22 Agosti 2023
Jumanne ya Juma la Ishirini la Kipindi cha Kawaida
Masomo ya Leo
Umalikia wa Bikira Maria Mwenye Heri—Kumbukumbu
Sikiliza kwa Kiingereza
Tena nawaambia, ni rahisi zaidi ngamia kupita katika tundu la sindano kuliko tajiri kuingia katika Ufalme wa Mungu.” Wanafunzi waliposikia hayo, walishangaa sana, wakasema, “Ni nani basi anayeweza kuokoka?” Yesu akawatazama, akasema, “Kwa wanadamu jambo hili haliwezekani, lakini kwa Mungu yote yanawezekana.” Mathayo 19:24–26
Kwa mujibu wa mapokeo fulani, “tundu la sindano” lilimaanisha lango katika ukuta wa Yerusalemu. Wakati wa mchana, kulikuwa na lango kubwa lililokuwa wazi ambalo ngamia angeweza kupita kwa urahisi. Lakini usiku, lango hilo kubwa lilifungwa, na katikati yake kulikuwa na uwazi mdogo uliowawezesha watu kupita. Hata hivyo, ngamia hangeweza kupita katika uwazi huo mdogo isipokuwa apige magoti, aondolewe mzigo mgongoni, kisha atambae humo. Akirejelea simulizi hili, Mtakatifu Anselmu anasema kwamba “tajiri hawezi kupita katika njia nyembamba iendayo uzimani mpaka awe ameutua mzigo wa dhambi na wa mali, yaani, kwa kuacha kuvipenda” (Catena Aurea). Kwa hiyo, je, inawezekana ngamia kuingia kupitia “tundu la sindano” na, hivyo basi, tajiri kuingia Mbinguni? Ndiyo. Lakini kwa sharti tu la kupiga magoti, kujinyenyekeza, na kujivua “mzigo” wa mali zao.
Kwa wale ambao kwa kweli wana utajiri wa vitu vya ulimwengu huu, huenda kifungu hiki cha Injili kikawa kigumu kusoma na kutafakari. Maneno haya yalisemwa kwa kumrejelea kijana tajiri aliyemuuliza Yesu jinsi anavyoweza kuingia katika uzima wa milele. Jibu la Yesu lilikuwa, “nenda, ukauze ulicho nacho, uwape maskini, nawe utakuwa na hazina mbinguni.” Aliposikia hayo, yule kijana tajiri aliondoka akiwa na huzuni kwa sababu alikuwa ameshikamana sana na mali yake.
Hata hivyo, maelezo ya Yesu hapo juu yanapaswa kumpa matumaini yeyote anayepata ugumu wa kutimiza takwa hili kubwa. Wanafunzi walifadhaishwa sana na maneno ya Yesu, na ndiyo sababu Yesu akaongeza kusema, “Kwa wanadamu jambo hili haliwezekani, lakini kwa Mungu yote yanawezekana.” Kwa Mungu yote yanawezekana! Kauli hii ya kweli inapaswa kutafakariwa kwa makini na kuaminiwa na yeyote anayepambana na hali ya kushikamana kupita kiasi na mali za dunia. Pia ikumbukwe kwamba mtu anaweza kushikamana na mali hata kama hana mali. Tamaa ya kuwa na zaidi ndiyo mshikamano unaohitaji kutakaswa, wala si kuwa na mali kwenyewe. Kwa kweli, inawezekana kuwa na mali nyingi bila kushikamana nayo hata kidogo. Huu ndio uzuri wa umaskini wa roho. Lakini jihadhari usidhani haraka mno kwamba umeifikia kikamilifu heri hii. Kauli ya Yesu hapo juu ilitolewa kwa upendo kwa wale wanaoshikamana kupita kiasi na vitu vya ulimwengu huu. Kwa hiyo, ikiwa wewe ni mmoja wao, jihurumie na uyazingatie kwa makini maneno ya Yesu pamoja na pambano lako la ndani kuhusu jambo hili.
Tafakari leo kauli hii ya Yesu iliyo wazi na isiyo na utata. “Ni rahisi zaidi ngamia kupita katika tundu la sindano kuliko tajiri kuingia katika Ufalme wa Mungu.” Je, unaamini hili? Je, unaweza kulikubali? Je, Yesu anazungumza nawe kupitia kifungu hiki? Tena, hata kama wewe ni maskini wa mali, je, tamaa yako ya utajiri ni kubwa? Ikiwa ndivyo, kifungu hiki kinakuhusu wewe pia. Ruhusu kifungu hiki kikae moyoni mwako katika hali ya sala, na unapokisoma, jitahidi kuwa mkweli kwa nafsi yako kadiri uwezavyo. Usisite kuchagua utajiri wa kweli wa Mbinguni badala ya vitu vya ulimwengu huu vinavyopita. Hatimaye, thamani ya utajiri wa kiroho inapita bila kipimo kitu chochote ulicho nacho kwa muda wako mfupi hapa duniani.
Bwana wa utajiri wa kweli, Wewe unatamani kila mmoja wetu ajazwe utajiri wa kiroho ulio mkuu bila kipimo kuliko chochote tunachoweza kupata katika ulimwengu huu. Tafadhali unikomboe kutoka katika hali yangu ya kushikamana na mali za dunia ili niweze kuishi bila mzigo huo. Nisaidie kuona thamani ya hazina za neema na huruma Yako, na kuufanya utajiri huu wa kweli kuwa lengo pekee la maisha yangu. Yesu, nakutumainia.
Novena kwa Mtakatifu Monika
(Husaliwa hasa kwa ajili ya watoto waliopotoka)
18-26 Agosti
Tafakari juu ya Huruma ya Mungu
Mtakatifu wa Siku – Umalkia wa Bikira Maria Mbarikiwa
Machaguo ya Masomo ya Misa Takatifu
