செப்டம்பர் 26, 2020
பொதுக்காலம் இருபத்தைந்தாம் வாரத்தின் சனிக்கிழமை
இன்றைய வாசகங்கள்
மறைசாட்சிகளான புனிதர்கள் கோஸ்மாஸ், தமியான்—விருப்ப நினைவு
“நான் உங்களுக்குச் சொல்வதைக் கவனமாகக் கேளுங்கள். மானிடமகன் மனிதர்களிடம் ஒப்புவிக்கப்படவிருக்கிறார்.” ஆனால் அவர்கள் இக்கூற்றைப் புரிந்துகொள்ளவில்லை; அவர்கள் அதைப் புரிந்துகொள்ளாதவாறு அதன் பொருள் அவர்களுக்கு மறைக்கப்பட்டிருந்தது. இக்கூற்றைப் பற்றி அவரிடம் கேட்கவும் அவர்கள் அஞ்சினார்கள். லூக்கா 9:44-45
அப்படியானால், இதன் பொருள் ஏன் “அவர்களுக்கு மறைக்கப்பட்டிருந்தது?” இது சிந்திக்கத்தக்கது. இங்கே இயேசு அவர்களிடம், “நான் உங்களுக்குச் சொல்வதைக் கவனமாகக் கேளுங்கள்” என்கிறார். பின்னர் தாம் துன்புற்று இறக்கப்போவதை விளக்கத் தொடங்குகிறார். ஆனால் அவர்களுக்கு அது புரியவில்லை. அவர் கூறியதன் பொருளை அவர்கள் புரிந்துகொள்ளவில்லை; “இக்கூற்றைப் பற்றி அவரிடம் கேட்கவும் அவர்கள் அஞ்சினார்கள்.”
உண்மையில், அவர்கள் புரிந்துகொள்ளாததைக் கண்டு இயேசு மனம் புண்படவில்லை. அவர்கள் உடனடியாகப் புரிந்துகொள்ள மாட்டார்கள் என்பதை அவர் அறிந்திருந்தார். இருந்தாலும், அவர்களிடம் அதைச் சொல்வதிலிருந்து அவர் பின்வாங்கவில்லை. ஏன்? காலப்போக்கில் அவர்கள் புரிந்துகொள்வார்கள் என்பதை அவர் அறிந்திருந்தார். ஆனால் தொடக்கத்தில், திருத்தூதர்கள் சற்றுக் குழப்பத்துடனேயே கேட்டுக்கொண்டிருந்தார்கள்.
திருத்தூதர்கள் எப்போது புரிந்துகொண்டார்கள்? தூய ஆவியார் அவர்கள்மீது இறங்கி, அவர்களை முழு உண்மைக்குள் வழிநடத்தியபோது அவர்கள் புரிந்துகொண்டார்கள். இத்தகைய ஆழமான மறைபொருள்களைப் புரிந்துகொள்ளத் தூய ஆவியாரின் செயல்பாடு தேவைப்பட்டது.
நம்மைப் பொறுத்தவரையிலும் இதுவே உண்மை. இயேசுவின் துன்பங்கள் என்னும் மறைபொருளை நாம் எதிர்கொள்ளும்போதும், நம் சொந்த வாழ்விலோ நாம் அன்புசெய்பவர்களின் வாழ்விலோ துன்பத்தின் எதார்த்தத்தை எதிர்கொள்ளும்போதும், தொடக்கத்தில் நாம் பெரும்பாலும் குழப்பமடையலாம். புரிந்துகொள்வதற்கு நம் மனங்கள் திறக்கப்பட, தூய ஆவியார் அளிக்கும் கொடை தேவை. பெரும்பாலான நேரங்களில் துன்பத்தைத் தவிர்க்க முடியாது. நாம் அனைவரும் அதைத் தாங்கிக்கொள்கிறோம். நம் வாழ்வில் செயலாற்றத் தூய ஆவியாரை நாம் அனுமதிக்காவிட்டால், துன்பம் நம்மைக் குழப்பத்திற்கும் நம்பிக்கையிழப்பிற்கும் இட்டுச் செல்லும். ஆனால் நம் மனங்களைத் திறக்கத் தூய ஆவியாரை அனுமதித்தால், கிறிஸ்துவின் துன்பங்களின் வழியாகக் கடவுள் உலகிற்கு மீட்பைக் கொண்டுவந்ததுபோல, நம் துன்பங்களின் வழியாகவும் அவர் எவ்வாறு நம்மில் செயலாற்ற முடியும் என்பதை நாம் புரிந்துகொள்ளத் தொடங்குவோம்.
இயேசுவின் துன்பங்களையும் உங்கள் சொந்தத் துன்பங்களையும் எந்த அளவுக்கு நீங்கள் புரிந்துகொள்கிறீர்கள் என்பதை இன்று சிந்தித்துப் பாருங்கள். துன்பத்தின் பொருளை மட்டுமல்ல, அதன் மதிப்பையும் உங்களுக்கு வெளிப்படுத்தத் தூய ஆவியாரை அனுமதிக்கிறீர்களா? இந்த அருளை வேண்டித் தூய ஆவியாரிடம் செபியுங்கள்; நமது நம்பிக்கையின் இந்த ஆழமான மறைபொருளுக்குள் கடவுள் உங்களை வழிநடத்த அனுமதியுங்கள்.
ஆண்டவரே, என் மீட்பிற்காக நீர் துன்புற்று இறந்தீர் என்பதை நான் அறிவேன். உமது சிலுவையில் என் சொந்தத் துன்பமும் புதிய பொருள் பெற முடியும் என்பதை நான் அறிவேன். இந்த மாபெரும் மறைபொருளை இன்னும் முழுமையாகக் கண்டுணரவும் புரிந்துகொள்ளவும், உமது சிலுவையிலும் எனது சிலுவையிலும் இன்னும் மேலான மதிப்பைக் கண்டுகொள்ளவும் எனக்கு உதவியருளும். இயேசுவே, நான் உம்மில் நம்பிக்கை வைக்கிறேன்.
ஐந்தாம் நாள்: சிறுமலரான லிசியே நகர்ப் புனித தெரேசாவிடம் நவநாள் செபம்
அனைத்துப் புனிதர்கள்/திருவிழாக்கள்
இன்றைய புனிதர் – மறைசாட்சிகளான புனிதர்கள் கோஸ்மாஸ், தமியான்
திருப்பலி வாசிப்புகளுக்கான தெரிவுகள்
படம்: கரவாஜியோ வரைந்த ‘கிறிஸ்து கைது செய்யப்படுதல்’
.jpg){kind=link}