ஜனவரி 10, 2020
ஆண்டவரின் திருக்காட்சிக்குப் பின்வரும் வெள்ளிக்கிழமை
இன்றைய வாசகங்கள்
இயேசு இருந்த ஊர்களுள் ஒன்றில், உடலெங்கும் தொழுநோய் கண்ட ஒருவர் இருந்தார். அவர் இயேசுவைக் கண்டதும் முகங்குப்புற விழுந்து, “ஆண்டவரே, நீர் விரும்பினால் என்னைத் தூய்மையாக்க முடியும்” என்று அவரிடம் மன்றாடினார். இயேசு தம் கையை நீட்டி, அவரைத் தொட்டு, “நான் விரும்புகிறேன். தூய்மையாகுக” என்றார். லூக்கா 5:12-13a
நம் ஆண்டவரின் முன் முகங்குப்புற விழும் காட்சியை மீண்டும் ஒருமுறை காண்கிறோம். இம்முறை அவ்வாறு செய்பவர் தொழுநோயாளர் ஒருவர். கடந்த வாரத்தில் நாம் ஆண்டவரின் திருக்காட்சியைக் கொண்டாடியபோது, கிறிஸ்துவை ஆராதிக்கக் கீழ்த்திசையிலிருந்து வந்து, அவர்முன் முகங்குப்புற விழுந்த மூன்று ஞானிகளை நினைவுகூர்ந்தோம்.
சமுதாயத்தில் மதிப்பும் பிறருடைய பாராட்டும் பெற்றவர்களாகக் கிறிஸ்துவைத் தேடி வந்த ஞானிகளைப் போல நம்மைக் காண நாம் அனைவரும் விரும்பலாம். அந்த ஞானிகள் நிச்சயமாக அவ்வாறுதான் பார்க்கப்பட்டிருப்பார்கள். ஆயினும், தன் பலவீனத்திலும் இயலாமையிலும் இயேசுவிடம் வந்து, இரக்கத்திற்காக மன்றாடி நம் ஆண்டவரின் முன் விழுந்த இந்தத் தொழுநோயாளரைப் போன்றவர்களாகவும் நம்மைக் காண நாம் தவறக்கூடாது. உண்மையில் நமக்குத் தொழுநோய் இல்லாமல் இருக்கலாம்; ஆனால் நாம் அனைவருமே நோயுற்றவர்களாக, இயேசுவின் இரக்கமும் குணமளிக்கும் தொடுதலும் தேவைப்படுபவர்களாக அவரிடம் வருகிறோம்.
இயேசு செய்ததைக் கவனியுங்கள். அவர் “தம் கையை நீட்டி, அவரைத் தொட்டு,” பின்னர் அவரைக் குணமாக்கினார். இயேசு தயங்கவில்லை; அந்தத் தொழுநோயாளரைச் சிறிதும் இகழ்ச்சியுடன் நடத்தவில்லை; அவருடைய பரிவிலும் சிறிதளவும் குறைவிருக்கவில்லை. இயேசு உடனடியாகத் தமது குணமளிக்கும் அருளை அந்தத் தொழுநோயாளரின் வாழ்வில் பொழிந்தார்.
வரவிருக்கும் ஆண்டவரின் திருமுழுக்குப் பெருவிழாவோடு கிறிஸ்து பிறப்புக் காலத்தின் நிறைவை நாம் நெருங்கும்போது, திருமுழுக்கில் கிறிஸ்து நம் அனைவரையும் தொட்டிருக்கிறார் என்பதை நினைவுகூர வேண்டும். இந்தத் “தொடுதல்” நம் வாழ்நாள் முழுவதும் தொடர்கிறது. அது நம்மைப் புனிதப்படுத்தி உருமாற்றும் தொடுதல். அது குணமளித்து ஆறுதலளிக்கும் தொடுதல். உங்களுக்கு அருள் தேவை என்பதை ஏற்றுக்கொண்டு, தாழ்ச்சியுடன் இயேசுவிடம் வருவதன் வழியாக அவரது இரக்கத்தை அனுபவிக்க உங்களை அனுமதியுங்கள். அவர் ஒரு கணமும் தயங்காமல் உங்களை நோக்கித் தம் கரத்தை நீட்டி, தமது இரக்கத்தின் நிறைவை உங்களுக்கு அளிப்பார் என்பதை உறுதியாக அறிந்து, அவர்முன் உங்களை முழுமையாக ஒப்படைக்க அஞ்சாதீர்கள்.
ஆண்டவரே, நீர் விரும்பினால் என்னைத் தூய்மையாக்க முடியும். நீர் விரும்பினால் என்னைக் குணமாக்கவும், மன்னிக்கவும், வலுப்படுத்தவும், அன்பு செய்யவும் முடியும். இவ்வழிகளிலும் எனக்குத் தேவையான மற்ற எல்லா வழிகளிலும் என்னை ஆசீர்வதிக்க நீர் விரும்புகிறீர், அவ்வாறே செய்யத் திருவுளம் கொள்கிறீர் என்பதை நான் அறிவதால், இப்போதே உமக்கு நன்றி கூறுகிறேன். உமது இரக்கத்திற்கும் அருளுக்கும் நன்றி; என் பலவீனத்தில் என்னை ஏற்றுக்கொள்வதற்கும் நன்றி. என் ஆண்டவரே, நான் உம்மை அன்பு செய்கிறேன்; அன்போடும் ஆராதனையோடும் உம்முன் முகங்குப்புற விழ நான் மனமுவந்து விரும்புகிறேன். இயேசுவே, உம்மில் நம்பிக்கை வைக்கிறேன்.
இன்றைய புனிதர்கள்/திருவிழாக்கள்
