मराठी

संकोच करू नका

12 जानेवारी 2026
सामान्य काळातील पहिल्या आठवड्याचा सोमवार
आजची वाचने

प्रतिमा सौजन्य: अडोबी स्टॉक

व्हिडिओ

येशू गालीलात आला आणि देवाचे शुभवर्तमान घोषित करू लागला: “पूर्ततेची वेळ आली आहे. देवाचे राज्य जवळ आले आहे. पश्चात्ताप करा आणि शुभवर्तमानावर विश्वास ठेवा.” गालील सरोवराच्या काठाने जात असताना त्याने शिमोन आणि त्याचा भाऊ आंद्रेय यांना सरोवरात जाळी टाकताना पाहिले. ते कोळी होते. येशू त्यांना म्हणाला, “माझ्यामागे या, म्हणजे मी तुम्हाला माणसे पकडणारे कोळी बनवीन.” मार्क 1:15–17

आज आपण सामान्य काळात प्रवेश करताना, मार्कने नोंदवलेली येशूची शुभवर्तमानाची पहिली घोषणा ऐकतो: “पूर्ततेची वेळ आली आहे. देवाचे राज्य जवळ आले आहे. पश्चात्ताप करा आणि शुभवर्तमानावर विश्वास ठेवा.” येशूने आपले सार्वजनिक कार्य सुरू केले तेव्हा हे शब्द जितके खरे होते, तितकेच ते आज आपल्यासाठीही खरे आहेत.

तो प्रसंग डोळ्यांसमोर आणा. देवाच्या सनातन पुत्राने धन्य कुमारी मरियेच्या उदरात मानवी देह धारण केला. तो आपल्या आईवडिलांसोबत नाझरेथमध्ये लहानाचा मोठा झाला आणि योसेफकडून सुतारकाम शिकला. वयाच्या तिसाव्या वर्षी त्याने योहानाकडून यार्देन नदीत बाप्तिस्मा घेतला. मग त्याने वाळवंटात चाळीस दिवस उपवास आणि प्रार्थना केली व सैतानाच्या मोहांवर मात केली. त्यानंतर तो गालील सरोवराकडे गेला आणि त्याने आपले सार्वजनिक कार्य सुरू केले.

येशूच्या जीवनातील प्रत्येक क्षण पवित्र होता, तरीही त्याच्या सार्वजनिक कार्याच्या आरंभीचे शब्द विशेष लक्ष वेधून घेतात. ज्या “पूर्ततेच्या वेळेची” इतके दिवस वाट पाहिली जात होती, ती आली होती. येशू घोषणा करू लागला, “पश्चात्ताप करा आणि शुभवर्तमानावर विश्वास ठेवा.” जगाच्या स्थापनेपासून जे काही योजले गेले होते आणि जुन्या करारात जे काही प्रकट करण्यात आले होते, ते सर्व त्या क्षणाकडे निर्देश करत होते. देवाची सर्व अभिवचने आता पूर्ण होणार होती.

येशूच्या जीवनाबद्दल आणि त्याच्या कार्याबद्दल आज आपल्याला जे काही माहीत आहे, ते जाणून त्या काळात परत जाता आले असते, तर इतिहासातील सर्वांत महत्त्वाच्या कार्याची साधी सुरुवात पाहणे किती विलक्षण ठरले असते! अशा असामान्य कार्यासाठी येशूने ज्या साध्यासुध्या लोकांना बोलावले आणि तयार केले, त्यांचे उदाहरण फार प्रेरणादायी आहे. येशू कोण आहे हे न जाणता कितीतरी लोक त्याच्या जवळून निघून गेले. यातून त्याची नम्रता अधिक ठळकपणे दिसते. त्याने आपले वैभव प्रकट केले नाही. त्याऐवजी त्याने आपल्या प्रभोधनाच्या सामर्थ्यावर आणि शिष्यांच्या अंतःकरणात घडणाऱ्या कृपेच्या कार्यावर भरवसा ठेवला. आजही तो तसेच करतो.

इतिहासातील त्या क्षणी आपल्याला परत जाता येत नसले, तरी तो क्षण काळाच्या पलीकडचा आहे, हे आपण समजून घेतले पाहिजे. फार पूर्वी गालील सरोवराकाठी येशूने जे शब्द उच्चारले, तेच तो आज पुन्हा उच्चारतो. तो तुम्हाला म्हणतो, “आज तुमच्यासाठी पूर्ततेची वेळ आली आहे!” आपल्या आयुष्यातील प्रत्येक दिवशी ‘आज’ म्हणजे हाच वर्तमान क्षण.

देवाच्या वचनाचे विलक्षण महत्त्व आणि पश्चात्ताप करण्याच्या देवाच्या हाकेला आत्ताच प्रतिसाद देण्याची गरज आपल्याला उमगत नाही. त्यामुळे येशू आपल्याला काय सांगतो, याकडे अनेकदा आपले लक्ष जात नाही. पहिल्या प्रेषितांनी जसा प्रतिसाद दिला, तसाच आपणही त्या हाकेला दिला पाहिजे. येशूची पेत्र आणि आंद्रेय यांच्याशी पहिली भेट होते, तेव्हा ते मासे पकडत असतात. तो त्यांना म्हणतो, “माझ्यामागे या, म्हणजे मी तुम्हाला माणसे पकडणारे कोळी बनवीन,” आणि ते त्याच्यामागे जातात. मग तो याकोब आणि योहान यांना बोलावतो. तेही त्याच्यामागे जातात. ते संकोच करत नाहीत. येशूने तोपर्यंत एकही चमत्कार केला नव्हता, त्याचा एकही अनुयायी नव्हता आणि लोक त्याला ओळखतही नव्हते. तरीही आपण येशूच्या मागे गेलेच पाहिजे, हे त्यांना उमगले. बाकी सर्व काही मागे सोडून ते त्याच्यामागे गेले.

आज येशूच्या कार्याच्या सुरुवातीचे चिंतन करा. दिवसभरात, कोणत्याही क्षणी येशू तुम्हाला बोलावतो, तेव्हा प्रेषितांप्रमाणे तुम्ही त्याला तत्काळ आणि पूर्ण प्रतिसाद देता का? येशूचे पूर्णपणे अनुसरण करण्यापासून तुमच्या जीवनातील कोणती ‘जाळी’ तुम्हाला अडवतात? काही आसक्ती, सुखसोयी किंवा लक्ष विचलित करणाऱ्या गोष्टी तुमच्या प्रतिसादाच्या आड येतात का? “पश्चात्ताप करा आणि शुभवर्तमानावर विश्वास ठेवा,” हे त्याचे आवाहन ऐकण्यासाठी तुम्ही देवाच्या वचनासोबत आणि प्रार्थनेत वेळ घालवता का? पेत्र, आंद्रेय, याकोब आणि योहान यांना तो जसा म्हणाला, तसाच येशू आज तुम्हालाही म्हणतो, “माझ्यामागे या.” तो जिथे नेईल तिथे त्याच्यामागे जाण्यास संकोच करू नका. हा क्षण निसटू देऊ नका, कारण तो आत्ताच तुम्हाला बोलावत आहे.

हे माझ्या दैवी प्रभू, तू आपले सार्वजनिक कार्य सुरू केलेस, तेव्हा तुझ्या वैभवाचे पूर्ण तेज गालीलातील लोकांच्या नजरेपासून लपलेले होते. तरीही जेव्हा तू बोललास, तेव्हा श्रद्धेने ऐकणाऱ्यांच्या मनात आणि अंतःकरणात तुझे शब्द खोलवर रुजले. अजूनही चालू असलेल्या या पूर्ततेच्या काळात मला आत्ता आणि माझ्या आयुष्याच्या प्रत्येक क्षणी सहभागी करून घे. तू मला पश्चात्ताप करण्यास आणि श्रद्धा ठेवण्यास बोलावतोस, तेव्हा तुझ्या हाकेला पूर्णपणे आणि निःसंकोचपणे प्रतिसाद देण्याचे बळ मला दे. हे येशू, माझा तुझ्यावर विश्वास आहे. आमेन.

सामान्य काळासाठी पवित्र शास्त्रावरील चिंतन

शुभवर्तमानावरील आणखी चिंतने

दैवी दयेवरील चिंतन

सर्व संत / सण

मिस्साच्या वाचनांचे पर्याय