புதன்கிழமை, நவம்பர் 22, 2023
கன்னியும் மறைசாட்சியுமான புனித செசிலியாவின் நினைவு நாள்
இன்றைய வாசகங்கள்
பொதுக்காலம் முப்பத்து மூன்றாம் வாரம் புதன்கிழமைக்குரிய வாசகங்கள்
“உயர்குடியைச் சேர்ந்த ஒருவர் அரசுரிமை பெற்றுத் திரும்பிவருவதற்காகத் தொலைநாட்டிற்குச் சென்றார். அவர் தம் பணியாளர்களுள் பத்துப் பேரை அழைத்து, அவர்களிடம் பத்துப் பொற்காசுகளைக் கொடுத்து, ‘நான் திரும்பிவரும்வரை இவற்றைக் கொண்டு வாணிகம் செய்யுங்கள்’ என்றார். ஆனால், அவருடைய குடிமக்கள் அவரை வெறுத்தனர். ‘இவர் எங்களுக்கு அரசராவதை நாங்கள் விரும்பவில்லை’ என்று தெரிவிக்க ஒரு தூதுக்குழுவை அவருக்குப் பின்னால் அனுப்பினர்.” லூக்கா 19:12–14
இந்த உவமையில் மூன்று வகையான மக்கள் உள்ளனர். முதல் வகையினர், ஒரு பொற்காசைப் பெற்றுக்கொண்டு, தலைவர் திரும்பிவரும்வரை “வாணிகம் செய்யுங்கள்” என்ற அவரது வேண்டுகோளின்படி நடந்தவர்கள். இரண்டாம் வகையினர் அதே கட்டளையைப் பெற்றிருந்தும், சோம்பேறிகளாக இருந்து, நம் ஆண்டவர் தங்களுக்குக் கொடுத்ததிலிருந்து எந்த நற்கனியையும் விளைவிக்கத் தவறியவர்கள். மூன்றாம் வகையினர் நம் ஆண்டவரை “வெறுத்து”, அவரைத் தங்கள் அரசராக ஏற்றுக்கொள்ள விரும்பாதவர்கள்.
அரசர் திரும்பிவந்தபோது, பொற்காசுகளைப் பெற்று, வாணிகம் செய்து, மேலும் ஐந்து காசுகளையும் பத்துக் காசுகளையும் ஈட்டிய இரு பணியாளர்கள் இந்த முதல் வகையினருக்கு எடுத்துக்காட்டாக இருக்கின்றனர். இவர்கள் திருத்தூதுப் பணியில் மிகுந்த ஆர்வம் கொண்டவர்கள். இவ்வுலகில் தமது அரசை விரிவுபடுத்த, நாம் பெற்றுள்ள கொடைகளைப் பயன்படுத்துமாறு கடவுள் நம்மை அழைப்பதோடு மட்டுமல்லாமல், நம்மிடமிருந்து அதை எதிர்பார்க்கவும் செய்கிறார். அவரது எதிர்பார்ப்பு அன்பின் கட்டளையாகும். இந்தக் கட்டளையைப் புரிந்துகொள்பவர்கள், பலருடைய வாழ்வில் நித்தியத்திற்கும் நிலைக்கும் மாற்றத்தை ஏற்படுத்துவதற்கான மாட்சிமிக்க அழைப்பாக இதைக் காண்கிறார்கள். தாங்கள் அழைக்கப்பட்டுள்ள திருத்தூதுப் பணிகளை அவர்கள் சுமையாகக் கருதுவதில்லை. மாறாக, அவற்றை மகிழ்ச்சியாகக் காண்கிறார்கள்; அந்த மகிழ்ச்சி அவர்களது முயற்சிகளுக்கு ஊக்கமளிக்கிறது. இதன் பலன், இறையரசுக்காகப் பன்மடங்காகப் பெருகும் தாக்கங்களை ஏற்படுத்தும்.
அச்சத்தின் காரணமாகத் தனக்குக் கிடைத்த ஒரு பொற்காசை “கைக்குட்டையில் பொதிந்து வைத்திருந்த” பணியாளர் இரண்டாம் வகையினருக்கு எடுத்துக்காட்டாக இருக்கிறார். இவர்கள் அச்சத்தினால் நற்செய்தி அறிவிப்பதையும் இறையரசை வளர்ப்பதையும் தவிர்ப்பவர்கள். அச்சம் நம்மைச் செயலிழக்கச் செய்கிறது. ஆனால் அச்சத்திற்கு இடங்கொடுப்பது பாவமாகும். அது கடவுள்மீது விசுவாசமும் நம்பிக்கையும் இல்லாத நிலையைக் காட்டுகிறது. கடவுளுக்குப் பணிபுரிய நமக்குத் துணிவு இன்றியமையாதது. நமக்குப் பழகிய வசதியான சூழலை விட்டு வெளியேறி, உடனடியாகச் செய்வதற்கு நமக்கு இயல்பாகத் தோன்றாதவற்றையும் செய்ய வேண்டியிருக்கும். ஆனால், உவமையில் அந்தப் பணியாளர் முன்னரே கூறியதுபோல், கடவுள் நம்மிடமிருந்து நிறைய எதிர்பார்ப்பவர். இறையரசைக் கட்டியெழுப்ப ஆர்வத்துடன் உதவாமல் இருப்பதற்கு அச்சத்தை ஏற்றுக்கொள்ளத்தக்க சாக்குப்போக்காக அவர் ஏற்கமாட்டார்.
மூன்றாம் வகையினருள் ஒருவராக இருக்க நீங்கள் நிச்சயமாக விரும்பமாட்டீர்கள். இவர்கள் கடவுளின் அரசாட்சியைச் சீர்குலைக்க முனைப்புடன் செயல்பட்டு, அவரைக் கடவுளாக ஏற்க மறுப்பவர்கள். இத்தகைய மனிதர்களால் உலகம் நிறைந்திருக்கிறது. இந்த வகையினரைப் பற்றி நாம் சொல்ல வேண்டியது, நம் ஆண்டவர் அவர்களைப் பற்றிச் சொன்னதை மட்டுமே: “நான் தங்களுக்கு அரசனாவதை விரும்பாத என் பகைவர்களை இங்கே கொண்டுவந்து, என் முன்னிலையில் வெட்டிக் கொல்லுங்கள்.”
உங்கள் வாழ்க்கை எந்த வகையினரை மிகவும் ஒத்திருக்கிறது என்பதை இன்று சிந்தித்துப் பாருங்கள். பெரும்பாலும் அது முதல் இரண்டு வகைகளில் ஒன்றாக இருக்கலாம். இறையரசின்மீது உங்களுக்கு மிகுந்த ஆர்வம் இருக்கிறதா? அவரது அரசைக் கட்டியெழுப்ப உதவுவதற்கு உங்களால் இயன்ற அனைத்தையும் செய்ய நீங்கள் தயாராக இருக்கிறீர்களா? அதற்காகப் பெரும் தனிப்பட்ட தியாகம் செய்ய வேண்டியிருந்தாலும், அவ்வாறு செய்யத் தயாராக இருக்கிறீர்களா? அப்படியானால், மகிழுங்கள்; மிகுதியான கைம்மாறு உங்களுக்காகக் காத்திருக்கிறது என்பதை அறிந்துகொள்ளுங்கள். ஆனால் நீங்கள் அச்சத்தோடு போராடுபவராக இருந்தால், குறிப்பாக நற்செய்தி அறிவிப்பதற்கும், நற்செய்தியைப் பகிர்ந்துகொள்வதற்கும், தாழ்மையோடும் அன்போடும் உங்கள் விசுவாசத்தை வெளிப்படையாக வாழ்வதற்கும் அஞ்சுபவராக இருந்தால், இந்த உவமையையும், கைக்குட்டையில் காசை மறைத்து வைத்த அந்தப் பணியாளரின் கதியையும் பற்றி மேலும் நேரம் ஒதுக்கிச் சிந்தியுங்கள். திருத்தூதுப் பணியில் ஈடுபடுங்கள். இறையரசின் வளர்ச்சிக்காக உங்களை அர்ப்பணியுங்கள். அச்சம் அனைத்தையும் அகற்றுங்கள்; உங்கள் முழு இதயத்தையும் ஆன்மாவையும் கடவுளின் பணிக்கும் அவரது அரசைக் கட்டியெழுப்புவதற்கும் அர்ப்பணித்ததற்காக நீங்கள் ஒருபோதும் வருந்தமாட்டீர்கள் என்பதை அறிந்துகொள்ளுங்கள்.
என்னிடமிருந்து நிறைய எதிர்பார்க்கும் என் ஆண்டவரே, நீர் என்னிடம் பலவற்றை ஒப்படைத்திருக்கிறீர். நீர் எனக்குக் கொடுத்துள்ள அனைத்தையும் உமது அருளின் அரசைக் கட்டியெழுப்ப உதவுவதற்காகப் பயன்படுத்துமாறு என்னிடம் வலியுறுத்துகிறீர். இந்தத் திருத்தூதுப் பணிக்காக உம்மால் அழைக்கப்பட்டு, உமது கருவியாகப் பயன்படுவது எத்தகைய பெரும்பேறு! அன்பு ஆண்டவரே, நீர் என்னைப் பணிபுரிய அழைக்கும் வழிகளில் உமக்குப் பணிபுரிய நான் ஒருபோதும் தயங்காதபடி, எல்லா அச்சத்திலிருந்தும் என்னை விடுவித்தருளும். இயேசுவே, உம்மில் நம்பிக்கை வைக்கிறேன்.
கிறிஸ்து அரசருக்கு நவநாள் செபம்
நவம்பர் 17–25, 2023
பொதுக்காலத்திற்கான இறைவார்த்தைத் தியானங்கள்
அனைத்துப் புனிதர்கள்/திருவிழாக்கள்
இன்றைய புனிதர் – புனித செசிலியா, கன்னியும் மறைசாட்சியும்
திருப்பலி வாசிப்புகளுக்கான தெரிவுகள்
