാജ്യത്തെക്കുറിച്ചുള്ള രക്ഷാകരമായ പ്രഘോഷണത്തിൽ നിങ്ങൾ എത്രമാത്രം ശ്രദ്ധിക്കുന്നു? നിങ്ങൾ അതിനായി തുറന്നിരിക്കുന്നിടത്തോളം ദൈവത്തിന്റെ കരുണയുടെ പ്രവാഹം ഒഴുകിവരുന്നു. എന്നാൽ നിങ്ങൾ അതിനായി തുറന്നിരിക്കാത്തിടത്തോളം നഷ്ടത്തിന്റെ അനുഭവമാണ് ഉണ്ടാകുന്നത്.

ഈ പട്ടണങ്ങളിലൊന്നിൽ നിങ്ങൾ സന്നിഹിതരായിരിക്കുന്നതായി ഇന്നു ധ്യാനിക്കുക. ദൈവം നിങ്ങളോടു പറയാൻ ആഗ്രഹിക്കുന്ന കാര്യങ്ങളോട് നിങ്ങൾ പലവിധത്തിൽ അടഞ്ഞുനിന്നതിനെക്കുറിച്ചു ചിന്തിക്കുക. നിങ്ങളുടെ ഹൃദയം വിശാലമായി തുറക്കുക; അതീവ ശ്രദ്ധയോടെ കേൾക്കുക; സുവിശേഷസന്ദേശത്തിനു മുന്നിൽ വിനയമുള്ളവരായിരിക്കുക. അതു സ്വീകരിക്കാനും, സ്വീകരിക്കുമ്പോൾ നിങ്ങളുടെ ജീവിതം മാറ്റാനും തയ്യാറാകുക. ദൈവം നിങ്ങളോടു പറയുന്നതെല്ലാം നിങ്ങളുടെ ജീവിതത്തെ രൂപാന്തരപ്പെടുത്താൻ ഇടയാകേണ്ടതിന്, ദൈവരാജ്യത്തിലെ അംഗമായിരിക്കാൻ സ്വയം സമർപ്പിക്കുക.

കരുണാമയനായ എന്റെ കർത്താവേ, അങ്ങയുടെ ദൃഢനിലപാടും ശിക്ഷണങ്ങളും ഹൃദയകാഠിന്യമുള്ളവരോടുള്ള അങ്ങയുടെ അതിരറ്റ കരുണയുടെ പ്രവൃത്തിയാണ്. പ്രിയ കർത്താവേ, എന്റെ ഹൃദയം മൃദുവാക്കണമേ. ഞാൻ പിടിവാശിയോടെ ഹൃദയമടച്ചിരിക്കുമ്പോൾ, അങ്ങയുടെ മഹത്തായ സ്നേഹത്തിൽ എന്നെ ശാസിക്കണമേ. അങ്ങനെ ഞാൻ എല്ലായ്‌പ്പോഴും പൂർണഹൃദയത്തോടെ അങ്ങയിലേക്കും അങ്ങയുടെ രക്ഷാകരസന്ദേശത്തിലേക്കും മടങ്ങിവരട്ടെ. ഈശോയേ, ഞാൻ ശരണം വയ്ക്കുന്നത് അങ്ങയിലാണ്.