ஜனவரி 30, 2020
பொதுக்காலம் மூன்றாம் வாரம் வியாழக்கிழமை
இன்றைய வாசகங்கள்
அவர் மேலும் அவர்களிடம், “நீங்கள் கேட்பதைக் குறித்துக் கவனமாயிருங்கள். நீங்கள் எந்த அளவையால் அளக்கிறீர்களோ, அதே அளவையால் உங்களுக்கும் அளக்கப்படும்; அதற்கும் மேலாக உங்களுக்குக் கொடுக்கப்படும்” என்றார். மாற்கு 4:24
மற்றவர்கள் உங்களோடு எவ்வாறு நடந்துகொள்ள வேண்டும் என்று விரும்புகிறீர்கள்? அவர்கள் உங்களை எவ்வாறு நடத்த வேண்டும் என்று விரும்புகிறீர்கள்? நாம் அனைவருமே இரக்கத்துடன் நடத்தப்பட விரும்புகிறோம் என்பதில் ஐயமில்லை. பிறர் நம்மிடம் கனிவு, பரிவு, அக்கறை, நேர்மை போன்றவற்றைக் காட்ட வேண்டும் என்று விரும்புகிறோம். மேலே உள்ள நற்செய்திப் பகுதி வெளிப்படுத்தும் ஓர் உண்மை இதுதான்: நாம் பிறரை எவ்வாறு நடத்துகிறோமோ, அவ்வாறே கடவுளும் நம்மை நடத்துவார்.
பிறரிடம் இரக்கமும் நன்மைத்தனமும் காட்டுவதே சரியானது என்பதற்காக மட்டுமே நாம் அவ்வாறு செய்வதே சிறந்தது. பிறரன்பு நிறைந்த வாழ்வுக்குக் கடவுள் நம்மை அழைக்கிறார்; அந்த வாழ்வை வாழ நாம் விரும்ப வேண்டும். ஆனால், பிறரிடம் அன்பு காட்ட நாம் போராடுகிறோம் என்றால், நாம் பிறரை எவ்வாறு நடத்துகிறோமோ அவ்வாறே நாமும் நடத்தப்படுவோம் என்பதை உணர்வது, ஒருவேளை நமக்கு ஓர் உந்துதலாக அமையலாம்.
இது நம் இதயங்களில் ஒருவித “புனித அச்சத்தை” ஏற்படுத்தி, இரக்கத்துடன் செயல்பட நம்மை ஊக்குவிக்கலாம். அதேவேளையில், அடிப்படைக் கடமைகளையும் கடந்து, அன்பையும் பரிவையும் தாராளமாக வழங்க விரும்பவும் இது நம்மை அழைக்க வேண்டும்.
இதைப் பற்றிச் சிந்தித்துப் பாருங்கள். மன்னிப்பதற்கும், அன்பு காட்டுவதற்கும், ஒப்புரவை ஏற்படுத்துவதற்கும், தேவையில் இருப்போருக்கு உதவுவதற்கும், இது போன்ற செயல்களைச் செய்வதற்கும் உங்கள் வாழ்நாள் முழுவதும் முயன்று வாழ்ந்தால், இப்போதும் முடிவிலும் இந்தக் கொடைகள் உங்கள்மீதும் தாராளமாகப் பொழியப்படும் என்று நீங்கள் உறுதியாக இருக்கலாம். கடவுள் உங்களுக்கு எதையும் கொடுக்காமல் நிறுத்திவைக்க மாட்டார் என்று நீங்கள் உறுதியாக இருக்கலாம். மாறாக, நீங்கள் எதிர்பார்க்கவோ நம்பிக்கையுடன் காத்திருக்கவோ கூடிய அனைத்தையும்விட மிகுதியாக அவர் மகிழ்வுடன் உங்கள்மீது பொழிவார்.
தாராள மனம் நிறைந்த வாழ்வை வாழ உங்களுக்கு விடுக்கப்பட்டுள்ள அழைப்பைப் பற்றி இன்று சிந்தியுங்கள். பிறரிடம் தாராளமாக இருக்க நீங்கள் எண்ணற்ற வழிகளில் அழைக்கப்படுகிறீர்கள். நன்மை நிறைந்த இந்த வாழ்வுக்கு உங்களை அர்ப்பணியுங்கள்; பின்னர் கடவுள் உங்கள்மீது பொழியப்போகும் அனைத்தையும் எதிர்நோக்கிக் காத்திருங்கள்.
ஆண்டவரே, பிறரிடம் அன்பும் பரிவும் காட்டுவதில் முற்றிலும் தாராள மனத்துடன் இருக்க எனக்கு உதவியருளும். மன்னிக்கவும், கனிவு காட்டவும், இரக்கமுள்ளவனாக இருக்கவும், இவை அனைத்தையும் நிறைவாகச் செய்யவும் எனக்கு உதவியருளும். என் அன்பு ஆண்டவரே, நான் உம்மை அன்பு செய்கிறேன். என் வாழ்வில் நீர் இடம்பெறச் செய்துள்ளவர்களையும் நிறைவான, முழுமையான அன்புடன் நேசிக்க எனக்கு உதவியருளும். இயேசுவே, நான் உம்மில் நம்பிக்கை வைக்கிறேன்.
இன்றைய புனிதர்கள்/திருவிழாக்கள்
