2024 ജൂൺ 9, ഞായറാഴ്ച
സാധാരണകാലത്തിലെ പത്താം ഞായർ (വർഷം B)
ഇന്നത്തെ വായനകൾ
“സത്യമായി ഞാൻ നിങ്ങളോടു പറയുന്നു: മനുഷ്യർ ചെയ്യുന്ന എല്ലാ പാപങ്ങളും അവർ ഉച്ചരിക്കുന്ന എല്ലാ ദൈവദൂഷണങ്ങളും അവരോടു ക്ഷമിക്കപ്പെടും. എന്നാൽ പരിശുദ്ധാത്മാവിനെതിരെ ദൂഷണം പറയുന്നവന് ഒരിക്കലും പാപമോചനം ലഭിക്കുകയില്ല; അവൻ നിത്യമായ പാപത്തിന്റെ കുറ്റക്കാരനാണ്.” കാരണം, “അവന് അശുദ്ധാത്മാവുണ്ട്” എന്ന് അവർ പറഞ്ഞിരുന്നു. മർക്കോസ് 3:28–30
കഫർണാമിലുള്ള തന്റെ വീടിനു ചുറ്റും കൂടിയ ജനക്കൂട്ടത്തോടാണ് യേശു ഈ വാക്കുകൾ പറഞ്ഞത്. കാരണം, രണ്ടു കൂട്ടർ തൊട്ടുമുമ്പ് അവനെക്കുറിച്ച് പരസ്യമായി കടുത്ത വിമർശനം നടത്തിയിരുന്നു. ആദ്യം, അവന്റെ ബന്ധുക്കളിൽ ചിലർ അവിടെയെത്തി എല്ലാവരോടുമായി, “അവന് ബുദ്ധിഭ്രമം സംഭവിച്ചിരിക്കുന്നു” എന്നു പറഞ്ഞു. തുടർന്ന്, ജറുസലെമിൽനിന്നുള്ള ചില നിയമജ്ഞർ, “അവനെ ബേൽസെബൂൽ ബാധിച്ചിരിക്കുന്നു” എന്നു പറഞ്ഞു. അങ്ങനെ, അവരുടെ ദൈവദൂഷണം പരിശുദ്ധാത്മാവിനെതിരായ പാപമാണെന്നും അതിന് നിത്യമായ പ്രത്യാഘാതങ്ങൾ ഉണ്ടാകുമെന്നും യേശു വ്യക്തമായി പ്രസ്താവിക്കുന്നു.
ചില പാപങ്ങൾ ഒരിക്കലും ക്ഷമിക്കപ്പെടാത്തത് എന്തുകൊണ്ടാണ്? പരിശുദ്ധാത്മാവിനെതിരായ പാപം എന്നത് കൃത്യമായി എന്താണ്? പരമ്പരാഗതമായി, നമ്മുടെ സഭ ഈ പാപത്തെ രണ്ടു വിധത്തിൽ വിശദീകരിച്ചിട്ടുണ്ട്. ഒന്നാമതായി, അത് അന്ത്യംവരെ അനുതപിക്കാതിരിക്കുന്ന പാപമാണ്; അതായത്, ദൃഢവാശിയോടെ ഗൗരവമായ പാപത്തിൽ തുടരുന്ന പാപം. ദൃഢവാശി, അഥവാ അനുതപിക്കാനുള്ള വിസമ്മതം, ക്ഷമിക്കപ്പെടാനാവാത്ത പാപമാണ്. കാരണം ലളിതമാണ്: ആ പാപം ചെയ്യുന്ന വ്യക്തി ഒരിക്കലും ക്ഷമ തേടുന്നില്ല. സ്വന്തം പാപത്തിൽ അവർ അത്രയധികം ആഴ്ന്നുപോകുന്നു; മാറ്റത്തിനു തയ്യാറാകുന്നില്ല. അതിനാൽ, ദൈവത്തിന്റെ കരുണയ്ക്ക് അവരിൽ പ്രവേശിക്കാൻ കഴിയുന്നില്ല. രണ്ടാമതായി, ദൈവകരുണയിലുള്ള അതിരുകടന്ന ആശ്രയമായും ഇതിനെ വിശദീകരിച്ചിട്ടുണ്ട്. അതായത്, ദൈവം ക്ഷമിക്കുമെന്നു പ്രതീക്ഷിച്ചുകൊണ്ട് ഒരാൾ പാപം ചെയ്യുന്നു. ഇത്തരത്തിലുള്ള ആശ്രയം കൂടുതൽ സൂക്ഷ്മമായ ഒന്നാണ്; എങ്കിലും പാപമോചനത്തിന് ആവശ്യമായ ആത്മാർത്ഥമായ അനുതാപത്തിൽനിന്ന് ഒരു വ്യക്തിയെ അകറ്റിനിർത്തുക എന്ന ഫലവും അതിനുണ്ട്. ഇങ്ങനെ കരുതുന്ന വ്യക്തി തന്റെ പാപത്തിൽ തുടരുന്നിടത്തോളം ഒരിക്കലും പൂർണമായി അനുതപിക്കുകയോ ജീവിതം തിരുത്തുകയോ ചെയ്യുന്നില്ല.
നിങ്ങൾ ഇപ്പോൾ പോരാടിക്കൊണ്ടിരിക്കുന്നതോ ഭാവിയിൽ പോരാടേണ്ടിവന്നേക്കാവുന്നതോ ആയ അനേകം പാപങ്ങൾക്കിടയിൽ, പരിശുദ്ധാത്മാവിനെതിരായ പാപങ്ങളിൽ പ്രത്യേക ശ്രദ്ധ ചെലുത്തുക. ദൈവത്തിന്റെ പാപമോചനത്തിന് നമുക്ക് അവകാശമുണ്ടെന്ന് ഒരിക്കലും കരുതരുത്. എങ്കിലും, ദൈവകരുണ അത്ര വലിയതായതിനാൽ, നാം എളിമയോടെ നമ്മുടെ പാപം ഏറ്റുപറയുകയും അതിനെക്കുറിച്ച് ആത്മാർത്ഥമായി അനുതപിക്കുകയും ചെയ്യുന്ന നിമിഷം ദൈവം ക്ഷമിക്കുമെന്ന് നാം എപ്പോഴും വിശ്വസിക്കണം. എന്നാൽ നിർണായകമായ കാര്യം “ആത്മാർത്ഥത”യാണ്. ക്ഷമ ലഭിക്കണമെങ്കിൽ, നമ്മുടെ ഉള്ളിലുള്ള അനുതാപം ആത്മാർത്ഥവും സത്യസന്ധവും യഥാർത്ഥവും പൂർണവുമായിരിക്കണം. നമുക്ക് ദൈവത്തെ കബളിപ്പിക്കാനാവില്ല. തീർച്ചയായും നമുക്കു നമ്മെത്തന്നെ കബളിപ്പിക്കാനാകും, പക്ഷേ ദൈവത്തെ കഴിയില്ല.
പരിശുദ്ധാത്മാവിനെതിരായ ഒരു പാപത്തിനും നിങ്ങൾ കുറ്റക്കാരനല്ലെന്ന് പതിവായി ഉറപ്പുവരുത്താനുള്ള ഏറ്റവും നല്ല മാർഗങ്ങളിലൊന്ന്, കുമ്പസാരമെന്ന കൂദാശ സ്വീകരിക്കുകയും തുറന്ന മനസ്സോടും പൂർണതയോടും എളിമയോടുംകൂടെ നിങ്ങളുടെ പാപങ്ങൾ ഏറ്റുപറയുകയും ചെയ്യുന്നതാണ്. നിങ്ങളുടെ പാപത്തിന്റെ ഉത്തരവാദിത്വം ഏറ്റെടുക്കുക. അത് അംഗീകരിക്കുക. അതിനെക്കുറിച്ച് മനസ്തപിക്കുക. മാറ്റം വരുത്താൻ ദൃഢനിശ്ചയം ചെയ്യുക. തുടർന്ന് അത് കുമ്പസാരത്തിൽ ഏറ്റുപറയുകയും ദൈവകരുണയിൽ ആശ്രയിക്കുകയും ചെയ്യുക.
പാപത്തെക്കുറിച്ചുള്ള നിങ്ങളുടെ അനുതാപത്തിൽ ഏതെങ്കിലും വിധത്തിൽ ആത്മാർത്ഥതയും പൂർണതയും കുറവുണ്ടോ എന്ന് ഇന്ന് ചിന്തിക്കുക. നിങ്ങൾ ചെയ്ത പാപങ്ങളെക്കുറിച്ച് നിങ്ങളോടുതന്നെ സത്യസന്ധത പുലർത്തുന്നുണ്ടോ? ആ പാപങ്ങളുടെ ഉത്തരവാദിത്വം നിങ്ങൾ ഏറ്റെടുത്തിട്ടുണ്ടോ? അങ്ങനെയെങ്കിൽ, അവ ദൈവത്തോട് ഏറ്റുപറയുകയും ഇനിയൊരിക്കലും അവ ചെയ്യുകയില്ലെന്ന് ദൃഢനിശ്ചയം ചെയ്യുകയും ചെയ്തിട്ടുണ്ടോ? അനുതാപത്തെ ഗൗരവമായി കാണുക. അങ്ങനെ, പരിശുദ്ധാത്മാവിനെതിരായ ഏതെങ്കിലും പാപത്തിലേക്കു നയിക്കുന്ന വഴുക്കലുള്ള ചരിവിലൂടെ താഴേക്കു പതിക്കാൻ നിങ്ങൾ ഒരിക്കലും തുടങ്ങുകപോലുമില്ല.
അത്യന്തം കരുണയുള്ള കർത്താവേ, എളിമയോടും ആത്മാർത്ഥമായ മനസ്താപത്തോടുംകൂടെ അങ്ങയെ സമീപിക്കുന്ന എല്ലാവർക്കും അങ്ങ് പാപമോചനം വാഗ്ദാനം ചെയ്യുന്നു. ഈ സദ്ഗുണങ്ങളാൽ എന്നെ നിറയ്ക്കണമേ. അങ്ങയുടെ അഗാധമായ കരുണയ്ക്കായി ഞാൻ എന്നെത്തന്നെ തുറന്നുകൊടുക്കുമ്പോൾ, മാറ്റം വരുത്താനുള്ള ദൃഢനിശ്ചയം എനിക്കു നൽകണമേ. ഈശോയേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
ഇന്നത്തെ വിശുദ്ധൻ – ഡീക്കനും വേദപാരംഗതനുമായ വിശുദ്ധ അപ്രേം
ഞായറാഴ്ച വരുന്നതിനാൽ ഈ വർഷം ആരാധനക്രമത്തിൽ അനുസ്മരണമായി ആഘോഷിക്കുന്നില്ല
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
മുകളിൽ നൽകിയിരിക്കുന്ന ചിത്രം: കാൾ ബ്ലോക്കിന്റെ ‘പ്രലോഭിക്കപ്പെടുന്ന യേശു’, picryl വഴി
