Septemba 25, 2020
Ijumaa ya Wiki ya Ishirini na Tano ya Kipindi cha Mwaka
Masomo ya Leo
Sikiliza kwa Kiingereza
“Makutano wanasema Mimi ni nani?” Wakajibu, “Yohane Mbatizaji; wengine, Eliya; na wengine, ‘Mmoja wa manabii wa kale amefufuka.’” Kisha akawaambia, “Lakini ninyi mwasema Mimi ni nani?” Petro akajibu, “Kristo wa Mungu.” Luka 9:18c-20
Petro alijibu kwa usahihi. Yesu alikuwa “Kristo wa Mungu.” Wengine wengi walimzungumzia kama nabii mkuu tu, lakini Petro aliona kwa undani zaidi. Aliona kwamba Yesu alikuwa, kwa namna ya pekee, Mpakwa Mafuta anayetoka kwa Mungu. Kwa maneno mengine, Yesu alikuwa Mungu.
Ingawa tunajua kwamba hili ni kweli, nyakati nyingine tunaweza kushindwa kuelewa kikamilifu kina cha “Fumbo la Imani” hili. Yesu ni mwanadamu, naye ni Mungu. Hili ni gumu kuelewa. Ingekuwa vigumu pia kwa watu wa wakati wa Yesu kuelewa fumbo hili kuu. Jiwazie umeketi mbele ya Yesu, ukimsikiliza akizungumza. Kama ungekuwa hapo mbele Yake, je, ungehitimisha kwamba Yeye pia ni Nafsi ya pili ya Utatu Mtakatifu Sana? Je, ungehitimisha kwamba alikuwako tangu milele na kwamba alikuwa yule mkuu MIMI NIKO AMBAYE NIKO? Je, ungehitimisha kwamba alikuwa mkamilifu kwa kila namna na kwamba pia alikuwa Muumba wa vitu vyote na Yeye anayevifanya vitu vyote viendelee kuwapo?
Yaelekea hakuna hata mmoja wetu ambaye angeelewa kikamilifu kina halisi cha maana ya kwamba Yesu alikuwa “Kristo wa Mungu.” Yaelekea tungetambua jambo la pekee ndani Yake, lakini tungeshindwa kumtambua Yeye alivyo katika ukamilifu wa dhati Yake.
Hali ni hiyo hiyo leo. Tunapoitazama Ekaristi Takatifu Sana, je, tunamwona Mungu? Je, tunamwona Mungu Mwenyezi, mwenye uwezo wote na mwenye upendo kwa wote, ambaye amekuwako tangu milele, aliye chanzo cha mema yote na Muumba wa vitu vyote? Pengine jibu ni “Ndiyo” na pia “Hapana.” “Ndiyo” kwa kuwa tunaamini, na “hapana” kwa kuwa hatuelewi kikamilifu.
Tafakari leo juu ya umungu wa Kristo. Tafakari juu Yake aliyepo katika Ekaristi Takatifu Sana, na pia juu ya uwepo Wake kila mahali yanayotuzunguka. Je, unamwona? Je, unamwamini? Imani yako Kwake ina kina na ukamilifu wa kadiri gani? Jitoe upya kumwelewa kwa undani zaidi Yesu ni nani katika umungu Wake. Jitahidi kupiga hatua moja zaidi katika kina cha imani yako.
Bwana, ninaamini kweli. Ninaamini kwamba Wewe ni Kristo wa Mungu. Nisaidie kuelewa zaidi maana ya jambo hilo. Nisaidie kuuona umungu Wako kwa uwazi zaidi na kukuamini kikamilifu zaidi. Yesu, nakutumainia.
Siku ya Nne: Novena kwa Mtakatifu Teresia wa Mtoto Yesu wa Lisieux – Ua Dogo
Tafakari juu ya Huruma ya Mungu
Machaguo ya Masomo ya Misa Takatifu
Picha: Kuitwa kwa Mitume, kazi ya Domenico Ghirlandaio
