Takasika

Januari 11, 2024
Alhamisi ya Wiki ya Kwanza ya Kipindi cha Mwaka
Masomo ya Leo

Sikiliza kwa Kiingereza

Mtu mwenye ukoma alimjia, akapiga magoti na kumsihi akisema, “Ukitaka, unaweza kunitakasa.” Akamsikitikia, akanyosha mkono Wake, akamgusa yule mwenye ukoma na kumwambia, “Nataka. Takasika.” Marko 1:40–41

Tukimjia Bwana wetu aliye Mungu kwa imani, tukapiga magoti mbele Yake na kumweleza hitaji letu, sisi pia tutapokea jibu lilelile alilopewa huyu mwenye ukoma: “Nataka. Takasika.” Maneno haya yanapaswa kutupa matumaini katikati ya kila changamoto maishani, bila kujali ni ipi.

Bwana wetu anataka nini kwa ajili yako? Na ni nini anachotamani kukitakasa katika maisha yako? Simulizi hili la mtu mwenye ukoma anayemjia Yesu halimaanishi kwamba Bwana wetu atatupatia kila tunachomwomba, bila kujali ni nini. Badala yake, linafunua kwamba anataka kututakasa na kutuondolea kile kinachotutesa zaidi. Ukoma katika simulizi hili unapaswa kuonekana kama ishara ya maradhi ya kiroho yanayoitesa roho yako. Kwanza kabisa, unapaswa kuonekana kama ishara ya dhambi iliyozoeleka katika maisha yako na ambayo polepole inaisababishia roho yako madhara makubwa.

Wakati huo, ukoma haukusababisha tu madhara makubwa katika mwili wa mtu, bali pia ulimtenga na jamii. Wenye ukoma walilazimika kuishi mbali na watu wengine ambao hawakuwa na ugonjwa huo; na ikiwa waliwakaribia wengine, walilazimika kuonyesha kwa ishara fulani za nje kwamba walikuwa na ukoma, ili watu wasigusane nao. Hivyo, ukoma ulikuwa na athari kwa mtu binafsi na pia kwa jamii.

Ndivyo ilivyo pia kwa dhambi nyingi zilizozoeleka. Dhambi inazidhuru roho zetu, lakini pia inaathiri mahusiano yetu. Kwa mfano, mtu mwenye tabia ya kuwa mkali, kuwahukumu wengine, kuwadhihaki au kufanya mambo yanayofanana na hayo ataona athari mbaya za dhambi hizi katika mahusiano yake.

Tukirudia maneno ya Yesu hapo juu, itafakari dhambi ile ambayo haiathiri tu roho yako zaidi, bali pia mahusiano yako. Kuhusu dhambi hiyo, Yesu anatamani kukuambia, “Takasika.” Anataka kuuimarisha uhusiano wako kwa kuitakasa roho yako na kuiondolea dhambi iliyomo. Na ili afanye hivyo, unachohitaji tu ni kumgeukia ukiwa umepiga magoti na kuiweka dhambi yako mbele Yake. Hili ni kweli hasa katika Sakramenti ya Upatanisho.

Tafakari leo kuhusu mahusiano yako ya karibu zaidi maishani. Kisha fikiria ni dhambi zipi kati ya dhambi zako zinazoyaumiza mahusiano hayo kwa namna ya moja kwa moja zaidi. Chochote kinachokujia akilini, unaweza kuwa na hakika kwamba Yesu anataka kukuondolea ukoma huo wa kiroho uliomo ndani ya roho yako.

Bwana wangu uliye Mungu, nisaidie kuona kile kilicho ndani yangu kinachoharibu zaidi mahusiano yangu na wengine. Nisaidie kuona kile kinachosababisha kujitenga na wengine na maumivu. Nipe unyenyekevu wa kuona jambo hili na tumaini ninalohitaji ili nikuelekee Wewe, niliungame na kutafuta uponyaji Wako. Wewe, na Wewe peke Yako, waweza kuniweka huru kutoka katika dhambi yangu, kwa hiyo ninakuelekea kwa matumaini na kujikabidhi Kwako. Kwa imani, ninayangojea pia maneno Yako ya uponyaji, “Nataka kweli. Takasika.” Yesu, nakutumainia.

Kitabu kinachoangaziwa: