நீ என்னிடம் அன்பு செலுத்துகிறாயா?

ஜூன் 3, 2022
பாஸ்கா காலத்தின் ஏழாம் வார வெள்ளிக்கிழமை
இன்றைய வாசகங்கள்

மறைசாட்சிகளான புனிதர்கள் சார்லஸ் லுவாங்காவும் தோழர்களும்—நினைவு

காணொளி

அவர் மூன்றாம் முறையாக அவரிடம், “யோவானின் மகன் சீமோனே, நீ என்னிடம் அன்பு செலுத்துகிறாயா?” என்று கேட்டார். “நீ என்னிடம் அன்பு செலுத்துகிறாயா?” என்று மூன்றாம் முறையாக அவர் கேட்டதால் பேதுரு வருத்தமடைந்து, அவரிடம், “ஆண்டவரே, உமக்கு எல்லாம் தெரியும்; நான் உம்மிடம் அன்பு செலுத்துகிறேன் என்பதும் உமக்குத் தெரியும்” என்றார். இயேசு அவரிடம், “என் ஆடுகளைப் பேணி வளர்” என்றார்.  யோவான் 21:17

பேதுரு தம்மிடம் அன்பு செலுத்துகிறாரா என்று இயேசு மூன்று முறை கேட்டார்.  ஏன் மூன்று முறை?  பேதுரு இயேசுவை மூன்று முறை மறுதலித்ததற்கு “ஈடுசெய்ய” வாய்ப்பளிப்பது ஒரு காரணமாக இருந்தது.  இல்லை, பேதுரு மூன்று முறை மன்னிப்புக் கேட்க வேண்டும் என்பது இயேசுவுக்குத் தேவையாக இருக்கவில்லை; ஆனால் பேதுரு தம் அன்பை மூன்று முறை வெளிப்படுத்த வேண்டிய தேவை அவருக்கு இருந்தது. இயேசு அதை அறிந்திருந்தார்.

மூன்று என்பது நிறைவைக் குறிக்கும் எண்ணாகவும் இருக்கிறது.  எடுத்துக்காட்டாக, கடவுள் “தூயவர், தூயவர், தூயவர்” என்று நாம் சொல்கிறோம்.  இவ்வாறு மூன்று முறை சொல்வது, கடவுள் அனைத்தினும் மேலாகத் தூயவர் என்பதை வெளிப்படுத்தும் ஒரு வழியாகும்.  இயேசுவிடம் தாம் அன்பு செலுத்துவதாக மூன்று முறை சொல்லப் பேதுருவுக்கு வாய்ப்பு அளிக்கப்பட்டது, அவர் தம் அன்பை மிக ஆழமாக வெளிப்படுத்துவதற்கான வாய்ப்பாக அமைந்தது.

ஆகவே, இங்கு அன்பு மூன்று முறை அறிக்கையிடப்படுகிறது; பேதுருவின் மறுதலிப்பும் மூன்று முறை ஈடுசெய்யப்படுகிறது.  கடவுளை அன்பு செய்து, அவரது இரக்கத்தை “மும்முறை” நாட வேண்டிய தேவை நமக்கும் இருப்பதை இது நமக்கு உணர்த்த வேண்டும்.

கடவுளிடம் நீங்கள் அன்பு செலுத்துவதாகச் சொல்லும்போது, அந்த அன்பு எவ்வளவு ஆழமானதாக இருக்கிறது?  அது பெரும்பாலும் வெறும் வாயளவிலானதா, அல்லது உங்களை முழுமையாக ஆட்கொள்ளும் முழுமையான அன்பா?  கடவுள்மீது நீங்கள் கொண்டுள்ள அன்பு உங்கள் முழு மனதிலிருந்தும் வருகிறதா?  அல்லது அது இன்னும் வளர்க்கப்பட வேண்டிய ஒன்றாக இருக்கிறதா?

நிச்சயமாக, நாம் அனைவருமே நமது அன்பை வளர்த்துக்கொள்ள வேண்டியிருக்கிறது. அதனால்தான் இந்தப் பகுதி நமக்கு இவ்வளவு முக்கியமானதாக இருக்க வேண்டும்.  இயேசு நம்மிடமும் இந்தக் கேள்வியை மூன்று முறை கேட்பதை நாம் செவிமடுக்க வேண்டும்.  “ஆண்டவரே, நான் உம்மிடம் அன்பு செலுத்துகிறேன்” என்று எளிதாகச் சொல்வதோடு அவர் நிறைவடைவதில்லை என்பதை நாம் உணர வேண்டும்.  அதை மீண்டும் மீண்டும் கேட்க அவர் விரும்புகிறார்.  இந்த அன்பை நாம் மிக ஆழமாக வெளிப்படுத்த வேண்டிய தேவை நமக்கு இருப்பதை அவர் அறிந்திருப்பதால் நம்மிடம் இவ்வாறு கேட்கிறார்.  “ஆண்டவரே, உமக்கு எல்லாம் தெரியும்; நான் உம்மிடம் அன்பு செலுத்துகிறேன் என்பதும் உமக்குத் தெரியும்!”  இதுவே நமது இறுதியான பதிலாக இருக்க வேண்டும்.

மூன்று முறை கேட்கப்படும் இந்தக் கேள்வி, அவரது இரக்கத்திற்காக நமக்குள் இருக்கும் மிக ஆழமான ஏக்கத்தை வெளிப்படுத்தவும் நமக்கு வாய்ப்பளிக்கிறது.  நாம் அனைவரும் பாவம் செய்கிறோம்.  ஏதோ ஒரு வகையில் நாம் அனைவரும் இயேசுவை மறுதலிக்கிறோம்.  ஆனால் நற்செய்தி என்னவென்றால், நமது அன்பை ஆழப்படுத்துவதற்கான ஒரு தூண்டுதலாக நமது பாவத்தை மாற்றிக்கொள்ள இயேசு எப்போதும் நமக்கு அழைப்பு விடுக்கிறார்.  அவர் நம்மீது கோபத்தோடு இருந்துவிடுவதில்லை.  முகத்தைத் திருப்பிக்கொள்வதில்லை.  நமது பாவத்தைச் சுட்டிக்காட்டி நம்மை அச்சுறுத்துவதில்லை.  ஆனால் மிக ஆழமான மனத்துயரத்தையும் முழுமையான மனமாற்றத்தையும் அவர் கேட்கிறார்.  நாம் பாவத்திலிருந்து முற்றிலுமாக விலகித் திரும்ப வேண்டும் என்று அவர் விரும்புகிறார்.

கடவுள்மீது நீங்கள் கொண்டுள்ள அன்பின் ஆழத்தையும், அதை அவரிடம் எவ்வளவு நன்றாக வெளிப்படுத்துகிறீர்கள் என்பதையும் இன்று சிந்தித்துப் பாருங்கள்.  கடவுள்மீதான உங்கள் அன்பை மும்முறை வெளிப்படுத்தத் தீர்மானியுங்கள்.  அது ஆழமானதாகவும் உண்மையானதாகவும் பின்வாங்காததாகவும் இருக்கட்டும்.  இதயத்திலிருந்து எழும் இந்தச் செயலை ஆண்டவர் ஏற்றுக்கொண்டு, உங்களுக்கு நூறு மடங்காகத் திருப்பித் தருவார்.

என் அன்பு ஆண்டவரே, நான் உம்மை அன்பு செய்கிறேன் என்பதை நீர் அறிவீர்.  நான் எவ்வளவு பலவீனமானவன் என்பதையும் நீர் அறிவீர்.  உம்மீது எனக்குள்ள அன்பையும் உமது இரக்கத்திற்காக நான் கொண்டுள்ள ஏக்கத்தையும் வெளிப்படுத்த நீர் விடுக்கும் அழைப்பை நான் கேட்கச் செய்தருளும்.  இந்த அன்பையும் ஏக்கத்தையும் நான் முழுமையாக உமக்கு அர்ப்பணிப்பேனாக.  இயேசுவே, உம்மில் நம்பிக்கை வைக்கிறேன்.

தூய ஆவியாருக்கான நவநாள் செபம்
தூய ஆவியார் பெருவிழாவுக்குத் தயாரிப்பாகச் செபிக்கப்படுவது
எட்டாம் நாள் – வெள்ளிக்கிழமை, ஜூன் 3

மேலும் நற்செய்திச் சிந்தனைகள்

இறை இரக்கச் சிந்தனைகள்

அனைத்துப் புனிதர்கள்/திருவிழாக்கள்

இன்றைய புனிதர் – மறைசாட்சிகளான புனிதர்கள் சார்லஸ் லுவாங்காவும் தோழர்களும்

திருப்பலி வாசிப்புகளுக்கான தெரிவுகள்