Aprili 10, 2022
Jumapili ya Matawi ya Mateso ya Bwana (Mwaka C)
Sikiliza kwa Kiingereza
“Abarikiwe mfalme anayekuja kwa jina la Bwana. Amani mbinguni na utukufu juu mbinguni.” Luka 19:38
Katika Liturujia ya leo, tunakutana na tofauti kubwa ya mambo tunayopitia na hisia. Tunaanza adhimisho letu kwa kusikiliza simulizi la Yesu akikaribishwa Yerusalemu kwa furaha na shangwe kuu! “Hosana!” walipaza sauti. “Hosana juu mbinguni!” Yesu alitendewa kama alivyostahili kutendewa. Watu walifurahi sana kumwona, na kulikuwa na shangwe nyingi.
Lakini shangwe hii iligeuka upesi kuwa mshtuko na hofu kubwa tunapozama zaidi katika masomo ya leo. Injili inafikia kilele chake huku Yesu akiwa ametundikwa Msalabani, akilia kwa sauti, “Eloi, Eloi, lema sabachthani?” “Mungu wangu, Mungu wangu, mbona umeniacha?” Na baada ya hayo, “Yesu akalia kwa sauti kuu, akakata roho.” Wakati huo, waamini wote wanapiga magoti kimya tunapotafakari uhalisi wa kifo cha Kristo.
Mambo yanaweza kubadilika namna gani katika juma moja tu! Ni nini kilichowapata watu wote waliokuwa wakipaza sauti na kumsifu alipoingia Yerusalemu? Wangewezaje kuruhusu asulubiwe na kufa?
Jibu la kina zaidi kwa swali hili ni lile ambalo huenda hatulitarajii. Jibu ni kwamba Baba alitaka hivyo. Kwa utashi Wake wa kuruhusu, Baba alitaka watu wengi namna hiyo wamgeukie, wamwache na waruhusu asulubiwe. Ni muhimu sana kuelewa hili.
Wakati wowote katika Juma hilo Takatifu la kwanza, Yesu angeweza kutumia uwezo Wake wa kimungu na kukataa kuukubali Msalaba Wake. Lakini hakufanya hivyo. Badala yake, alipitia juma hili kwa hiari, akiyatazamia na kuyakubali mateso na kukataliwa alivyopata. Wala hakufanya hivyo kwa shingo upande au hata kwa majuto. Alilikubali juma hili kwa hiari, akilichagua kwa utashi Wake mwenyewe.
Kwa nini afanye jambo kama hilo? Kwa nini achague mateso na kifo? Kwa sababu katika hekima kamilifu ya Baba, mateso na kifo hivi vilikuwa na kusudi kubwa zaidi. Mungu alichagua kuitangua hekima ya ulimwengu kwa kutumia mateso na Kusulubiwa Kwake mwenyewe kama njia kamilifu ya kututakatifuza. Kwa tendo hili, aligeuza uovu mkubwa kuliko wote kuwa wema mkuu kuliko wote. Sasa, kutokana na imani yetu katika tendo hili, msalaba wenye sanamu ya Kristo unawekwa mahali pa kati katika makanisa yetu na katika nyumba zetu kama ukumbusho wa daima kwamba hata uovu mkubwa kuliko wote hauwezi kushinda uwezo, hekima na upendo wa Mungu. Mungu ana nguvu kuliko kifo chenyewe, na Mungu ndiye mwenye ushindi wa mwisho hata pale inapoonekana kwamba hakuna tumaini lolote.
Acha juma hili likujalie matumaini ya kimungu. Mara nyingi tunaweza kujaribiwa kuvunjika moyo na, baya zaidi, tunaweza kujaribiwa kukata tamaa. Lakini nasi bado hatujapoteza kila kitu. Hatimaye, hakuna kitu kinachoweza kutunyang’anya furaha yetu isipokuwa tukikiruhusu. Hakuna taabu, hakuna mzigo wala msalaba unaoweza kutushinda ikiwa tunabaki imara katika Kristo Yesu, tukimruhusu abadilishe yote tunayovumilia maishani kwa namna Yake tukufu ya kuukubali Msalaba Wake mwenyewe.
Tafakari leo kuhusu tofauti ya hisia kuanzia Jumapili ya Matawi hadi Ijumaa Kuu. Tafakari hofu, kuchanganyikiwa na kukata tamaa ambavyo wengi wangekuwa navyo walipomwona Yesu akiuawa. Tafakari pia kwamba hili ni tendo la kimungu ambalo kwalo Baba aliruhusu mateso haya makali ili ayatumie kwa ajili ya wema mkuu kuliko wote uliowahi kujulikana. Bwana alitoa uhai Wake kwa hiari na anakuita ufanye vivyo hivyo. Tafakari msalaba ulio katika maisha yako. Jua kwamba Bwana anaweza kuutumia kwa mema, akileta huruma tele kwa njia ya kuukubali kwako kwa hiari unapomtolea kama sadaka ya hiari. Uwe na Juma Takatifu lenye baraka! Elekeza macho yako kwenye Msalaba wa Bwana na pia kwenye msalaba wako mwenyewe.
Bwana wangu uliyesulubiwa, ninapojaribiwa kukata tamaa, unijalie matumaini. Unisaidie kuona uwepo Wako katika mambo yote, hata katika yale yanayonisumbua zaidi. Juma hili Takatifu libadilishe nyakati zangu za giza kuu na udhaifu wangu ninapokukabidhi yote Wewe, Mungu wangu. Yesu, nakutumainia.
(Jumapili ya Matawi)
Tafakari juu ya Huruma ya Mungu
Tafakari za Maandiko Matakatifu kwa Kipindi cha Kwaresima
Usomaji Zaidi – Jumapili ya Matawi ya Mateso ya Bwana
Machaguo ya Masomo ya Misa Takatifu
Picha kuu hapo juu: Kuingia Yerusalemu, iliyochorwa na Pedro Orrente, kupitia Wikimedia Commons
