மார்ச் 16, 2020
தவக்காலத்தின் மூன்றாம் வாரம் — திங்கள்
இன்றைய வாசகங்கள்
உயிருள்ள கடவுளுக்காக என் ஆன்மா தாகம் கொண்டுள்ளது. நான் எப்போது சென்று கடவுளின் திருமுகத்தைக் காண்பேன்? (காண்க: திருப்பாடல் 42:3)
இவ்வாறு சொல்ல முடிவது எவ்வளவு அழகானது! “தாகம் கொண்டுள்ளது” என்ற சொற்றொடரை நாம் அவ்வளவாகப் பயன்படுத்துவதில்லை; ஆனால் அதை மட்டுமே எடுத்துக்கொண்டு சிந்திப்பதற்கும் தகுதியானது அது. கடவுளால் மட்டுமல்ல, “உயிருள்ள கடவுளால்” தணிக்கப்பட வேண்டிய ஓர் ஏக்கத்தையும் ஆவலையும் அது வெளிப்படுத்துகிறது! அத்துடன், “கடவுளின் திருமுகத்தைக் காண வேண்டும்” என்ற ஏக்கத்தையும் வெளிப்படுத்துகிறது.
இத்தகைய ஒன்றிற்காக நீங்கள் எத்தனை முறை ஏங்குகிறீர்கள்? கடவுளுக்கான ஆவல் உங்கள் ஆன்மாவில் பற்றி எரிய எத்தனை முறை இடமளிக்கிறீர்கள்? இத்தகைய ஆவலும் ஏக்கமும் கொண்டிருப்பது அற்புதமானது. உண்மையில், வாழ்வில் பெரும் மனநிறைவையும் முழுமையையும் கொண்டுவரத் தொடங்குவதற்கு இந்த ஆவல் ஒன்றே போதும்.
துறவறக் கன்னியர் குழு ஒன்றிற்குக் குருவாகவும் ஆன்மிகப் பணியாளராகவும் பணியாற்றியபடி, தனித்துறவியாக வாழ்ந்த முதிய துறவி ஒருவரைப் பற்றிய கதை உண்டு. இந்தத் துறவி தம் வாழ்நாளின் பெரும்பகுதியைத் தனிமையிலும் இறைவேண்டலிலும் படிப்பிலும் வேலையிலும் மிகுந்த அமைதியுடன் கழித்தார். ஒருநாள், அவரது வாழ்வின் இறுதிக்காலத்தில், இத்தனை ஆண்டுகளாகத் தம் வாழ்வை எவ்வாறு மகிழ்ந்து வாழ்ந்தார் என்று அவரிடம் கேட்கப்பட்டது. உடனே, எந்தத் தயக்கமுமின்றி, அவரது முகம் ஒளிர்ந்தது; ஆழ்ந்த மகிழ்ச்சி அதில் பொங்கியது. மிக ஆழ்ந்த உறுதியுடன் அவர், “எனக்கு எவ்வளவு மாட்சிமையான வாழ்வு அமைந்துள்ளது! ஒவ்வொரு நாளும் நான் இறப்பதற்குத் தயாராகிக்கொண்டிருக்கிறேன்” என்றார்.
இந்தத் துறவியின் வாழ்வில் ஒரே ஒரு மையநோக்கம் இருந்தது. அது கடவுளின் திருமுகத்தைக் காண்பதே. உண்மையில் வேறு எதுவும் அவருக்கு முக்கியமாக இருக்கவில்லை. மாட்சிமைமிக்க அந்தப் பேரின்பக் காட்சிக்குள் நுழைந்து, கடவுளை நேருக்கு நேர் காணவிருக்கும் அந்தத் தருணத்திற்காகவே அவர் ஒவ்வொரு நாளும் ஏங்கிக் காத்திருந்தார். இதைப் பற்றிய எண்ணமே, மாட்சிமைமிக்க அந்தச் சந்திப்புக்குத் தயாராகும் வகையில் திருப்பலி நிறைவேற்றிக் கடவுளை ஆராதித்தவாறு, நாள்தோறும் ஆண்டுதோறும் தொடர்ந்து முன்னேற அவருக்கு ஆற்றல் அளித்தது.
நீங்கள் எதற்காகத் தாகம் கொண்டிருக்கிறீர்கள்? இந்தக் கூற்றை நீங்கள் எப்படி நிறைவு செய்வீர்கள்? “என் ஆன்மா … தாகம் கொண்டுள்ளது?” எதற்காக? செயற்கையான, நிலையற்ற பொருள்களுக்காகவே நாம் அடிக்கடி தாகம் கொள்கிறோம். மகிழ்ச்சியாக இருக்க நாம் மிகவும் முயல்கிறோம்; இருந்தும் பல வேளைகளில் அதை அடையத் தவறுகிறோம். ஆனால், இன்றியமையாததும் நாம் எதற்காகப் படைக்கப்பட்டோமோ அதற்கானதுமான ஏக்கத்தால் நம் இதயங்கள் பற்றி எரிய இடமளித்தால், வாழ்வின் மற்ற அனைத்தும் உரிய இடத்தில் அமையும். நம் ஏக்கங்கள் அனைத்திற்கும், நம் நம்பிக்கைகள் அனைத்திற்கும், நம் ஆவல்கள் அனைத்திற்கும் மையமாகக் கடவுளை வைத்தால், இங்கே இப்போதே உண்மையாகவே “கடவுளின் திருமுகத்தைக் காண” நாம் தொடங்குவோம். கடவுளின் மாட்சிமையை மிகச் சிறிதளவு காண்பதுகூட நம்மை எந்த அளவுக்கு நிறைவடையச் செய்யும் என்றால், வாழ்வைப் பற்றிய நமது கண்ணோட்டம் முழுவதையும் அது மாற்றி, நாம் செய்யும் அனைத்திலும் தெளிவான, உறுதியான திசையை நமக்குத் தரும். ஒவ்வோர் உறவிலும் அதன் தாக்கம் இருக்கும்; நாம் எடுக்கும் ஒவ்வொரு முடிவும் தூய ஆவியாரால் வழிநடத்தப்படும்; நாம் தேடும் வாழ்வின் நோக்கத்தையும் பொருளையும் கண்டடைவோம். நம் வாழ்வைப் பற்றி நினைக்கும் ஒவ்வொரு முறையும், நாம் மேற்கொண்டிருக்கும் பயணத்தைச் சிந்தித்துப் பார்க்கும்போது நம் முகம் ஒளிரும். இறுதியில் நமக்காகக் காத்திருக்கும் நிலைவாழ்வின் கைம்மாற்றை எதிர்நோக்கி, இப்பயணத்தை முழுவீச்சில் தொடர நாம் ஏங்குவோம்.
இன்று உங்கள் “தாகத்தைப்” பற்றிச் சிந்தியுங்கள். வெற்று வாக்குறுதிகளை நம்பி உங்கள் வாழ்வை வீணாக்காதீர்கள். உலகப் பற்றுகளில் சிக்கிக்கொள்ளாதீர்கள். கடவுளைத் தேடுங்கள். அவரது திருமுகத்தைத் தேடுங்கள். அவரது திருவுளத்தையும் மாட்சிமையையும் தேடுங்கள்; அப்போது இந்த ஏக்கம் உங்களை அழைத்துச் செல்லும் திசையிலிருந்து திரும்பிவர நீங்கள் ஒருபோதும் விரும்பமாட்டீர்கள்.
இயேசுவே, ஒருநாள் உமது ஒளிமயத்தையும் மாட்சிமையையும் முழுமையாக நான் காண அருளும். உமது திருமுகத்தை நான் கண்டு, அந்த இலக்கையே என் வாழ்வின் மையமாகக் கொள்ள அருளும். என் முழுமையையும் பற்றி எரியும் இந்த ஆவல் ஆட்கொள்ளட்டும்; இந்தப் பயணத்தின் மகிழ்ச்சியில் நான் திளைத்திருக்க அருளும். இயேசுவே, நான் உம்மை நம்புகிறேன்.
சிலுவையடியில் 40 நாள்கள் – பத்தொன்பதாம் சிந்தனை – தோட்டத்தில் இயேசுவின் மரண வேதனை
கொரோனா வைரஸ் பெருந்தொற்றை எதிர்கொள்ள ஓர் இறைவேண்டல்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
